བསེ་བསྡུས་ལས་ཁས་ལེན་སོང་ཚུལ་གྱི་རྣམ་བཞག
ཁས་ལེན་སོང་ཚུལ་གྱི་རྣམ་བཞག་བཤད་པ་ལ།
ཁ་ཅིག་ན་རེ། རྟག་དངོས་གཉིས་ཀྱི་ནང་ནས་དངོས་པོ་ཡིན་པར་ཁས་ལེན་ཟེར་ན། འོ་ན། ཁྱོད་དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར། རྟགས་ཁས། འདོད་ན། ཁྱོད་ཀྱི་རྒྱུ་ཁྱོད་ཀྱི་རྒྱུ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། འདོད་ན། ཁྱོད་ཀྱི་རྒྱུ་མེད་ན་ཁྱོད་མེད་དགོས་པར་ཐལ། ཁྱོད་ཀྱི་རྒྱུ་ཁྱོད་ཀྱི་རྒྱུ་ཡིན་པའི་ཕྱིར། འདོད་ན། ཤེས་བྱ་ཆོས་ཅན། ཁྱོད་མེད་པར་ཐལ། ཁྱོད་ཀྱི་རྒྱུ་མེད་པའི་ཕྱིར། ཁྱབ་པ་ཁས། མ་གྲུབ་ན། ཤེས་བྱ་ཆོས་ཅན། ཁྱོད་ཀྱི་རྒྱུ་མེད་པར་ཐལ། ཁྱོད་རྟག་པ་ཡིན་པའི་ཕྱིར། གོང་དུ་འདོད་མི་ནུས་ཏེ། གང་ཟག་གི་བདག་མེད་ཡིན་པའི་ཕྱིར།
ཁ་ཅིག་ན་རེ། ཁྱོད་རྟག་པ་ཡིན་ལ། རང་དངོས་པོ་ཡིན་ཟེར་ན། རང་གི་རྒྱུ་ཡོད་པར་ཐལ། རང་དངོས་པོ་ཡིན་པའི་ཕྱིར། འདོད་ན། རང་གི་རྒྱུ་མེད་ན་རང་མེད་དགོས་པར་ཐལ། རང་གི་རྒྱུ་ཡོད་པའི་ཕྱིར། འདོད་ན། ཡོད་པ་ཆོས་ཅན། རང་མེད་པར་ཐལ། རང་གི་རྒྱུ་མེད་པའི་ཕྱིར། ཁྱབ་པ་ཁས། མ་གྲུབ་ན། ཡོད་པ་ཆོས་ཅན། རང་གི་རྒྱུ་མེད་པར་ཐལ། རང་རྟག་པ་ཡིན་པའི་ཕྱིར།
ཁ་ཅིག་ན་རེ། ཤེས་བྱ་ཆོས་ཅན། རང་གི་རྒྱུ་ཡོད་པར་ཐལ། རང་ཡོད་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་རང་གི་རྒྱུ་ཡོད་པར་འདོད་ཅིས་རྩི་རིགས་ཟེར་ན། དེ་མི་རིགས་པར་ཐལ། དེ་ལ་འདོད་ལན་བཏབ་པས་ཤེས་བྱའི་རྒྱུ་ཡོད་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། མྱུ་གུ་ཆོས་ཅན། རང་གི་རྒྱུ་ཡོད་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་བས་མྱུ་གུའི་རྒྱུ་ཡོད་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། མྱུ་གུ་ཆོས་ཅན། རང་གི་རྒྱུ་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་མྱུ་གུ་མྱུ་གུའི་རྒྱུ་ལས་སྐྱེ་བ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། དངོས་པོ་ཡིན་ན་རང་གི་རྒྱུ་ལས་སྐྱེས་པ་ཡིན་པས་ཁྱབ་པའི་ཕྱིར།
ཁ་ཅིག་ན་རེ། དངོས་པོ་ཡིན་ན་རང་གི་རྒྱུ་ལས་སྐྱེས་པ་ཡིན་པས་མ་ཁྱབ་པར་ཐལ། བུམ་པ་ཆོས་ཅན། རང་གི་རྒྱུ་ལས་སྐྱེས་པ་ཡིན་པར་ཐལ༑ དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་མི་ཐེབས་པའི་ཕྱིར། དེར་ཐལ། དེ་ལ་འདོད་ལན་བཏབ་པས་བུམ་པའི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་གང་ཞིག ། བུམ་པའི་རྒྱུ་ལས་སྐྱེས་པ་མ་ཡིན་པའི་ཕྱིར༑ རྟགས་དང་པོ་མ་གྲུབ་ན། དེ་ལ་འདོད་ལན་བཏབ་པས་དེ་ལྟར་དུ་རྩི་རིགས་པ་ཡིན་པར་ཐལ། བུམ་པ་ཆོས་ཅན། རང་གི་ལྡོག་པ་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པའི་ལྡོགཔ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། རང་དང་གཅིག་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་དང་གཅིག་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། རང་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ་བུམ་པ་ཆོས་ཅན། ཁྱོད་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་ཡིན་པར་འདོད་ཅེས་རྩི་རིགས་ཞིང་འདོད་ལན་མི་ཐེབས་པ་དེ་ཡིན་པའི་ཕྱིར་ཟེར་ན་མ་ཁྱབ།
ཁ་ཅིག་ན་རེ། བུམ་པ་ཆོས་ཅན། ཁྱོད་ཀྱི་ལྡོག་པ་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པའི་ལྡོག་པ་ཡིན་པར་འདོད་ཅེས་རྩི་མི་རིགས་པར་ཐལ། དེ་ལ་འདོད་ལན་བཏབ་པས་བུམ་པ་བུམ་པའི་ལྡོག་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། ཁྱོད་ཀྱི་རྒྱུ་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་བུམ་པའི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། བདག་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་བུམ་པ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར་ཟེར་ན་མ་ཁྱབ། རྟགས་གྲུབ་པ་ཡིན་ཏེ། བུམ་པ་ཆོས་ཅན། བདག་སྐྱེས་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་བུམ་པ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། དངོས་པོ་ཡིན་ན་བདག་སྐྱེས་མ་ཡིན་པས་ཁྱབ་པའི་ཕྱིར།
ཁ་ཅིག་ན་རེ། བུམ་པ་ཆོས་ཅན། བདག་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་བུམ་པ་ལས་སྐྱེས་པ་ཡིན་པར་འདོད་ཅེས་རྩི་མི་རིགས་པར་ཐལ། དེ་ལ་འདོད་ལན་བཏབ་བས་བུམ་པ་བདག་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། བདག་ཡོད་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་རྩོད་གཞི་ཆད་ནས་བདག་ཡོད་པར་འདོད་ཅེས་རྩི་རིགས་པ་ཡིན་པའི་ཕྱིར་ཟེར་ན་མ་ཁྱབ། རྟགས་གྲུབ་པ་ཡིན་ཏེ། བུམ་པ་ཆོས་ཅན། གང་ཟག་ཡོད་པར་ཐལ། བདག་མེད་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་རྩོད་གཞི་ཆད་ནས་གང་ཟག་ཡོད་པར་འདོད་ཅེས་རྩི་རིགས་པ་གང་ཞིག ། བདག་དང་ང་དང་གང་ཟག་གསུམ་དོན་གཅིག་ཡིན་པའི་ཕྱིར།
