པཎ་ཆེན་ཚད་མའི་སློབ་གླིང་ནི་པན་ཆེན་སྐུ་ཕྲེང་བཅུ་བ་མཆོག་༡༩༨༣ལོར་འཁྲུངས་གཞིས་སུ་ཕེབས་ནས་རྒྱལ་བསྟན་དར་སྤེལ་དང་སྤྱི་ཚོགས་ཕན་བདེ་ལ་དགོངས་ཏེ། ཁོང་ཉིད་ཀྱིས་པུས་མདོ་དགོན་ཆེན་དུ་ཚད་མའི་འཆད་ཉན་སླར་གསོ་ཡང་དག་པར་བགྱིས་པ་དང་། དེ་ཡང་རིགས་པའི་ལམ་ནས་བོད་ཀྱི་རིག་གནས་ལ་ཕན་པའི་བྱ་བཞག་རླབས་ཆེན་སྒྲུབ་པ་ལ་ཚད་མའི་རིགས་ལམ་གྱི་མཐུན་འགྱུར་མེད་དུ་མི་རུང་བར་དགོངས་ནས་ཚད་མ་རིག་པ་འདི་ཉིད་ཁོང་གི་ཐུགས་གཙིགས་སུ་འཛིན་པས། ཁོང་གི་འཁྲུངས་གཞིས་ཀྱི་པུས་མདོ་དགོན་ཆེན་འདིར་ཡང་ཁོང་གི་ཐུགས་བཀོད་བཞིན་བླ་བྲང་བཀྲ་ཤིས་འཁྱིལ་གྱི་དགེ་བའི་བཤེས་གཉེན་ཆེན་མི་རྗེ་ཡོན་ཏན་རྒྱ་མཚོ་སོགས་སྤྱན་དྲངས་ནས་ཚད་མའི་འཆད་ཉན་རྒྱ་ཆེར་སྤེལ་བས། ཚད་མའི་གཞུང་ལུགས་སྨྲ་བའི་དགེ་བཤེས་མང་དུ་བྱུང་། 

ཕྱིས་སུ་པཎ་ཆེན་སྐུ་ཚ་སྒར་བ་ངག་དབང་བཟང་བོ་མཆོག་གིས་པཎ་ཆེན་རིན་པོའི་ཆེ་ཁོང་ཉིད་གཙོས་བཤེས་གཉེན་དམ་པ་རྣམས་ཀྱི་ཐུགས་ཀྱི་བཞེད་དོན་འགྲུབ་པ་དང་། སྔར་སྲོལ་གྱི་ཚད་མའི་འཆད་ཉན་གྱི་རྒྱུན་སྐྱོང་བའི་ཕྱིར། སྤྱི་ལོ་༢༠༠༤་ལོར་སློབ་གཙོ་སྒར་བ་ངག་དབང་བཟང་བོ་མཆིག་གིས་དེང་གི་སློབ་གྲྭའི་རྣམ་པ་དང་མཐུན་པའི་པཎ་ཆེན་ཚད་མའི་སློབ་གླིང་འདི་ཉིད་བཙུགས་ཏེ། མདོ་དབུས་ཀྱི་ཆོས་གྲྭ་ཕྱོགས་མེད་འགྲིམ་ཞིང་ཚད་མའི་རིགས་ལམ་ལ་མངའ་བརྙེས་པའི་དགེ་བའི་བཤེས་གཉེན་ཆེན་མོ་གནས་བརྟན་རྒྱ་མཚོ་སོགས་ཀྱིས་ཐུན་མོང་མ་ཡིན་པའི་ཚད་མ་རིག་པའི་ཁྲིད་རྒྱུན་གྱིས་ཟུར་བརྒྱན་ཏེ་འཆད་ཉན་བགྱིས་པའི་གྲུབ་འབྲས་གཟེངས་སུ་ཐོན་འི་སློབ་བུ་མང་དུ་བྱུང་བ་དང་། 

