བསེ་བསྡུས་ལས་ཆ་བའི་ལུགས་ཀྱི་རྫས་ལྡོག་གི་རྣམ་བཞག
ཆ་བའི་ལུགས་ཀྱི་རྫས་ལྡོག་གི་རྣམ་བཞག་བཤད་པ་ལ།
ཁ་ཅིག་ན་རེ། ཁྱོད་ཁྱོད་རང་ཡིན་ན། ཁྱོད་རྫས་ཆོས་ཡིན་པས་ཁྱབ་ཟེར་ན། མེད་པ་ཆོས་ཅན། རྫས་ཆོས་ཡིན་པར་ཐལ། ཁྱོད་ཁྱོད་རང་ཡིན་པའི་ཕྱིར། ཁྱབ་པ་ཁས། མ་གྲུབ་ན། མེད་པ་ཆོས་ཅན། མེད་པ་ཡིན་པར་ཐལ། ཡོད་པ་མ་ཡིན་པའི་ཕྱིར། རྩ་བར་འདོད་ན། མེད་པ་ཆོས་ཅན། ཡོད་པར་ཐལ། རྫས་ཆོས་ཡིན་པའི་ཕྱིར། རྟགས་ཁས། འདོད་མི་ནུས་ཏེ། ཚད་མས་མ་གྲུབ་པ་ཡིན་པའི་ཕྱིར།
ཁ་ཅིག་ན་རེ། ཡོད་པ་གང་ཞིག ། ཁྱོད་ཁྱོད་རང་ཡིན་ན། ཁྱོད་རྫས་ཆོས་ཡིན་པས་ཁྱབ་ཟེར་ན། རྟག་པ་ཆོས་ཅན། རྫས་ཆོས་ཡིན་པར་ཐལ། ཡོད་པ་གང་ཞིག ། ཁྱོད་ཁྱོད་རང་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། རྟག་པ་ཆོས་ཅན། རྟག་པ་ཡིན་པར་ཐལ། ཡོད་པ་གང་ཞིག ། དངོས་པོ་མ་ཡིན་པའི་ཕྱིར། རྩ་བར་འདོད་ན། རྟག་པ་ཆོས་ཅན། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རྫས་ཆོས་དང་མི་འགལ་བ་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར། རྟགས་ཁས། འདོད་ན། རྟག་པ་ཆོས་ཅན། ཁྱོད་མ་ཡིན་པ་ཁྱོད་མ་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར། རྟགས་ཁས། འདོད་ན། རྟག་པ་མ་ཡིན་པ་རྟག་པ་མ་ཡིན་པར་ཐལ། འདོད་པའི་ཕྱིར། འདོད་ན། རྟག་པ་མ་ཡིན་པ་ཆོས་ཅན། དངོས་པོ་ཡིན་པར་ཐལ། ཡོད་པ་གང་ཞིག ། རྟག་པ་མ་ཡིན་པའི་ཕྱིར། རྟགས་གཉིས་པ་སླ། དང་པོ་གྲུབ་སྟེ། སྒྲ་དེ་ཡིན་པའི་ཕྱིར། གོང་དུ་འདོད་ན༑ རྟག་པ་ཆོས་ཅན། ཁྱོད་མ་ཡིན་པ་དངོས་པོ་མ་ཡིན་པར་ཐལ། ཁྱོད་མ་ཡིན་པ་རྟག་པ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། ཁྱོད་མ་ཡིན་པ་རྟག་པ་ཡིན་པར་ཐལ། ཁྱོད་མ་ཡིན་པ་ཡོད་པའི་ཕྱིར།
ཁ་ཅིག་ན་རེ། ལྡོག་ཆོས་ཡིན་ན་ལྡོག་ཆོས་དང་པོ་གསུམ་པོ་གང་རུང་ཡིན་པས་ཁྱབ་ཟེར་ན། རྫས་ཆོས་དང་འགལ་བ་ཆོས་ཅན། ལྡོག་ཆོས་དང་པོ་གསུམ་པོ་གང་རུང་ཡིན་པར་ཐལ། ལྡོག་ཆོས་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྫས་ཆོས་དང་འགལ་བ་ཆོས་ཅན། ལྡོག་ཆོས་ཡིན་པར་ཐལ། རྫས་ཆོས་ཀྱི་རྫས་མཐུན་ཡིན་པའི་ཕྱིར། མ་གྲུབ་ན། རྫས་ཆོས་དང་འགལ་བ་ཆོས་ཅན། རྫས་ཆོས་ཀྱི་རྫས་མཐུན་ཡིན་པར་ཐལ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་མིན། ཁྱོད་ཀྱི་ལྡོག་པ་རྫས་ཆོས་ཀྱི་རྫས་མཐུན་དང་མི་འགལ་བ་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། རྫས་ཆོས་དང་འགལ་བ་ཆོས་ཅན། རྫས་ཆོས་དང་འགལ་བ་ཡིན་པར་ཐལ། ཁྱོད་རྫས་ཆོས་དང་ཐ་དད། ཁྱོད་ཡང་ཡིན། རྫས་ཆོས་ཡིན་པའི་གཞི་མཐུན་པ་མེད་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། རྫས་ཆོས་ཡང་ཡིན། རྫས་ཆོས་དང་འགལ་བ་ཡིན་པའི་གཞི་མཐུན་པ་མེད་པར་ཐལ། རྫས་ཆོས་ཡིན་ན་རྫས་ཆོས་དང་མི་འགལ་བ་ཡིན་པས་ཁྱབ་པའི་ཕྱིར། དེར་ཐལ། རྫས་ཆོས་ཡིན་ན་ཁྱོད་ཁྱོད་ཡང་ཡིན། རྫས་ཆོས་ཡིན་པའི་གཞི་མཐུན་པ་ཡིན་པས་ཁྱབ་པའི་ཕྱིར༑ གོང་དི་རྟགས་གསུམ་པ་མ་གྲུབ་ན། རྫས་ཆོས་དང་འགལ་བ་མ་ཡིན་པ་ཆོས་ཅན། རྫས་ཆོས་དང་འགལ་བ་མ་ཡིན་པར་ཐལ། རྫས་ཆོས་དང་མི་འགལ་བ་ཡིན་པའི་ཕྱིར། མ་གྲུབ་ན། རྫས་ཆོས་དང་འགལ་བ་མ་ཡིན་པ་ཆོས་ཅན། རྫས་ཆོས་དང་མི་འགལ་བ་ཡིན་པར་ཐལ། ཁྱོད་ཡང་ཡིན། རྫས་ཆོས་ཡིན་པའི་གཞི་མཐུན་པ་ཡོད་པའི་ཕྱིར། མ་གྲུབ་ན། རྫས་ཆོས་དང་འགལ་བ་མ་ཡིན་པ་ཆོས་ཅན། ཁྱོད་ཡང་ཡིན། རྫས་ཆོས་ཡིན་པའི་གཞི་མཐུན་པ་ཡོད་པར་ཐལ། དངོས་པོ་དེ་ཡིན་པའི་ཕྱིར། རྩ་བར་འདོད་ན༑ རྫས་ཆོས་དང་འགལ་བ་ཆོས་ཅན། ལྡོག་ཆོས་དང་པོ་གསུམ་པོ་གང་རུང་མ་ཡིན་པར་ཐལ། རང་ཉིད་ལྡོག་ཆོས་མ་ཡིན་པ་གང་ཞིག ། རང་མ་ཡིན་པའི་ལྡོག་ཆོས་ཡང་མ་ཡིན། ལྡོག་ཆོས་ཕུང་གསུམ་ཙམ་པོ་བ་ཡང་མ་ཡིན་པའི་ཕྱིར། རྟགས་དང་པོ་མ་གྲུབ་ན། རྫས་ཆོས་དང་འགལ་བ་ཆོས་ཅན། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་ཡིན། ཁྱོད་ཀྱི་ལྡོག་པ་རང་ཉིད་ལྡོག་ཆོས་དང་མི་འགལ་བ་ཡིན་པར་ཐལ། ཁྱོད་རང་ཉིད་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། རྫས་ཆོས་དང་འགལ་བ་ཆོས་ཅན། ཁྱོད་མ་ཡིན་པ་ཁྱོད་ཡིན་པར་ཐལ། ཁྱོད་རང་ཉིད་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། རྫས་ཆོས་དང་འགལ་བ་མ་ཡིན་པ་ཆོས་ཅན། རྫས་ཆོས་དང་འགལ་བ་མ་ཡིན་པར་ཐལ། ཁྱོད་ཡང་ཡིན། རྫས་ཆོས་ཡིན་པའི་གཞི་མཐུན་པ་ཡོད་པའི་ཕྱིར། མ་གྲུབ་ན། རྫས་ཆོས་དང་འགལ་བ་མ་ཡིན་པ་ཆོས་ཅན། ཁྱོད་ཡང་ཡིན། རྫས་ཆོས་ཡིན་པའི་གཞི་མཐུན་པ་ཡོད་པར་ཐལ། ཤེས་བྱ་དེ་ཡིན་པའི་ཕྱིར། རྟགས་གཉིས་པ་མ་གྲུབ་ན། རྫས་ཆོས་དང་འགལ་བ་ཆོས་ཅན། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རང་མ་ཡིན་པའི་ལྡོག་ཆོས་དང་མི་འགལ་བ་ཡིན་པར་ཐལ། ཁྱོད་རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། རྫས་ཆོས་དང་འགལ་བ་ཆོས་ཅན། ཁྱོད་ཁྱོད་རང་མ་ཡིན་པར་ཐལ། ཁྱོད་རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། རྫས་ཆོས་དང་འགལ་བ་ཆོས་ཅན། རྫས་ཆོས་དང་འགལ་བ་མ་ཡིན་པ་དེ་མི་འཐད་པར་ཐལ། རྫས་ཆོས་དང་འགལ་བ་ཡིན་པའི་ཕྱིར། མ་གྲུབ་ན། རྫས་ཆོས་དང་འགལ་བ་ཆོས་ཅན། རྫས་ཆོས་དང་འགལ་བ་ཡིན་པར་ཐལ། ཁྱོད་རྫས་ཆོས་དང་ཐ་དད། ཁྱོད་ཡང་ཡིན། རྫས་ཆོས་ཡིན་པའི་གཞི་མཐུན་པ་མེད་པའི་ཕྱིར། རྟགས་སྔར་གྲུབ་ཟིན། རྟགས་གསུམ་པ་མ་གྲུབ་ན། རྫས་ཆོས་དང་འགལ་བ་ཆོས་ཅན། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་ཡིན། ཁྱོད་ཀྱི་ལྡོག་པ་ལྡོག་ཆོས་ཕུང་གསུམ་ཙམ་པོ་བ་དང་མི་འགལ་བ་ཡིན་པར་ཐལ། ཁྱོད་ལྡོག་ཆོས་ཕུང་གསུམ་ཙམ་པོ་པ་ཡིན་པའི་ཕྱིར། རྟགས་པས། འདོད་ན། རྫས་ཆོས་དང་འགལ་བ་ཆོས་ཅན། ཁྱོད་མ་ཡིན་པ་ཁྱོད་ཡིན་པར་ཐལ། ཁྱོད་ལྡོག་ཆོས་ཕུང་གསུམ་ཙམ་པོ་པ་ཡིན་པའི་ཕྱིར། རྟགས་ཁས། འདོད་ན། རྫས་ཆོས་དང་འགལ་བ་མ་ཡིན་པ་ཆོས་ཅན། རྫས་ཆོས་དང་འགལ་པ་མ་ཡིན་པར་ཐལ། ཁྱོད་ཡང་ཡིན། རྫས་ཆོས་ཡིན་པའི་གཞི་མཐུན་པ་ཡོད་པའི་ཕྱིར། རྟགས་སྔར་གྲུབ་ཟིན།
གཞན་ཡང་། རང་མ་ཡིན་པའི་ལྡོག་ཆོས་ཆོས་ཅན། ལྡོག་ཆོས་དང་པོ་གསུམ་པོ་གང་རུང་ཡིན་པར་ཐལ། ལྡོག་ཆོས་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་མ་ཡིན་པའི་ལྡོག་ཆོས་ཆོས་ཅན། ལྡོག་ཆོས་ཡིན་པར་ཐལ། རྫས་ལྡོག་གང་རུང་གང་ཞིག ། རྫས་ཆོས་མ་ཡིན་པའི་ཕྱིར། རྟགས་དང་པོ་མ་གྲུབ་ན། རང་མ་ཡིན་པའི་ལྡོག་ཆོས་ཆོས་ཅན། རྫས་ལྡོག་གང་རུང་ཡིན་པར་ཐལ། གཞི་གྲུབ་པའི་ཕྱིར། རྟག་པ་གཉིས་པ་མ་གྲུབ་ན། རང་མ་ཡིན་པའི་ལྡོག་ཆོས་ཆོས་ཅན། ཁྱོད་ཁྱོད་རང་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར། རྟགས་ཁས། འདོད་ན། རང་མ་ཡིན་པའི་ལྡོག་ཆོས་ཆོས་ཅན། རྫས་ཆོས་མ་ཡིན་པར་ཐལ། རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་ཁས། དེ་ལ་འདོད་དང་མ་གྲུབ། གང་བྱས་ཀྱང་དངོས་འགལ་ཡིན། རྩ་བར་འདོད་ན། རང་མ་ཡིན་པའི་ལྡོག་ཆོས་ཆོས་ཅན། ལྡོག་ཆོས་དང་པོ་གསུམ་པོ་གང་རུང་མ་ཡིན་པར་ཐལ། རང་ཉིད་ལྡོག་ཆོས་མ་ཡིན་པ་གང་ཞིག ། རང་མ་ཡིན་པའི་ལྡོག་ཆོས་ཡང་མ་ཡིན། ལྡོག་ཆོས་ཕུང་གསུམ་ཙམ་པོ་པ་ཡང་མ་ཡིན་པའི་ཕྱིར། རྟགས་དང་པོ་མ་གྲུབ་ན། རང་མ་ཡིན་པའི་ལྡོག་ཆོས་ཆོས་ཅན། ཁྱོད་ཁྱོད་རང་ཡིན་པར་ཐལ། ཁྱོད་རང་ཉིད་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། རང་མ་ཡིན་པའི་ལྡོག་ཆོས་ཆོས་ཅན། རང་མ་ཡིན་པའི་ལྡོག་ཆོས་མ་ཡིན་པར་ཐལ། རང་ཉིད་ལྡོག་ཆོས་ཡིན་པའི་ཕྱིར། རྟགས་ཁས། དེ་ལ་འདོད་དང་མ་གྲུབ་གང་བྱས་ཀྱང་དངོས་འགལ་ཡིན། རྟགས་གཉིས་པ་མ་གྲུབ་ན། རང་མ་ཡིན་པའི་ལྡོག་ཆོས་ཆོས་ཅན། ཁྱོད་ཁྱོད་རང་མ་ཡིན་པར་ཐལ། ཁྱོད་རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། རང་མ་ཡིན་པའི་ལྡོག་ཆོས་ཆོས་ཅན། རང་མ་ཡིན་པའི་ལྡོག་ཆོས་མ་ཡིན་པ་དེ་མི་འཐད་པར་ཐལ། རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་ཁས། དེ་ལ་འདོད་དང་མ་གྲུབ་གང་བྱས་ཀྱང་དངོས་འགལ་ཡིན། རྟགས་གསུམ་པ་མ་གྲུབ་ན། རང་མ་ཡིན་པའི་ལྡོག་ཆོས་ཆོས་ཅན། ཁྱོད་མ་ཡིན་པ་ཁྱོད་ཡིན་པར་ཐལ། ཁྱོད་ལྡོག་ཆོས་ཕུང་གསུམ་ཙམ་པོ་བ་ཡིན་པའི་ཕྱིར། རྟགས་ཁས། འདོད་ན། རང་མ་ཡིན་པའི་ལྡོག་ཆོས་མ་ཡིན་པ་ཆོས་ཅན། ཁྱོད་གཞི་གྲུབ། ཁྱོད་ཁྱོད་རང་མ་ཡིན་ཁྱོད་མ་ཡིན་པ་ཁྱོད་མ་ཡིན་ཁྱོད་ཀྱི་ལྡོག་པ་རང་མ་ཡིན་པའི་ལྡོག་ཆོས་དང་མི་འགལ་བ་ཡིན་པར་ཐལ། ཁྱོད་རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། རང་མ་ཡིན་པའི་ལྡོག་ཆོས་མ་ཡིན་པ་མ་ཡིན་པ་ཆོས་ཅན། རང་མ་ཡིན་པའི་ལྡོག་ཆོས་ཡིན་པར་ཐལ། རང་མ་ཡིན་པའི་ལྡོག་ཆོས་མ་ཡིན་པ་དེ་མ་ཡིན་པའི་ཕྱིར། རྟགས་ཁས།
ཁ་ཅིག་ན་རེ། རང་མ་ཡིན་པའི་ལྡོག་ཆོས་དེ་རྫས་ལྡོག་གང་རུང་མིན་ཟེར་ན། རང་མ་ཡིན་པའི་ལྡོག་ཆོས་ཆོས་ཅན། རྫས་ལྡོག་གང་རུང་ཡིན་པར་ཐལ། ལྡོག་ཆོས་ཡིན་པའི་ཕྱིར། མ་གྲུབ་ན། རང་མ་ཡིན་པའི་ལྡོག་ཆོས་ཆོས་ཅན། ལྡོག་ཆོས་ཡིན་པར་ཐལ། རང་མ་ཡིན་པའི་ལྡོག་ཆོས་ཀྱི་རྫས་མཐུན་ཡིན་པའི་ཕྱིར། མ་གྲུབ་ན། རང་མ་ཡིན་པའི་ལྡོག་ཆོས་ཆོས་ཅན། རང་མ་ཡིན་པའི་ལྡོག་ཆོས་ཀྱི་རྫས་མཐུན་ཡིན་པར་ཐལ། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རང་མ་ཡིན་པའི་ལྡོག་ཆོས་ཀྱི་རྫས་མཐུན་དང་མི་འགལ་བ་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། རང་མ་ཡིན་པའི་ལྡོག་ཆོས་ཆོས་ཅན། རང་མ་ཡིན་པའི་ལྡོག་ཆོས་མ་ཡིན་པར་ཐལ། རང་མ་ཡིན་པའི་ལྡོག་ཆོས་ཀྱི་རྫས་མཐུན་ཡིན་པའི་ཕྱིར། རྟགས་གསུམ་པ་མ་གྲུབ་ན། རང་མ་ཡིན་པའི་ལྡོག་ཆོས་མ་ཡིན་པ་ཆོས་ཅན། རང་མ་ཡིན་པའི་ལྡོག་ཆོས་མ་ཡིན་པར་ཐལ། རང་ཉིད་ལྡོག་ཆོས་ཡིན་པའི་ཕྱིར། མ་གྲུབ་ན། རང་མ་ཡིན་པའི་ལྡོགཆོས་མ་ཡིན་པ་ཆོས་ཅན། རང་ཉིད་ལྡོག་ཆོས་ཡིན་པར་ཐལ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་ཡིན། ཁྱོད་ཀྱི་ལྡོག་པ་རང་ཉིད་ལྡོག་ཆོས་དང་མི་འགལ་བ་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། རང་མ་ཡིན་པའི་ལྡོག་ཆོས་མ་ཡིན་པ་ཆོས་ཅན། རང་མ་ཡིན་པའི་ལྡོག་ཆོས་མ་ཡིན་པ་ཡིན་པར་ཐལ། རང་ཉིད་ལྡོག་ཆོས་ཡིན་པའི་ཕྱིར། རྟགས་གསུམ་པ་མ་གྲུབ་ན། རང་མ་ཡིན་པའི་ལྡོག་ཆོས་མ་ཡིན་པ་མ་ཡིན་པ་རང་མ་ཡིན་པའི་ལྡོག་ཆོས་མ་ཡིན་པ་ཡིན་པར་ཐལ། རང་མ་ཡིན་པའི་ལྡོག་ཆོས་ཡིན་པ་རང་མ་ཡིན་པའི་ལྡོག་ཆོས་མ་ཡིན་པ་ཡིན་པའི་ཕྱིར། མ་གྲུབ་ན། རང་མ་ཡིན་པའི་ལྡོག་ཆོས་ཡིན་པ་རང་མ་ཡིན་པའི་ལྡོག་ཆོས་མ་ཡིན་པ་ཡིན་པར་ཐལ། རང་མ་ཡིན་པའི་ལྡོག་ཆོས་རང་མ་ཡིན་པའི་ལྡོག་ཆོས་མ་ཡིན་པ་ཡིན་པའི་ཕྱིར། རྟགས་གོང་དུ་གྲུབ་ཟིན།
