བསེ་བསྡུས་ལས་ཁྱབ་མཐའ་འགོད་ཚུལ་གྱི་རྣམ་བཞག
ཁྱབ་མཐའ་འགོད་ཚུལ་གྱི་རྣམ་བཞག་བཤད་པ་ལ།
ཁ་ཅིག་ན་རེ། ཀྭ་བུམ་གཉིས་ཡིན་ན། ཀྭ་བུམ་གཉིས་ཡིན་པས་ཁྱབ་ན། ཀྭ་བུམ་གཉིས་ཡིན་པས་ཁྱབ་ཟེར་ན། རི་བོང་རྭ་ཆོས་ཅན། ཀྭ་བུམ་གཉིས་ཡིན་པར་ཐལ། ཀྭ་བུམ་གཉིས་ཡིན་ན། ཀྭ་བུམ་གཉིས་ཡིན་པས་ཁྱབ་པའི་ཕྱིར། ཁྱབ་པ་ཁས། མ་གྲུབ་ན། རི་བོང་རྭ་ཆོས་ཅན། ཀྭ་བུམ་གཉིས་ཡིན་ན། ཀྭ་བུམ་གཉིས་ཡིན་པས་ཁྱབ་པར་ཐལ། ཀྭ་བུམ་གཉིས་ཡིན་ན་གང་དྲན་དྲན་ཡིན་པས་ཁྱབ་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཀྭ་བུམ་གཉིས་ཡིན་ན་གང་དྲན་དྲན་ཡིན་པས་ཁྱབ་པར་ཐལ། གང་ཟག་གི་བདག་མེད་ཡིན་པའི་ཕྱིར། རྩ་བར་འདོད་ན། རི་བོང་རྭ་ཆོས་ཅན། ཀྭ་བུམ་གཉིས་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར།
ཁ་ཅིག་ན་རེ། ཡོད་མེད་གང་རུང་ཡིན་ན། ཡོད་མེད་གང་རུང་ཡིན་ན་ཡོད་པ་ཡིན་པས་ཁྱབ་ཟེར་ན། རི་བོང་རྭ་ཆོས་ཅན། ཡོད་པ་ཡིན་པར་ཐལ། ཡོད་མེད་གང་རུང་ཡིན་ན། ཡོད་མེད་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། རི་བོང་རྭ་ཆོས་ཅན། ཡོད་མེད་གང་རུང་ཡིན་ན། ཡོད་མེད་གང་རུང་ཡིན་པར་ཐལ། ཡོད་མེད་གང་རུང་ཡིན་ན། ཡོད་མེད་གང་རུང་ཡིན་པས་ཁྱབ་པའི་ཕྱིར། མ་གྲུབ་ན། ཡོད་མེད་གང་རུང་ཆོས་ཅན། ཁྱོད་ཡིན་ན་ཁྱོད་ཡིན་པས་ཁྱབ་པར་ཐལ༑ ཁྱོད་གང་ཟག་གི་བདག་མེད་ཡིན་པའི་ཕྱིར། རྩ་བར་འདོད་མི་ནུས་ཏེ། མེད་པ་ཡིན་པའི་ཕྱིར།
ཁ་ཅིག་ན་རེ། ཡོད་མེད་གང་རུང་ཡིན་ན་ཡོད་མེད་གང་རུང་མ་ཡིན་པར་ཐལ། ཡོད་མེད་གང་རུང་ཡིན་ན་ཡོད་པ་མ་ཡིན་པ་གང་ཞིག ། ཡོད་མེད་གང་རུང་ཡིན་ན་མེད་པ་མ་ཡིན་པའི་ཕྱིར་ཟེར་ན་མ་ཁྱབ། འོ་ན། ཁྱོད་རང་ལ་ཡོད་མེད་གང་རུང་ཡིན་ན། ཡོད་མེད་གང་རུང་ཡིན་པས་མ་ཁྱབ་པར་ཐལ། ཡོད་མེད་གང་རུང་ཡིན་ན་ཡོད་པ་ཡིན་པས་མ་ཁྱབ་པ་གང་ཞིག ། ཡོད་མེད་གང་རུང་ཡིན་ན་མེད་པ་ཡིན་པས་མ་ཁྱབ་པའི་ཕྱིར། ཁྱབ་པ་འགྲིག །