ཁ་ཅིག་ན་རེ། བུམ་པ་ཆོས་ཅན། བདག་ཉིད་ཡོད་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བདག་ཉིད་ཡོད་པར་འདོད་ཅེས་རྩི་རིགས་པར་ཐལ། བུམ་པ་ཆོས་ཅན། བདག་ཡོད་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བདག་ཡོད་པར་འདོད་ཅེས་རྩི་རིགས་པ་ཡིན་པའི་ཕྱིར་ཟེར་ན་མ་ཁྱབ། འདོད་མི་ནུས་ཏེ། དེ་ལ་འདོད་ལན་བཏབ་པས་བུམ་པ་ཡོད་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། བདག་ཉིད་ཀྱི་ལྡོག་པ་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་བུམ་པའི་ལྡོག་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། བདག་ཉིད་ཀྱི་རྒྱུ་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་པ་ལ་འདོད་ལན་བཏབ་པས་བུམ་པ་བུམ་པའི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར།
ཁ་ཅིག་ན་རེ། བདག་གི་འབྲས་བུ་ཆོས་ཅན། བདག་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཟེར་ན་མ་ཁྱབ། འདོད་མི་ནུས་ཏེ། དེ་ལ་འདོད་ལན་བཏབ་པས་བདག་གི་འབྲས་བུ་བདག་གི་འབྲས་བུ་ལས་སྐྱེས་པ་ཡིན་པར་འདོད་ཅེས་རྩི་རིགས་ཞིང་འདོད་ལན་མི་ཐེབས་པ་དེ་ཡིན་པའི་ཕྱིར། ཁ་ཅིག་ན་རེ། བདག་ཆོས་ཅན༑ ཁྱོད་ཀྱི་འབྲས་བུ་ཁྱོད་ལས་སྐྱེས་པ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར་ཟེར་ན་འདོད་ལན་ཐེབས་པ་ཡིན་ཏེ། རྩི་པའི་ཚེ་ན་བདག་དེའི་འབྲས་བུ་བདག་དེ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། གཟུགས་ཆོས་ཅན། ཁྱོད་ཀྱི་འབྲས་བུ་ཁྱོད་ལས་སྐྱེས་པ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་གཟུགས་དེའི་འབྲས་བུ་གཟུགས་དེ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་གང་ཞིག ། དེའི་རིགས་འགྲོས་ཀྱིས་ཤེས་པའི་ཕྱིར།
ཁ་ཅིག་ན་རེ། དངོས་པོ་ཡིན་པར་ཐལ། བུམ་པ་དང་དངོས་པོ་གང་རུང་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་དང་དངོས་པོ་གང་རུང་ཡིན་པར་ཐལ། དངོས་པོ་ཡིན་པའི་ཕྱིར་ཟེར་ན་མ་ཁྱབ། དངོས་པོ་ཡིན་ན་ཁྱོད་དང་དངོས་པོ་གང་རུང་ཡིན་པས་མ་ཁྱབ་པའི་ཕྱིར། རྟགས་མ་གྲུབ་ཀྱི་ལན་མི་ཐེབ་པ་ཡིན་ཏེ། དེ་ལ་རྟགས་མ་གྲུབ་ཀྱི་ལན་བཏབ་པས་བུམ་པ་དངོས་པོ་ཡིན་པར་རྟགས་མ་གྲུབ་ཅེས་རྩི་དགོས་ཞིང་། བུམ་པ་དངོས་པོ་ཡིན་པའི་ཕྱིར།