ཁ་ཅིག་ན་རེ། རང་ཉིད་ལྡོག་ཆོས་དེ་རྫས་ལྡོག་གང་རུང་མིན་ཟེར་ན། རང་ཉིད་ལྡོག་ཆོས་ཆོས་ཅན། རྫས་ལྡོག་གང་རུང་ཡིན་པར་ཐལ། རང་མ་ཡིན་པའི་ལྡོག་ཆོས་ཡིན་པའི་ཕྱིར། མ་གྲུབ་ན། རང་ཉིད་ལྡོག་ཆོས་ཆོས་ཅན། རང་མ་ཡིན་པའི་ལྡོག་ཆོས་ཡིན་པར་ཐལ། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རང་མ་ཡིན་པའི་ལྡོག་ཆོས་དང་མི་འགལ་བ་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། རང་ཉིད་ལྡོག་ཆོས་ཆོས་ཅན། རང་ཉིད་ལྡོག་ཆོས་མ་ཡིན་པར་ཐལ། རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་གསུམ་པ་མ་གྲུབ་ན། རང་ཉིད་ལྡོག་ཆོས་མ་ཡིན་པ་ཆོས་ཅན། རང་ཉིད་ལྡོག་ཆོས་མ་ཡིན་པར་ཐལ། རང་ཉིད་ལྡོག་ཆོས་ཀྱི་རྫས་མཐུན་ཡིན་པའི་ཕྱིར། མ་གྲུབ་ན། རང་ཉིད་ལྡོག་ཆོས་མ་ཡིན་པ་ཆོས་ཅན། རང་ཉིད་ལྡོག་ཆོས་ཀྱི་རྫས་མཐུན་ཡིན་པར་ཐལ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་ཡིན། ཁྱོད་ཀྱི་ལྡོག་པ་རང་ཉིད་ལྡོག་ཆོས་ཀྱི་རྫས་མཐུན་དང་མི་འགལ་བ་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། རང་ཉིད་ལྡོག་ཆོས་མ་ཡིན་པ་ཆོས་ཅན། རང་ཉིད་ལྡོག་ཆོས་མ་ཡིན་པ་ཡིན་པར་ཐལ། རང་ཉིད་ལྡོག་ཆོས་ཀྱི་རྫས་མཐུན་ཡིན་པའི་ཕྱིར༑ རྟགས་གསུམ་པ་མ་གྲུབ་ན། རང་ཉིད་ལྡོག་ཆོས་མ་ཡིན་པ་མ་ཡིན་པ་རང་ཉིད་ལྡོག་ཆོས་མ་ཡིན་པ་ཡིན་པར་ཐལ། རང་ཉིད་ལྡོག་ཆོས་ཡིན་པ་རང་ཉིད་ལྡོག་ཆོས་མ་ཡིན་པ་ཡིན་པའི་ཕྱིར། མ་གྲུབ་ན། རང་ཉིད་ལྡོག་ཆོས་ཡིན་པ་རང་ཉིད་ལྡོག་ཆོས་མ་ཡིན་པ་ཡིན་པར་ཐལ། རང་ཉིད་ལྡོག་ཆོས་རང་ཉིད་ལྡོག་ཆོས་མ་ཡིན་པ་ཡིན་པའི་ཕྱིར། རྟགས་སྔར་གྲུབ་ཟིན།
ཁ་ཅིག་ན་རེ། རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་དེ་རང་མ་ཡིན་པའི་ལྡོག་ཆོས་ཡིན་ལ། རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་མ་ཡིན་པ་དེ་རང་ཉིད་ལྡོག་ཆོས་ཀྱི་རྫས་མཐུན་ཡིན་ཟེར་ན། འོ་ན། རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་མ་ཡིན་པ་ཆོས་ཅན། ཁྱོད་ཁྱོད་རང་ཡིན་པར་ཐལ། ཁྱོད་རང་ཉིད་ལྡོག་ཆོས་ཀྱི་རྫས་མཐུན་ཡིན་པའི་ཕྱིར། རྟགས་ཁས། འདོད་ན། རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་མ་ཡིན་པ་ཆོས་ཅན། ཁྱོད་རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་མ་ཡིན་པ་དེ་མི་འཐད་པར་ཐལ། ཁྱོད་རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་ཡིན་པའི་ཕྱིར། མ་གྲུབ་ན། རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་མ་ཡིན་པ་ཆོས་ཅན། ཁྱོད་རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་ཡིན་པར་ཐལ། ཁྱོད་རང་ཉིད་ལྡོག་ཆོས་ཀྱི་རྫས་མཐུན་ཡིན་པའི་ཕྱིར། རྟགས་ཁས། དེ་ལ་འདོད་དང་མ་གྲུབ་གང་བྱས་ཀྱང་དངོས་འགལ་ཡིན།
རང་གི་ལུགས་ལ། རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་དེ་རང་མ་ཡིན་པའི་ལྡོག་ཆོས་ཡིན་ལ། རང་ཉིད་ལྡོག་ཆོས་དང་རང་ཉིད་ལྡོག་ཆོས་ཀྱི་རྫས་མཐུན་གང་རུང་མ་ཡིན་པ་དེ། རང་ཉིད་ལྡོག་ཆོས་ཀྱི་རྫས་མཐུན་གྱི་རྫས་མཐུན་ཡིན་ཞེས་ཁས་ལེན་པར་བྱའོ། །
