གསང་ཕུ་དགོན།

        དགོན་པ་འདིའི་མཚན་རྒྱས་པར་དཔལ་གསང་ཕུ་ནེའུ་ཐོག་ཅེས་ཞུ། དགོན་དེ་ནི་ཇོ་རྔོག་འབྲོམ་གསུམ་གྱི་ཡ་གྱལ་རྔོག་ལེགས་པའི་ཤེས་རབ་ཀྱིས1073ལོར་ཕྱག་བཏབ་གནང་མཛད། གསང་ཕུ་ནེའུ་ཐོག་ཅེས་པ་ནི། ཇོ་བོ་རྗེ་སྙེ་ཐང་དུ་བཞུགས་པའི་སྐབས་ཤིག་ལ་གསང་ཕུའི་ཕྱོགས་སུ་ཕྱག་མཛུབ་གཏད་དེ་ལེགས་པའི་ཤེས་རབ་ལ། ཡ་ཀིའི་ཕུར་ནམ་མཁར་གསེར་གྱི་འཁོར་ལོ་རྩིབས་སྟོང་དང་ལྡན་པ། འཁོར་བ་ལ་རི་ཐུབ་པའི་དབང་པོ་དཔང་པོར་བཞུགས་པ་དང་། བྱམས་འཇམ་དབྱངས་གཉིས་ཀྱིས་དྲང་ངེས་ཀྱི་ཆོས་ལ་བགྲོ་གླེང་གནང་བའི་ཚུལ་དང་། དེའི་འདབས་སུ་བཀྲ་ཤིས་རྟགས་བརྒྱད་ཚང་བ། དུང་དཀར་གཡས་སུ་འཁྱིལ་བའི་སྟེང་དུ་ཁྱོད་ཀྱིས་གཙུག་ལག་ཁང་ཐོབ་ལ་འཆད་ཉན་བགྱིས་དང་། བསྟན་པ་ལ་ཕན་པ་རྒྱ་ཆེར་འབྱུང་ཞེས་ལུང་བསྟན་པས་འོ་ན་རེ་ཞིག་གསང་བར་ཞུ་ཞུས་པས་གསང་ཕུ་དང་། དེ་ནས་མི་རིང་བར་ཉེར་ཆས་ནེའུ་ལེས་ཐོགས་ཏེ་བྱོན་པས་ནེའུ་ཐོག་ཅེས་པ་དེ་ལྟར་བྱུང་གསུངས། 

     ཡང་གསུང་སྲོལ་གཞན་ཞིག་ལ་ཇོ་བོ་རྗེས་རྔོག་ལེགས་པའི་ཤེས་རབ་ལ། ཁྱོད་ཀྱི་དགོན་པ་གང་དུ་འདེབས་སམ་གསུངས་པར། ལེགས་པའི་ཤེས་རབ་ཀྱིས་གསང་ཕུའི་ཕྱོགས་སུ་ཕྱག་མཛུབ་གཏད་དེ་ངའི་དགོན་པ་ཕ་ཀིར་འདེབས་ཀྱི་ཡིན་ཞེས་ཞུས་པས། འོ་ན་རེ་ཞིག་གསང་བར་བྱ་ཞེས་གསུངས་པས་གསང་ཕུ་ཞེས་པའི་མཚན་དེ་ལྟར་བྱུང་ཞེས་ཀྱང་གསུངས། ཐོག་མར་གནས་དེར་ཚ་བ་དབོན་པོ་དང་། གླིང་དབོན་པོ་ཞེས་དབོན་དགོན་ཐོག་སོ་དགུ་ཐོག་ཅན་ཞིག་ཡོད་སྐད་ལ་ལེགས་པའི་ཤེས་རབ་ཀྱིས་ཇོ་བོ་བཀའ་གདམས་ལུགས་སུ་བསྒྱུར་གནང་ཡང་ཆོས་སྐྱོང་གི་བསྐང་གསོ་དབོན་པོ་བརྒྱད་ཅེས་པས་གཏོང་གནང་བ་ཡིན།

       དེ་ནས་རིམ་བཞིན་འཕེལ་རྒྱས་ཕྱིན་ཏེ། ལྷག་པར་དུ་ཕྱྭ་པ་ཆོས་ཀྱི་སེང་གེའི་དུས་འཛིན་གྲྭ་བསྐོར་ནས་བཞུགས་པ་ལ་ཕྱིར་རྒོལ་གྱིས་ཡར་བཞེངས་ཏེ་གཟན་ཕྱེད་ཕབ་ནས་དྷི་སྐད་བཏང་བ་དང་གཟན་སྐེད་པར་དཀྲིས། ཕྱག་གཉིས་བརྡབ་པ་དང་རྐང་པ་ཡ་གཅིག་བརྡབ་པ་སོགས་བྱས་ནས་དྲི་བ་བཏོན། དམ་བཅའ་བས་ཕྱིར་རྒོལ་གྱི་དྲི་ལན་འདེབས། ལུང་རིགས་དང་འགལ་ན་ཕྱིར་རྒོལ་གྱིས་འཁོར་གསུམ་བསྐོར་བ་དང་། ལུང་འདྲེན་པ། ཚ་བརྒྱབ་པ་སོགས་ཀྱི་སྲོལ་བཙུགས་ཏེ་ད་ལྟའི་བར་དུ་བོད་གངས་ཅན་ཡོངས་སུ་མཚན་ཉིད་གྲྭ་ཚང་ཐམས་ཅད་ཀྱིས་ཕྱག་བཞེད་གནང་སྲོལ་དེ་དེ་ནས་དར་བ་ཡིན། སེ་འབྲས་དགའ་གསུམ་མ་ཆགས་གོང་དབུས་ཀྱི་གདན་ས་དྲུག་གི་ཡ་གྱལ་ཡིན། དེ་རྗེས་རྗེ་ཙོང་ཁ་པས་མཁན་པོ་སེང་གེ་རི་བོང་ལས་རྣམ་འགྲེལ་གསན། མཁན་པོ་གྲགས་པ་སེང་གེས་རྗེ་ཙོང་ཁ་པའི་ཞབས་ལ་གཏུགས་པས་ཁོང་གི་བུ་སློབ་སོགས་ལས་བརྒྱུད་དེ་དགེ་ལུགས་དར།  གསང་ཕུར་ས་སྐྱ་དང་དགེ་ལུགས་ཀྱི་གྲྭ་ཚང་བཅུ་གཅིག་ཏུ་གྱེས་པ་སྟེ། 1.སྤེལ་སེར་དང་། 2.ཉི་མ་ཐང་། 3.དྭགས་པོ་གྲྭ་ཚང་། 4.རྣམ་རྒྱལ་གསེར་ཁང་། 5.ཁུ་སྤེ་བཅས་གླིང་སྟོད་གྲྭ་ཚང་ལྔ་དང་། 6.སྒྲོས་རྙིང་པ། 7.གཞི་བ། 8.ཉང་རོང་། 9.གནས་སྒོ་བ། 10.སྒྲོས་གསར་བ། 11.རྭ་བ་སྟོད་སྨད་བཅས་གླིང་སྨད་གྲྭ་ཚང་དྲུག་སྟེ་བཅུ་གཅིག་ཡོད་ལ་ཕྱིས་གྲྭ་ཚང་རྣམས་གྲྭ་ས་གཞན་དང་བསྒྲིལ་བའམ་ས་ཆ་གཞན་དུ་གཞིས་ཕབ་སྟབས་གསང་ཕུ་དབྱར་ཆོས་ཙམ་མ་གཏོགས་རྒྱུན་གཏན་གྲྭ་གྲངས་སུམ་ཅུ་སྐོར་ལས་མེད།

      སྔོན་འདུ་ཁང་ཀ་བ་དྲུག་ཅུའི་ནང་བླ་ཁག་བཅུའི་དགེ་འདུན་ཡོངས་རྫོགས་ཚོགས་ཐུབ་པ་དང་། ལྡེབས་རིས་ཤིན་ཏུ་རྒྱས་པོ་ཡོད། ཐུབ་པ་ལྷ་ཁང་ནང་གཙོ་སྐུ་གསེར་ཟངས་ཀྱི་ཐུབ་པ་ཚུལ་ཁྲིམས་ཞེས་ཐོག་སོ་གཅིག་ལྷག་དང་། ཤར་ལིའི་གདུང་རྟེན་ཐོག་ཚད་མ་བཅུ་གསུམ་ཙམ་དང་། དེའི་མདོ་རུ་ཕྱྭ་པ་ཆོས་ཀྱི་སེང་གེའི་དངུལ་གདུང་ཐོག་སོ་མ་ཟིན་ཙམ་དང་། གསེར་ཟངས་ཀྱི་བློ་ལེགས་གཉིས་ཀྱི་སྐུ་བརྙན་བྱིས་པ་ལོ་བརྒྱད་ཙམ། སྒྲོལ་མ་གསུང་བྱོན་མཐོ་གང་ལྷག་ཙམ། ས་པཎ་གྱི་སྐུ་བརྙན།ཡང་སྟེང་དུ་གསེར་ཟངས་ཀྱི་རྒྱ་ཕིབས། གསེར་དངུལ་ལས་བྲིས་པའི་བཀའ་འགྱུར་དང་། བསྟན་འགྱུར་བྲིས་མ། གཞན་ཡང་བླ་ཁག་སོ་སོའི་གྲྭ་ཚང་ཁག་ལའང་རྟེན་དང་བརྟེན་པ་བཅས་བཞུགས་སུ་གསོལ་ཡོད།

      ད་ལྟ་སྔོན་གྱི་ཐུབ་པ་ལྷ་ཁང་གསར་བཞེངས་གནང་བའི་ནང་འཇིམ་གྱི་དུས་གསུམ་སངས་རྒྱས་ཐོག་སོ་གཉིས་ལྡན་དང་། བཀའ་འགྱུར་དཔར་མ། ཡང་སྟེང་དུ་ཇོ་རྔོག་འབྲོམ་གསུམ་དང་། སེང་ཆེན་བརྒྱད། བློ་ལྡན་ཤེས་རབ་ཀྱི་སློབ་མ་བཞི་སོགས་འཇིམ་སྐུ་གསར་བཞེངས་དང་། ཤོད་དུ་བསེ་ཁྲབ་པའི་མགོན་ཁང་ནང་བསེ་ཁྲབ་པའི་སྐུ་བརྙན་གསར་བཞེངས་གནང་བ་སོགས་མཇལ་རྒྱུ་ཡོད། ཡང་གསང་ཕུ་ནས་མར་ཡོང་དུས་གསང་མདའ་ཞེས་པའི་གྲོང་གི་ལྷོ་ངོས་སུ་བློ་ལྡན་ཤེས་རབ་ཀྱིས་ཕྱག་བཏབ་གནང་བའི་གསང་མདའ་སྐུ་འབུམ་གྱི་རྗེས་ཤུལ་མཇལ་རྒྱུ་ཡོད།