ཁ་ཅིག་ན་རེ། དངོས་པོ་ཡིན་པར་ཐལ། བུམ་པ་དང་གཅིག་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་དང་གཅིག་ཡིན་པར་ཐལ། བུམ་པ་དང་གཅིག་ཡིན་པ་གང་ཞིག ། བུམ་པ་དང་གཅིག་ཡིན་ན་ཁྱོད་དང་གཅིག་ཡིན་དགོས་པའི་ཕྱིར་ཟེར་ན་མ་ཁྱབ། དེ་ལ་རྟགས་མ་གྲུབ་ཀྱི་ལན་མི་ཐེབས་པ་ཡིན་ཏེ། དེ་ལ་རྟགས་དང་པོ་མ་གྲུབ་ཀྱི་ལན་ཡང་མི་ཐེབས། གཉིས་པ་མ་གྲུབ་ཀྱི་ལན་ཡང་མི་ཐེབས། བསྡོམས་རྟགས་མ་གྲུབ་ཀྱི་ལན་ཡང་མི་ཐེབས་པ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་དང་གཅིག་ཡིན་པར་ཐལ། བུམ་པ་དང་གཅིག་ཡིན་པ་གང་ཞིག ། བུམ་པ་དང་གཅིག་ཡིན་ན་ཁྱོད་དང་གཅིག་ཡིན་དགོས་པའི་ཕྱིར་ཞེས་པའི་ཐལ་འགྱུར་འདིའི་རྟགས་དང་པོ་མ་གྲུབ་ཀྱི་ལན་མི་ཐེབས་པ་ཡིན་ཏེ། དེ་ལ་རྟགས་དང་པོ་མ་གྲུབ་ཀྱི་ལན་བཏབ་བས་བུམ་པ་བུམ་པ་དང་གཅིག་ཡིན་པར་རྟགས་མ་གྲུབ་ཅེས་རྩི་རིགས་དགོས་ཤིང་། བུམ་པ་བུམ་པ་དང་གཅིག་ཡིན་པའི་ཕྱིར། དེ་འདྲ་བའི་ཐལ་འགྱུར་གྱི་རྟགས་གཉིས་པ་མ་གྲུབ་ཀྱི་ལན་མི་ཐེབས་པ་ཡིན་ཏེ། དེ་ལ་རྟགས་གཉིས་པ་མ་གྲུབ་ཀྱི་ལན་བཏབ་པས་བུམ་པ་དང་གཅིག་ཡིན་ན་བུམ་པ་དང་གཅིག་ཡིན་པར་རྟགས་མ་གྲུབ་ཅེས་རྩི་དགོས་ཞིང་། བུམ་པ་དང་གཅིག་ཡིན་ན་བུམ་པ་དང་གཅིག་ཡིན་དགོས་པའི་ཕྱིར། དེ་ལ་བསྡོམས་རྟགས་མ་གྲུབ་ཀྱི་ལན་མི་ཐེབས་པ་ཡིན་ཏེ། དེ་ལ་བསྡོམས་རྟགས་མ་གྲུབ་ཀྱི་ལན་བཏབ་པས་བུམ་པ་བུམ་པ་དང་གཅིག་ཡིན་པ་གང་ཞིག ། བུམ་པ་དང་གཅིག་ཡིན་ན་བུམ་པ་དང་གཅིག་ཡིན་དགོས་པར་རྟགས་མ་གྲུབ་ཅེས་རྩི་དགོས་ཤིང་བུམ་པ་བུམ་པ་དང་གཅིག་ཡིན་པ་གང་ཞིག ། བུམ་པ་དང་གཅིག་ཡིན་ན། བུམ་པ་དང་གཅིག་ཡིན་དགོས་པའི་ཕྱིར།
ཁ་ཅིག་ན་རེ། ཁྱོད་ཀྱིས་དེའི་རྟགས་ཕྱི་མ་མ་གྲུབ་ཀྱི་ལན་འདེབས་ཚུལ་དེ་མི་འཐད་པ་ཡིན་པར་ཐལ། དེའི་རྟགས་ཕྱི་མ་མ་གྲུབ་ཀྱི་ལན་བཏབ་པས་བུམ་པ་བུམ་པ་དང་གཅིག་ཡིན་ན་བུམ་པ་དང་གཅིག་ཡིན་དགོས་པར་རྟགས་མ་གྲུབ་ཅེས་རྩི་དགོས་ཤིང་། དེ་ལྟར་དུ་རྟགས་མ་གྲུབ་ཀྱི་ལན་ཡང་ཐེབས་པའི་ཕྱིར་ཟེར་ན། འོ་ན། ཁྱོད་རང་ལ་བུམ་པ་ཆོས་ཅན། བུམ་པ་དང་གཅིག་ཡིན་ན་ཁྱོད་དང་གཅིག་ཡིན་དགོས་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་བུམ་པ་དང་གཅིག་ཡིན་ན། བུམ་པ་དང་གཅིག་ཡིན་དགོས་པར་འདོད་ཅེས་རྩི་རིགས་པར་ཐལ། ཁྱོད་ཀྱིས་དེའི་རྟགས་ཕྱི་མ་མ་གྲུབ་ཀྱི་ལན་འདེབས་ཚུལ་འཐད་པའི་ཕྱིར། འདོད་མི་ནུས་ཏེ། དེ་ལ་འདོད་ལན་བཏབ་པས་བུམ་པ་དང་གཅིག་ཡིན་ན་བུམ་པ་དང་གཅིག་ཡིན་དགོས་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། བུམ་པ་དང་གཅིག་ཡིན་ན། ཁྱོད་དང་གཅིག་ཡིན་པས་ཁྱབ་པ་ཡོད་པར་ཐལ། བདག་མེད་