ཁ་ཅིག་ན་རེ། ལྡོག་ཆོས་ཕུང་གསུམ་ཙམ་པོ་བ་དེ་རྫས་ལྡོག་གང་རུང་མིན་ཟེར་ན། ལྡོག་ཆོས་ཕུང་གསུམ་ཙམ་པོ་བ་ཆོས་ཅན། རྫས་ལྡོག་གང་རུང་ཡིན་པར་ཐལ། རང་མ་ཡིན་པའི་ལྡོག་ཆོས་ཡིན་པའི་ཕྱིར། མ་གྲུབ་ན། ལྡོག་ཆོས་ཕུང་གསུམ་ཙམ་པོ་བ་ཆོས་ཅན། རང་མ་ཡིན་པའི་ལྡོག་ཆོས་ཡིན་པར་ཐལ། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རང་མ་ཡིན་པའི་ལྡོག་ཆོས་དང་མི་འགལ་བ་ཡིན་པའི་ཕྱིར། རྟགས་དང་པོ་གཉིས་རེ་རེ་ནས་སླ། རྟགས་གསུམ་པ་མ་གྲུབ་ན། ལྡོག་ཆོས་ཕུང་གསུམ་ཙམ་པོ་བ་མ་ཡིན་པ་ཆོས་ཅན། ལྡོག་ཆོས་ཕུང་གསུམ་ཙམ་པོ་བ་མ་ཡིན་པར་ཐལ། རང་ཉིད་ལྡོག་ཆོས་ཡིན་པའི་ཕྱིར།
ཁ་ཅིག་ན་རེ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་དེ་རྫས་ལྡོག་གང་རུང་མིན་ཟེར་ན། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཆོས་ཅན། རྫས་ལྡོག་གང་རུང་ཡིན་པར་ཐལ། རང་མ་ཡིན་པའི་ལྡོག་ཆོས་ཡིན་པའི་ཕྱིར། མ་གྲུབ་ན། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཆོས་ཅན། རང་མ་ཡིན་པའི་ལྡོག་ཆོས་ཡིན་པར་ཐལ། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རང་མ་ཡིན་པའི་ལྡོག་ཆོས་དང་མི་འགལ་བ་ཡིན་པའི་ཕྱིར།
ཁ་ཅིག་ན་རེ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་དེ་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་མ་ཡིན་པ་དེ་མི་འཐད་པར་ཐལ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཡིན་པའི་ཕྱིར། མ་གྲུབ་ན། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཡིན་པར་ཐལ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཁྱོད་ཁྱོད་རང་མ་ཡིན་པ་ཡིན་པའི་ཕྱིར། མ་གྲུབ་ན། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཁྱོད་ཁྱོད་རང་མ་ཡིན་པ་ཡིན་པར་ཐལ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་རང་མ་ཡིན་པའི་ལྡོག་ཆོས་ཡིན་པའི་ཕྱིར་ཟེར་ན་མ་ཁྱབ།
ཁ་ཅིག་ན་རེ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཆོས་ཅན། ཁྱོད་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཡིན་པར་ཐལ། ཁྱོད་ཁྱོད་རང་མ་ཡིན་པ་ཡིན་པའི་ཕྱིར་ཟེར་ན་འདོད་ལྡན་ཐེབས་པ་ཡིན་ཏེ། རྩི་བའི་ཚེ་ན། བུམ་སྤྱི་དང་ཁྱོད་ཁྱོད་དང་མ་ཡིན་པ་གང་རུང་བུམ་པའི་སྤྱི་དང་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་མ་ཡིན་པ་གང་རུང་ཡིན་པར་འདོད་ཅེས་རྩི་རིགས་ཞིང་འདོད་ལན་ཐེབས་པ་ཡིན་པའི་ཕྱིར། དེར་ཐལ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་བུམ་པའི་སྤྱི་དང་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་བུམ་པའི་སྤྱི་དང་། ཁྱོད་ཁྱོད་རང་མ་ཡིན་པ་གང་རུང་མ་ཡིན་པ་གང་རུང་ཡིན་པའི་ཕྱིར།
ཁ་ཅིག་ན་རེ། རྫས་ཆོས་ཡིན་ན་རྟག་པ་ཡིན་པས་ཁྱབ་ཟེར་ན། ཐེག་ཆེན་གྱི་མཐོང་ལམ་ཆོས་ཅན། རྟག་པ་ཡིན་པར་ཐལ། རྫས་ཆོས་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཐེག་ཆེན་གྱི་མཐོང་ལམ་ཆོས་ཅན། རྫས་ཆོས་ཡིན་པར་ཐལ། རྫས་ཡོད་ཡིན་པའི་ཕྱིར། མ་གྲུབ་ན། ཐེག་ཆེན་གྱི་མཐོང་ལམ་ཆོས་ཅན། རྫས་ཡོད་ཡིན་པར་ཐལ། རང་གི་གདུལ་བྱ་རིགས་ཅན་གསུམ་གྱི་དོན་སྒྲུབ་པར་བྱེད་པའི་ཐེག་ཆེན་གྱི་འཕགས་ལམ་ཡིན་པའི་ཕྱིར། འཆད་པར་བྱེད་པ་ལ། མངོན་རྟོགས་རྒྱན་ལས༑ འགྲོ་ལ་ཕན་པར་བྱེད་རྣམས་ལམ་ཤེས་ཉིད་ཀྱིས་འཇིག་རྟེན་དོན་སྒྲུབ་མཛད་པ་གང་ཞེས་གསུངས་པ་ཡིན་པའི་ཕྱིར།