༢༠༠༩ལོར་པན་ཆེན་རིན་པོ་ཆེའི་འཁྲུངས་གཞིས་སུ་དེང་གི་སློབ་གྲྭའི་རྣམ་པ་དང་མཐུན་པའི་སློབ་གྲྭའི་ཐོག་ཁང་ལེགས་པར་གྲུབ་རྗེས་སུ་པཎ་ཆེན་ཚད་མའི་སློབ་གླིང་གནས་དེར་སྤོར་ནས་ད་ལྟའི་བར་སློབ་མ་བརྒྱ་ཕྲག་ལྷག་བསྐྱངས་ཤིང་། གཞན་སློབ་གླིང་འདིར་མཚོ་སྔོན་ཞིང་ཆེན་ནང་བསྟན་རིག་གནས་ཟབ་སྦྱོང་ལྟེ་གནས་བཙུགས་ཤིང་སྔ་རྗེས་སུ་ནང་བསྟན་ཤེས་ལྡན་མི་སྣ་མི་ཉུང་བ་སྐྱེད་བསྲིང་བྱས། 
༢༠༡༤ལོའི་ཟླ་༨པར་སློབ་གླིང་འདིར་རྒྱལ་ཡོངས་སྐབས་བཅུ་བའི་ཚད་མ་རིག་པའི་བགྲོ་གླེང་ཚོགས་འདུ་་བསྡུས་ཤིང་། རྒྱལ་ཡོངས་ཀྱི་མཁས་པ་བརྒྱ་དང་ཉི་ཤུ་ལྷག་ལྷན་དུ་འཛོམས་ནས་ཚད་མའི་གཞུང་ལ་དཔྱད་གླེང་ལེགས་པར་བགྱིས་པས་ཚད་མའི་འཕེལ་རྒྱས་ལ་སྐུ་འདེད་ཀྱི་ནུས་པ་ཆེན་པོ་ཐོན། ཚོགས་འདུ་སྐབས་སུ་ཀྲུང་གི་གཏན་ཚིགས་རིག་པ་ཆེད་ལས་ཨུ་ཡོན་ལྷན་ཁང་གི་ཟབ་སྦྱོང་ལྟེ་གནས་དང་། ལྷོ་ནུབ་མི་རིགས་སློབ་ཆེན་གྱི་གཏན་ཚིགས་རིག་པའི་ཞིབ་འཇུག་སློབ་མའི་སློབ་ཁྲིད་དངོས་སྦྱོང་བྱེད་གནས་སུ་གཏན་འཁེལ་བྱས། 

༢༠༡༥ལོའི་ཟླ་༡༠པར་ཀྲུང་གོ་གཏན་ཚིགས་རིག་པ་ཆེད་ལས་ཨུ་ཡོན་ལྷན་ཁང་དང་། འདི་གའི་སློབ་གླིང་གཉིས་ཀའི་མཉམ་སྒྲུབ་ཀྱིས་རྒྱལ་ཡོངས་སྐབས་བཞི་བའི་ཚད་མ་རིག་པའི་ཟབ་སྦྱོང་འཛིན་གྲྭ་བསྡུས།

  སློབ་གཙོ་སྒར་བ་ངག་དབང་བཟང་པོ་མཆོག་རྒྱལ་ནང་གི་པེ་ཅིན་སློབ་ཆེན་དང་། ཀྲུང་ཧྲན་སློབ་ཆེན་གྱི་མཚན་ཉིད་རིག་པའི་སྡེ་ཁག  ཧྲན་ཀྲིག་པིན་ཧྭན་སློབ་གླིང་སོགས་ཀྱི་གདན་ཞུ་བཞིན་སློབ་ཆེན་དག་ཏུ་ཕེབས་ནས་བོད་བརྒྱུད་ཚད་མ་རིག་པའི་སྲོལ་བཟུང་ཞིང་།  དུས་རབས་བགྲོས་དང་མཐུན་པའི་དེང་རབས་རིག་གནས་ཀྱིས་ཟུར་བརྒྱན་ཏེ། དེང་གི་སྤྱི་ཚོགས་ལ་ཁ་ཕྱོགས་ཏེ་དངོས་ཡོད་འཚོ་བའི་ཁྲོད་དུ་བེད་སྤྱོད་ཐུབ་པའི་རིག་གནས་ཤིག་ཏུ་འགྱུར་བར་འབད་བརྩོན་བྱེད་བཞིན་ཡོད་ལ། མ་འོངས་པར་འཛམ་གླིང་འཛིན་མའི་ཁྱོན་ན་འཚོ་བཞེས་ཀྱི་འགྲོ་བ་ཡོངས་ལ་ཕན་བདེའི་གསོས་སུ་སྨིན་པའི་རིག་གནས་འདི་ཉིད་རྒྱུན་འཛིན་དང་དར་སྤེལ་གྱི་ལས་ལ་གཅིག་ཏུ་བརྩོན་བཞིན་མཆིས་སོ།།

རྩོམ་སྒྲིག་པ། བྱང་ཆུབ་རྒྱ་མཚོ།