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་དང་གཅིག་ཡིན་ན་བུམ་པ་དང་གཅིག་ཡིན་པས་ཁྱབ་པ་ཡོད་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པ་ཆོས་ཅན། བུམ་པ་ཡིན་ན་བུམ་པ་ཡིན་པས་ཁྱབ་པ་ཡོད་པར་ཐལ། བདག་མེད་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པ་ཡིན་ན་བུམ་པ་ཡིན་པས་ཁྱབ་པ་ཡོད་པར་འདོད་ཅེས་རྩི་རིགས་པ་གང་ཞིག ། དེའི་རིགས་འགྲོས་ཀྱིས་ཤེས་པའི་ཕྱིར།
ཁ་ཅིག་ན་རེ། དངོས་པོ་ཡིན་པར་ཐལ། སྒྲ་ཆོས་ཅན་གྱི་སྟེང་དུ་དངོས་པོ་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། སྒྲ་ཆོས་ཅན། ཁྱོད་ཆོས་ཅན་གྱི་སྟེང་དུ་དངོས་པོ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། མ་ཁྱབ་ཟེར་ན་སྒྲ་ཆོས་ཅན། ཁྱོད་དངོས་པོ་ཡིན་ན་ཁྱོད་ཆོས་ཅན་གྱི་སྟེང་དུ་དངོས་པོ་ཡིན་པས་ཁྱབ་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། ཁ་ཅིག་ན་རེ། དངོས་པོ་ཡིན་པར་ཐལ། ཀྭ་བུམ་གཉིས་མ་ཡིན་པ་དང་དངོས་པོ་གཉིས་ཀ་ཡིན་པའི་ཕྱིར། མ་གྲུབ་ན། ཀྭ་བུམ་གཉིས་མ་ཡིན་པ་དང་དངོས་པོ་གཉིས་ཀ་ཡིན་པར་ཐལ། ཀྭ་བུམ་གཉིས་མ་ཡིན་པར་གྱུར་པའི་དངོས་པོ་ཡིན་པའི་ཕྱིར། མ་གྲུབ་ན། ཀྭ་བུམ་གཉིས་ཆོས་ཅན༑ མ་ཡིན་པར་གྱུར་པའི་དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར་ཟེར་ན་མ་ཁྱབ།
བྱས་པ་ལ་ཁོ་ན་རེ། ཀྭ་བུམ་གཉིས་མ་ཡིན་པ་དང་དངོས་པོ་གཉིས་ཀ་ཡིན་པར་ཐལ། ཀྭ་བུམ་གཉིས་མ་ཡིན་པ་དང་དངོས་པོ་གཉིས་ཀའི་གཞི་མཐུན་ཡིན་པའི་ཕྱིར། དེར་ཐལ། མ་ཡིན་པ་དང་དངོས་པོ་གཉིས་ཀའི་གཞི་མཐུན་ཡོད་པའི་ཕྱིར་ཟེར་ན་མ་ཁྱབ། རྟགས་གྲུབ་པ་ཡིན་ཏེ། ས་སེར་པོ་དེ་ཡིན་པའི་ཕྱིར། རྩ་བར་འདོད་ན། ཀྭ་བུམ་གཉིས་མ་ཡིན་པ་དང་དངོས་པོ་གཉིས་ཀ་མ་ཡིན་པར་ཐལ། ཀྭ་བུམ་གཉིས་མ་ཡིན་པ་དང་རྟག་པ་གཉིས་ཀ་ཡིན་པའི་ཕྱིར། མ་གྲུབ་ན། ཀྭ་བུམ་གཉིས་མ་ཡིན་པ་དང་རྟག་པ་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རྟག་པ་ཡིན་ན་ཀྭ་བུམ་གཉིས་མ་ཡིན་པ་དང་རྟག་པ་གཉིས་ཀ་ཡིན་པས་ཁྱབ་པའི་ཕྱིར། མ་གྲུབ་ན། རྟག་པ་ཡིན་ན་ཀྭ་བུམ་གཉིས་མ་ཡིན་པ་དང་། རྟག་པ་གཉིས་ཀ་ཡིན་པས་ཁྱབ་པར་ཐལ། རྟག་པ་ཡིན་ན་དངོས་པོ་མ་ཡིན་པ་དང་རྟག་པ་གཉིས་ཀ་ཡིན་པས་ཁྱབ་པའི་ཕྱིར། མ་གྲུབ་ན། རྟག་པ་ཡིན་ན་དངོས་པོ་མ་ཡིན་པ་དང་རྟག་པ་གཉིས་ཀ་ཡིན་པས་ཁྱབ་པར་ཐལ། རྟག་པ་ཡིན་ན་དངོས་པོ་མ་ཡིན་པ་དང་རྟག་པ་གཉིས་ཀའི་གཞི་མཐུན་ཡིན་པས་ཁྱབ་པའི་ཕྱིར། མ་གྲུབ་ན། དངོས་པོ་མ་ཡིན་པ་དང་། རྟགཔ་གཉིས་ཀ་ཆོས་ཅན། འགལ་བ་ཡིན་པར་ཐལ། ཐ་དད་ཅིང་གཞི་མཐུན་མི་སྲིད་པ་ཡིན་པའི་ཕྱིར། རྟགས་རེ་རེ་ནས་ཁས། འདོད་ན། དངོས་པོ་མ་ཡིན་པ་དང་རྟག་པ་གཉིས་ཀ་ཆོས་ཅན། བདག་མེད་ཡིན་ན་ཁྱོད་མ་ཡིན་པས་ཁྱབ་པར་ཐལ། ཁྱོད་ཕན་ཚུན་ཐ་དད་ཅིང་གཞི་མཐུན་མི་སྲིད་པ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། རྟག་པ་ཡིན་ན་ཁྱོད་གཉིས་ཀ་ཡིན་པས་ཁྱབ་པའི་ཕྱིར།
ཁ་ཅིག་ན་རེ། ཀྭ་བུམ་གཉིས་ཡོད་པ་དང་དངོས་པོ་གཉིས་ཀ་ཡིན་པར་ཁས་བླང་བས་ཀྭ་བུམ་གཉིས་དེ་མ་སོང་བ་ཡིན་པར་ཐལ། དེ་ལྟར་དུ་ཁས་བླང་བས་སྤྱིར་སོང་བ་ཡིན་པའི་ཕྱིར་ཟེར་ན། དེ་མི་འཐད་པ་ཡིན་པར་ཐལ། ཀྭ་བུམ་གཉིས་ཡོད་པ་དང་དངོས་པོ་གཉིས་ཀ་ཡིན་པར་ཁས་བླངས་པས་སྤྱིར་མ་སོང་བར་ཀྭ་བུམ་གཉིས་དེ་སོང་བ་ཡིན་པའི་ཕྱིར། དེར་ཐལ། ཀྭ་བུམ་གཉིས་ཡོད་པ་དང་དངོས་པོ་གཉིས་ཀ་ཡིན་པར་ཁས་བླང་བས་ཡོད་པ་དང་དངོས་པོ་གཉིས་ཀའི་ཡིན་པ་ལ་ཀྭ་བུམ་གཉིས་དེ་འཇོག་པར་ཁས་བླངས་སོང་བ་ཡིན་པའི་ཕྱིར། དེར་ཐལ། རི་བོང་རྭ་མེད་པ་དང་ཚད་མས་མི་དམིགས་པ་གཉིས་ཀ་ཡིན་པར་ཁས་བླང་བས་མེད་པ་དང་ཚད་མས་མི་དམིགས་པ་གཉིས་ལ་རི་བོང་རྭ་དེ་འཇོག་པར་ཁས་བླང་སོང་བ་ཡིན་པ་གང་ཞིག ། དེའི་རིགས་འགྲོས་ཀྱིས་ཤེས་པའི་ཕྱིར།
ཁ་ཅིག་ན་རེ། རྟག་པ་མ་ཡིན་པར་ཐལ། རྟག་པར་རྟོགས་པའི་ཚད་མ་མེད་པའི་ཕྱིར། མ་གྲུབ་ན། རྟག་པར་རྟོགས་པའི་ཚད་མ་མེད་པར་ཐལ། རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་མ་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་མ་ཡིན་པར་ཐལ། རྟག་པར་རྟོགས་པའི་ཚད་མ་རྟག་དངོས་གང་རུང་དང་རྟག་པ་གཉིས་ཀ་མ་ཡིན་པའི་ཕྱིར། མ་གྲུབ་ན། རྟག་པར་རྟོགས་པའི་ཚད་མ་རྟག་དངོས་གང་རུང་དང་རྟག་པ་གཉིས་ཀ་མ་ཡིན་པར་ཐལ། རྟག་པར་རྟོགས་པའི་ཚད་མ་དངོས་པོ་དང་རྟག་པ་གཉིས་ཀ་མ་ཡིན་པ་གང་ཞིག ། རྟག་པར་རྟོགས་པའི་ཚད་མ་རྟག་པ་དང་རྟག་པ་གཉིས་ཀ་མ་ཡིན་པའི་ཕྱིར། རྟགས་དང་པོ་མ་གྲུབ་ན། རྟག་པར་རྟོགས་པའི་ཚད་མ་ཆོས་ཅན། དངོས་པོ་དང་རྟག་པ་གཉིས་ཀ་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར། རྟགས་གཉིས་པ་མ་གྲུབ་ན། རྟག་པར་རྟོགས་པའི་ཚད་མ་ཆོས་ཅན། རྟག་པ་དང་རྟག་པ་གཉིས་ཀ་མ་ཡིན་པར་ཐལ། རྟག་པ་མ་ཡིན་པའི་ཕྱིར། མ་གྲུབ་ན། རྟག་པར་རྟོགས་པའི་ཚད་མ་ཆོས་ཅན། རྟག་པ་མ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། རྟག་པར་རྟོགས་པའི་ཚད་མ་ཆོས་ཅན། དངོས་པོ་ཡིན་པར་ཐལ། ཚད་མ་ཡིན་པའི་ཕྱིར།