ཁ་ཅིག་ན་རེ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཁྱོད་ཁྱོད་རང་ཡིན་པར་ཐལ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་མ་ཡིན་པའི་ཕྱིར་ན་འདོད་བྱས་པ་ལ། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཆོས་ཅན། རང་མ་ཡིན་པའི་ལྡོག་ཆོས་མ་ཡིན་པར་ཐལ། ཁྱོད་ཁྱོད་རང་ཡིན་པའི་ཕྱིར་ཟེར་ན་རྟགས་མ་གྲུབ་པ་ཡིན་ཏེ། རྩི་བའི་ཚེ་ན། བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་བུམ་པའི་སྤྱི་དང་ཁྱོད་ཁྱོད་རང་མ་ཡིན་པ་གང་རུང་ཡིན་པར་རྟགས་མ་གྲུབ་ཅེས་རྩི་རིགས་པ་ཡིན་པའི་ཕྱིར།
དེ་ལ་ཁ་ཅིག་ན་རེ། ཁྱོད་ཁྱོད་རང་མ་ཡིན་པ་རང་མ་ཡིན་པའི་ལྡོག་ཆོས་ཡིན་ལ་ཁྱོད་ཁྱོད་རང་རྫས་ཆོས་ཡིན་ཟེར་ན། འོ་ན། ཁྱོད་ཁྱོད་རང་ཆོས་ཅན། ཁྱོད་མ་ཡིན་པ་ཁྱོད་མ་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར། རྟགས་ཁས། བྱས་པ་ལ་ཁོ་ན་རེ། ཁྱོད་ཁྱོད་རང་མ་ཡིན་པ་ཁྱོད་ཁྱོད་རང་མ་ཡིན་པ་ཡིན་པར་འདོད་ཟེར་ན། ཁྱོད་ཁྱོད་རང་མ་ཡིན་པ་ཆོས་ཅན། རང་མ་ཡིན་པའི་ལྡོག་ཆོས་མ་ཡིན་པར་ཐལ། ཁྱོད་ཁྱོད་རང་ཡིན་པའི་ཕྱིར། རྟགས་ཁས། དེ་ལ་འདོད་དང་མ་གྲུབ་གང་བྱས་ཀྱང་ངོས་འགལ་ཡིན།
ཁ་ཅིག་ན་རེ། བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་དེ་རང་ཉིད་ལྡོག་ཆོས་ཡིན་ཟེར་ན། བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་ཁྱོད་རང་ཡིན་པར་ཐལ། ཁྱོད་རང་ཉིད་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་བུམ་པ་དང་འགལ་བ་དང་འགལ་བ་ཡིན་པར་ཐལ། ཁྱོད་བུམ་པ་དང་འགལ་བ་དང་འགལ་བ་ཡང་ཡིན། ཁྱོད་བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཡིན་པའི་ཕྱིར། རྟགས་ཁས། འདོད་ན། བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་བུམ་པ་དང་འགལ་བ་དང་འགལ་བ་མ་ཡིན་པར་ཐལ། ཁྱོད་ཡང་ཡིན། བུམ་པ་དང་འགལ་བ་ཡིན་པའི་གཞི་མཐུན་པ་ཡོད་པའི་ཕྱིར། མ་གྲུབ་ན། བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན༑ ཁྱོད་ཡང་ཡིན། བུམ་པ་དང་འགལ་བ་ཡིན་པའི་གཞི་མཐུན་པ་ཡོད་པར་ཐལ། བུམ་པ་དང་གཅིག་དང་གཅིག་དེ་ཡིན་པའི་ཕྱིར།
གཞན་ཡང་། བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་མ་ཡིན་པ་ཁྱོད་ཡིན་པར་ཐལ། ཁྱོད་རང་ཉིད་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་མ་ཡིན་པ་ཆོས་ཅན། ཁྱོད་བུམ་པ་དང་འགལ་བ་དང་འགལ་བ་ཡིན་པར་ཐལ། ཁྱོད་བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཡིན་པའི་ཕྱིར། རྟགས་ཁས། འདོད་ན། བུམ་པ་དང་འགལ་བ་དང་འགལ་བ་ཡང་ཡིན། བུམ་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་མ་ཡིན་པ་ཆོས་ཅན། ཁྱོད་ཡང་ཡིན། བུམ་པ་དང་འགལ་བ་ཡིན་པའི་གཞི་མཐུན་པ་མེད་པར་ཐལ། ཁྱོད་བུམ་པ་དང་འགལ་བ་དང་འགལ་བ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། ཀྭ་བུམ་གཉིས་དེ་ཡིན་པའི་ཕྱིར།