ཁ་ཅིག་ན་རེ། ཡོད་མེད་གང་རུང་ཡིན་ན། མེད་པ་ཡིན་ཟེར་ན། ཡོད་མེད་གང་རུང་ཡིན་ན་མེ་དང་ཡིན་དགོས་པར་ཐལ། ཡོད་མེད་གང་རུང་ཡིན་ན་མེད་པ་ཡིན་པའི་ཕྱིར། རྟགས་ཁས། འདོད་ན། བུམ་པ་ཆོས་ཅན། མེད་པ་ཡིན་པར་ཐལ། ཡོད་མེད་གང་རུང་ཡིན་པའི་ཕྱིར། ཁྱབ་པ་ཁས།
ཁ་ཅིག་ན་རེ། རི་བོང་རྭ་ཡིན་ན། གང་དྲན་དྲན་ཡིན་པར་ཐལ། རི་བོང་རྭ་ཡིན་ན། གང་དྲན་དྲན་ཡིན་པས་ཁྱབ་པའི་ཕྱིར། ཁྱབ་པ་ཁས་ཟེར་ན། འདོད་བྱས་པ་ལ། རི་བོང་རྭ་ཡིན་ན་ཆོས་ཅན། གང་དྲན་དྲན་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར་ཟེར་ན། འདོད་བྱས་པ་ལ། དངོས་འགལ་དུ་འགྲོ་ཟེར་ན། མི་འགྲོ་སྟེ། རི་བོང་རྭ་ཡིན་ན་གང་དྲན་དྲན་ཡིན་པར་ཁས་བླངས་པས་རི་བོང་རྭ་ཡིན་ན་གང་དྲན་དྲན་མ་ཡིན་པར་ཁས་བླངས་ཆོག་པ་ཡིན་པའི་ཕྱིར། དེར་ཐལ། གང་དྲན་དྲན་བྱས་པའི་དོན་འཇོག་ཚུལ་ཡོད་པའི་ཕྱིར།
ཁ་ཅིག་ན་རེ། དུས་དང་རྣམ་པ་ཐམས་ཅད་དུ་ཡོད་མེད་གང་རུང་ཡིན་ན། དུས་དང་རྣམ་པ་ཐམས་ཅད་དུ་ཡོད་པ་ཡིན་པས་ཁྱབ་ཟེར་ན། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་ཡོད་པ་ཡིན་པར་ཐལ། དུས་དང་རྣམ་པར་ཐམས་ཅད་དུ་ཡོད་མེད་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་ཡོད་མེད་གང་རུང་ཡིན་པར་ཐལ། ཁྱོད་ཡོད་མེད་གང་རུང་མ་ཡིན་པའི་དུས་དང་རྣམ་པ་ཐམས་ཅད་མི་སྲིད་པའི་ཕྱིར། མ་གྲུབ་ན། བུམ་པ་ཡོད་མེད་གང་རུང་མ་ཡིན་པའི་དུས་དང་རྣམ་པ་ཐམས་ཅད་མི་གྲིད་པར་ཐལ། བུམ་པ་ཡོད་མེད་གང་རུང་མ་ཡིན་པའི་དུས་མི་སྲིད་པའི་ཕྱིར། མ་གྲུབ་ན། བུམ་པ་ཡོད་མེད་གང་རུང་མ་ཡིན་པའི་དུས་མི་སྲིད་པར་ཐལ། དུས་ཡིན་ན། བུམ་པ་ཡོད་མེད་གང་རུང་གི་དུས་ཡིན་པས་ཁྱབ་པའི་ཕྱིར། རྩ་བར་འདོད་ན། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་ཡོད་པ་མ་ཡིན་པར་ཐལ། དུས་ཐམས་ཅད་དུ་ཡོད་པ་མ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། དུས་ཐམས་ཅད་དུ་ཡོད་པ་མ་ཡིན་པར་ཐལ། རང་གི་རྒྱུ་དུས་སུ་ཡོད་པ་མ་ཡིན། རང་གི་འབྲས་བུའི་དུས་སུ་ཡོད་པ་མ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་རང་གི་རྒྱུ་དུས་དང་རང་གི་འབྲས་དུས་རེ་རེའི་ཚེ་ཡོད་པ་མ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར།
ཁ་ཅིག་ན་རེ། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་མེད་པ་ཡིན་པར་ཐལ། དུས་དང་རྣམ་པ་ཐམས་ཅད་དུ་ཡོད་མེད་གང་རུང་ཡིན་པ་གང་ཞིག ། དུས་དང་རྣམ་པ་ཐམས་ཅད་དུ་ཡོད་པ་མ་ཡིན་པའི་ཕྱིར་ཟེར་ན་མ་ཁྱབ། རྟགས་དང་པོ་མ་གྲུབ་ན། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་ཡོད་མེད་གང་རུང་ཡིན་པར་ཐལ། ཡོད་མེད་གང་རུང་ཡིན་པའི་ཕྱིར། རྩ་བར་འདོད་ན། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་མེད་པ་མ་ཡིན་པར་ཐལ། དུས་ཐམས་ཅད་དུ་མེད་པ་མ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། དུས་ཐམས་ཅད་དུ་མེད་པ་མ་ཡིན་པར་ཐལ། རང་དུས་སུ་༈ མེད་པ་མ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། རང་དུས་སུ་མེད་པ་མ་ཡིན་པར་ཐལ། གཞི་གྲུབ་པའི་ཕྱིར། །
རང་གི་ལུགས་ལ། ཡོད་པ་ཡིན་ན་རྟག་དངོས་གང་རུང་ཡིན་པས་ཁྱབ་ཅེས་པ་དང་། ཡོད་པ་ཡིན་ན་རྟག་དངོས་གང་རུང་ཡིན་དགོས་ཞེས་པ་དང་། ཡོད་པ་ཡིན་ན་རྟག་དངོས་གང་རུང་ཡིན་ཞེས་པ་རྣམས་ལ་ཁྱད་པར་མེད་དེ། ཁྱབ་མཐའི་མིང་གི་རྣམ་གྲངས་ཡིན་པའི་ཕྱིར། །
དེ་ལ་རྩོད་པ་སྤོང་པ་ལ། ཁ་ཅིག་ན་རེ། ཡོད་པ་ཡིན་ན། རྟག་དངོས་གང་རུང་ཡིན་པར་ཐལ། ཡོད་པ་ཡིན་ན་རྟག་དངོས་གང་རུང་ཡིན་པས་ཁྱབ་པ་གང་ཞིག ། དེ་གཉིས་ཁྱབ་མཐའི་མིང་གི་རྣམ་གྲངས་ཡིན་པའི་ཕྱིར། རྟགས་ཁས། འདོད་ན། ཡོད་པ་ཡིན་ན་ཆོས་ཅན། རྟག་དངོས་གང་རུང་མ་ཡིན་པར་ཐལ། རྟག་པ་མ་ཡིན་པ་གང་ཞིག ། དངོས་པོ་མ་ཡིན་པའི་ཕྱིར་ཟེར་ན་དེ་ལ་རྩོད་གཞི་སྐྱོན་ཅན་གྱི་ལན་འདེབས་པ་ཡིན་པའི་ཕྱིར། །
རྩོམ་སྒྲིག་པ། བློ་བཟང་བཀྲ་ཤིས།