ཁ་ཅིག་ན་རེ། ཡོད་པ་དང་འགལ་བ་དང་འགལ་བ་ཡང་ཡིན༑ ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་དེ་རང་མ་ཡིན་པའི་ལྡོག་ཆོས་ཡིན་ཟེར་ན། ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་ཁྱོད་རང་མ་ཡིན་པར་ཐལ། ཁྱོད་རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་ཡོད་པ་དང་འགལ་བ་དང་འགལ་བ་ཡང་ཡིན། ཁྱོད་ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་མ་ཡིན་པ་དེ་མི་འཐད་པ་ཡིན་པར་ཐལ། ཁྱོད་ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཡིན་པའི་ཕྱིར། མ་གྲུབ་ན། ། ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན་ཁྱོད་ཡོད་པ་དང་འགལ་བ་དང་འགལ་བ་ཡང་ཡིན། ཁྱོད་ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཡིན་པར་ཐལ། ཁྱོད་ཡོད་པ་དང་འགལ་བ་དང་འགལ་བ་ཡིན་པ་གང་ཞིག ། ཡོད་པ་དང་མི་འགལ་བ་དང་མི་འགལ་བ་ཡིན་པའི་ཕྱིར། རྟགས་དང་པོ་མ་གྲུབ་ན། ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་ཡོད་པ་དང་འགལ་བ་དང་འགལ་བ་ཡིན་པར་ཐལ། ཁྱོད་ཡོད་པ་དང་འགལ་བ་དང་ཐ་དད། ཁྱོད་ཡང་ཡིན། ཡོད་པ་དང་འགལ་བ་ཡིན་པའི་གཞི་མཐུན་པ་མེད་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་ཡང་ཡིན། ཡོད་པ་དང་འགལ་བ་ཡིན་པའི་གཞི་མཐུན་པ་མེད་པར་ཐལ། ཁྱོད་ཡིན་ན་ཡོད་པ་དང་མི་འགལ་བ་ཡིན་པས་ཁྱབ་པའི་ཕྱིར། གོང་གི་རྟགས་གཉིས་པ་མ་གྲུབ་ན། ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་ཡོད་པ་དང་མི་འགལ་བ་དང་མི་འགལ་བ་ཡིན་པར་ཐལ། ཁྱོད་ཡང་ཡིན། ཡོད་པ་དང་མི་འགལ་བ་ཡིན་པའི་གཞི་མཐུན་པ་ཡོད་པའི་ཕྱིར། མ་གྲུབ་ན། ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཆོས་ཅན། ཁྱོད་ཡང་ཡིན། ཡོད་པ་དང་མི་འགལ་བ་ཡིན་པའི་གཞི་མཐུན་པ་ཡོད་པར་ཐལ། ཡོད་པ་དང་གཅིག་དེ་ཡིན་པའི་ཕྱིར། མ་གྲུབ་ན། ཡོད་པ་དང་གཅིག་ཆོས་ཅན། ཁྱོད་ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡང་ཡིན་པའི་གཞི་མཐུན་པ་ཡང་ཡིན། ཡོད་པ་དང་མི་འགལ་བ་ཡིན་པའི་གཞི་མཐུན་པ་ཡིན་པར་ཐལ། ཁྱོད་ཡོད་པ་དང་འགལ་བ་དང་འགལ་བ་ཡང་ཡིན། ཡོད་པ་དང་མི་འགལ་བ་དང་མི་འགལ་བ་ཡིན་པའི་གཞི་མཐུན་པ་ཡིན་པ་གང་ཞིག ། ཡོད་པ་དང་མི་འགལ་བ་ཡིན་པའི་ཕྱིར། རྟགས་རེ་རེ་ནས་སླ།
ཁ་ཅིག་ན་རེ། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་དེ་རྫས་ཆོས་ཡིན་ཟེར་ན། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཆོས་ཅན། ཁྱོད་ཁྱོད་རང་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར། རྟགས་ཁས། འདོད་ན། སྤྱིའི་སྤྱི་ཡང་ཡིན༑ བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཆོས་ཅན། སྤྱིའི་སྤྱི་ཡིན་པར་ཐལ། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཡིན་པའི་ཕྱིར། རྟགས་ཁས། འདོད་ན། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཆོས་ཅན། སྤྱི་ཁྱོད་ཀྱི་བྱེ་བྲག་ཡིན་པར་ཐལ། ཁྱོད་སྤྱིའི་སྤྱི་ཡིན་པའི་ཕྱིར། རྟགས་ཁས། འདོད་ན། སྤྱི་ཆོས་ཅན། ཁྱོད་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཡིན་པར་ཐལ། ཁྱོད་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་བའི་བྱེ་བྲག་ཡིན་པའི་ཕྱིར། རྟགས་ཁས། འདོད་ན། སྤྱི་ཆོས་ཅན། སྤྱིའི་སྤྱི་ཡིན་པར་ཐལ། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཡིན་པའི་ཕྱིར། རྟགས་ཁས། འདོད་ན། སྤྱི་ཆོས་ཅན། ཁྱོད་ཁྱོད་ཀྱི་སྤྱི་མ་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར།
གཞན་ཡང་། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཆོས་ཅན། ཁྱོད་མ་ཡིན་པ་ཁྱོད་མ་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར། རྟགས་ཁས། འདོད་ན། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་མ་ཡིན་པ་ཆོས་ཅན། ཁྱོད་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་མ་ཡིན་པ་དེ་མི་འཐད་པར་ཐལ། ཁྱོད་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཡིན་པའི་ཕྱིར། མ་གྲུབ་ན། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་མ་ཡིན་པ་ཆོས་ཅན། ཁྱོད་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་ཡིན་པར་ཐལ། ཁྱོད་སྤྱིའི་སྤྱི་ཡིན་པ་གང་ཞིག ། བྱེ་བྲག་གི་བྱེ་བྲག་ཡིན་པའི་ཕྱིར། རྟགས་དང་པོ་མ་གྲུབ་ན། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་མ་ཡིན་པ་ཆོས་ཅན། ཁྱོད་སྤྱིའི་སྤྱི་ཡིན་པར་ཐལ། སྤྱི་ཁྱོད་ཀྱི་བྱེ་བྲག་ཡིན་པའི་ཕྱིར། མ་གྲུབ་ན། སྤྱི་ཆོས་ཅན། ཁྱོད་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་མ་ཡིན་པའི་བྱེ་བྲག་ཡིན་པར་ཐལ། ཁྱོད་དེ་འདྲའི་གཞི་མཐུན་པ་མ་ཡིན་པ་ཡིན། ཁྱོད་དེ་འདྲ་བའི་གཞི་མཐུན་པ་མ་ཡིན་པ་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་མ་ཡིན་པ་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། རྟགས་དང་པོ་གཉིས་རེ་རེ་ནས་སླ། རྟགས་གསུམ་པ་མ་གྲུབ་ན། སྤྱི་ཆོས་ཅན། ཁྱོད་མ་ཡིན་ཞིང་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡིན་པའི་གཞི་མཐུན་པ་མ་ཡིན་པ་ཡིན་པའི་གཞི་མཐུན་པ་དུ་མ་གྲུབ་པར་ཐལ། ཀྭ་བུམ་གཉིས་དེ་ཡང་དེ་ཡིན། རྟག་དངོས་གཉིས་དེ་ཡང་དེ་ཡིན་པའི་ཕྱིར།
ཁ་ཅིག་ན་རེ། རྟག་པའི་སྤྱིའི་བྱེ་བྲག་ཡང་ཡིན། དངོས་པོའི་སྤྱིའི་བྱེ་བྲག་ཡིན་པའི་གཞི་མཐུན་པ་དེ་རང་ཉིད་ལྡོག་ཆོས་ཡིན་ཟེར་ན། རྟག་པའི་སྤྱིའི་བྱེ་བྲག་ཡང་ཡིན། དངོས་པོའི་སྤྱིའི་བྱེ་བྲག་ཡིན་པའི་གཞི་མཐུན་པ་ཆོས་ཅན། ཁྱོད་ཁྱོད་རང་ཡིན་པར་ཐལ། ཁྱོད་རང་ཉིད་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། རྟག་པའི་སྤྱིའི་བྱེ་བྲག་ཡང་ཡིན། དངོས་པོའི་སྤྱིའི་བྱེ་བྲག་ཡིན་པའི་གཞི་མཐུན་པ་ཆོས་ཅན། དངོས་པོའི་སྤྱིའི་བྱེ་བྲགཡིན་པར་ཐལ། རྟག་པའི་སྤྱིའི་བྱེ་བྲག་ཡང་ཡིན། དངོས་པོའི་སྤྱིའི་བྱེ་བྲག་ཡིན་པའི་གཞི་མཐུན་པ་ཡིན་པའི་ཕྱིར། རྟགས་ཁས། འདོད་ན། རྟག་པའི་སྤྱིའི་བྱེ་བྲག་ཡང་ཡིན། དངོས་པོའི་སྤྱིའི་བྱེ་བྲག་ཡིན་པའི་གཞི་མཐུན་པ་ཆོས་ཅན། དངོས་པོའི་སྤྱིའི་བྱེ་བྲག་མ་ཡིན་པར་ཐལ། དངོས་པོའི་སྤྱི་མ་ཡིན་པའི་ཕྱིར། མ་གྲུབ་ན། རྟག་པའི་སྤྱིའི་བྱེ་བྲག་ཡང་ཡིན། དངོས་པོའི་སྤྱིའི་བྱེ་བྲག་ཡིན་པའི་གཞི་མཐུན་པ་ཆོས་ཅན། དངོས་པོའི་སྤྱི་མ་ཡིན་པར་ཐལ། དངོས་པོ་ཁྱོད་ཀྱི་བྱེ་བྲག་མ་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། ཁྱོད་རྟག་པའི་སྤྱིའི་བྱེ་བྲག་ཡང་ཡིན། དངོས་པོའི་སྤྱིའི་བྱེ་བྲག་ཡིན་པའི་གཞི་མཐུན་པའི་བྱེ་བྲག་མ་ཡིན་པར་ཐལ། ཁྱོད་རྟག་པའི་སྤྱིའི་བྱེ་བྲག་ཡང་ཡིན། དངོས་པོའི་སྤྱིའི་བྱེ་བྲག་ཡིན་པའི་གཞི་མཐུན་པ་མ་ཡིན་པའི་ཕྱིར། རྟགས་སླ། །
རྩོམ་སྒྲིག་པ། བློ་བཟང་བཀྲ་ཤིས།