ཁ་ཅིག་ན་རེ། རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་ཐལ། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པའི་ཕྱིར། མ་གྲུབ་ན། ཤེས་བྱ་ཆོས་ཅན། རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར་ཟེར་ན་འགལ་ཁྱབ་ལ་འབུད་རིགས་པ་ཡིན་ཏེ། རྟག་པ་ཡིན་ན་རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཡིན་པས་ཁྱབ་པའི་ཕྱིར། དེར་ཐལ། ཤེས་བྱ་རྟག་པར་རྟ་བོས་བའི་ཚད་མ་ཡོད་པ་དང་དངོས་པོ་གཉིས་ཀ་ཡིན་པའི་ཕྱིར། མ་གྲུབ་ན། ཤེས་བྱ་རྟགཔར་རྟོགས་པའི་ཚད་མ་ཆོས་ཅན། ཡོད་པ་དང་དངོས་པོ་གཉིས་ཀ་ཡིན་པར་ཐལ། རྟག་དངོས་གང་རུང་དང་དངོས་པོ་གཉིས་ཀ་ཡིན་པའི་ཕྱིར། མ་གྲུབ་ན། ཤེས་བྱ་རྟག་པར་རྟོགས་པའི་ཚད་མ་ཆོས་ཅན། རྟག་དངོས་གང་རུང་དང་དངོས་པོ་གཉིས་ཀ་ཡིན་པར་ཐལ། རྟག་དངོས་གང་རུང་དང་དངོས་པོ་གཉིས་ཀའི་གཞི་མཐུན་ཡིན་པའི་ཕྱིར། མ་གྲུབ་ན། ཤེས་བྱ་རྟག་པར་རྟོགས་པའི་ཚད་མ་ཆོས་ཅན། རྟག་དངོས་གང་རུང་དང་དངོས་པོ་གཉིས་ཀའི་གཞི་མཐུན་ཡིན་པར་ཐལ། དངོས་པོ་ཡིན་པའི་ཕྱིར།
ཁ་ཅིག་ན་རེ། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་ཐལ། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་ཁས་བླང་བས་ཤེས་བྱ་རྟག་པར་རྟོགས་པའི་ཚད་མ་དེ་སོང་བ་མ་ཡིན་པའི་ཕྱིར། དེར་ཐལ། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་ཁས་བླང་བས་ཤེས་བྱ་དེ་སོང་བ་ཡིན་པའི་ཕྱིར། དེར་ཐལ། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་ཁས་བླང་བས་རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀའི་གཞི་མཐུན་དུ་ཤེས་བྱ་དེ་འཇོག་པར་ཁས་བླང་སོང་བ་ཡིན་པའི་ཕྱིར། དེར་ཐལ། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པར་རྟོགས་པའི་ཚད་མའི་དགག་གཞི་གཉིས་ཀ་ཡིན་པར་ཁས་བླང་བས་རྟག་པར་རྟོགས་པའི་ཚད་མ་ཡོད་པ་དང་རྟག་པར་རྟོགས་པའི་ཚད་མའི་དགག་གཞི་གཉིས་ལ་ཤེས་བྱ་དེ་འཇོག་པར་ཁས་བླང་སོང་བ་ཡིན་པའི་ཕྱིར་ཟེར་ན་ཁ་ཅིག་མ་ཁྱབ་ཟེར།
ཁ་ཅིག་ན་རེ། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་ཞེས་ཁས་བླང་བ་འདི་དང་ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པར་རྟོགས་པའི་ཚད་མའི་དགག་གཞི་གཉིས་ཀ་ཡིན་ཞེས་ཁས་བླང་བ་འདི་གཉིས་ཀྱི་ཁས་ལེན་སོང་ཚུལ་མི་འདྲ་བ་ཡིན་པར་ཐལ། ཤེས་བྱ་ཆོས་ཅན། རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་ཐལ། ཞེས་འཕང་བའི་ཚེ་གང་བཀོད་པ་ལྟར་ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་འདོད་ཅེས་རྩི་དགོས་ལ། ཤེས་བྱ་ཆོས་ཅན། རྟག་པར་རྟོགས་པའི་ཚད་མ་ཡོད་པ་དང་རྟག་པར་རྟོགས་པའི་ཚད་མའི་དགག་གཞི་གཉིས་ཀ་ཡིན་པར་ཐལ། ཞེས་འཕང་བའི་ཚེ་ན་ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་ཤེས་བྱ་རྟག་པར་རྟོགས་པའི་ཚད་མའི་དགག་གཞི་གཉིས་ཀ་ཡིན་པར་འདོད་ཅེས་རྩི་དགོས་པའི་ཕྱིར་ན་འདིར་མ་ཁྱབ། རྟགས་དང་པོ་མ་གྲུབ་ན། དེ་ལ་འདོད་ལན་བཏབས་པས་དེ་ལྟར་དུ་རྩི་རིགས་པར་ཐལ། ཤེས་བྱ་ཆོས་ཅན། རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། ཤེས་བྱ་ཆོས་ཅན༑ རྟག་པ་དང་རྟག་པ་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་ཤེས་བྱ་རྟག་པ་དང་རྟག་པ་གཉིས་ཀ་ཡིན་པར་འདོད་ཅེས་རྩི་རིགས་པ་གང་ཞིག ། དེའི་རིགས་འགྲོས་ཀྱིས་ཤེས་པའི་ཕྱིར། རྟགས་གཉིས་པ་མ་གྲུབ་ན། ཤེས་བྱ་ཆོས་ཅན། རྟག་པར་རྟོགས་པའི་ཚད་མ་ཡོད་པ་དང་རྟག་པར་རྟོགས་པའི་ཚད་མའི་དགག་གཞི་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་བས་ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་ཤེས་བྱ་རྟག་པར་རྟོགས་པའི་ཚད་མའི་དགག་གཞི་གཉིས་ཀ་ཡིན་པར་འདོད་ཅེས་རྩི་རིགས་པ་ཡིན་པར་ཐལ། ཤེས་བྱ་ཆོས་ཅན། དངོས་པོར་རྟོགས་པའི་ཚད་མའི་དགག་གཞི་དང་དངོས་པོར་རྟོགས་པའི་ཚད་མའི་དགག་གཞི་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་ཤེས་བྱ་ཤེས་བྱ་དངོས་པོར་རྟོགས་པའི་ཚད་མའི་དགག་གཞི་དང་ཤེས་བྱ་དངོས་པོར་རྟོགས་པའི་ཚད་མའི་དགག་གཞི་གཉིས་ཀ་ཡིན་པར་འདོད་ཅེས་རྩི་རིགས་པ་གང་ཞིག ། དེ་གཉིས་ཀྱི་རྩི་ཚུལ་ལ་མི་འདྲ་བའི་ཁྱད་པར་མེད་པའི་ཕྱིར།
ཁ་ཅིག་ན་རེ། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་མ་ཡིན་པར་ཐལ། ཤེས་བྱ་རྟགཔར་རྟོགས་པའི་ཚད་མ་ཡོད་པ་དང་དངོས་པོར་རྟོགས་པའི་ཚད་མ་ཡོད་པ་གཉིས་ཀ་མ་ཡིན་པའི་ཕྱིར། མ་གྲུབ་ན། ཤེས་བྱ་ཆོས་ཅན། རྟག་པར་རྟོགས་པའི་ཚད་མ་ཡོད་པ་དང་དངོས་པོར་རྟོགས་པའི་ཚད་མ་ཡོད་པ་གཉིས་ཀ་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར་ཟེར་ན་མ་ཁྱབ།
ཁ་ཅིག་ན་རེ། བདག་མེད་ཡིན་ན་རྟག་པར་རྟོགས་པའི་ཚད་མ་ཡོད་པ་དང་དངོས་པོར་རྟོགས་པའི་ཚད་མ་ཡོད་པ་གཉིས་ཀ་མ་ཡིན་པས་ཁྱབ་པར་ཐལ། བདག་མེད་ཡིན་ན་དངོས་པོར་རྟོགས་པའི་ཚད་མ་ཡོད་པ་དང་རྟག་པར་རྟོགས་པའི་ཚད་མ་ཡོད་པ་གཉིས་ཀ་མ་ཡིན་པས་ཁྱབ་པའི་ཕྱིར་ཟེར་ན་མ་ཁྱབ། རྟགས་གྲུབ་སྟེ། བདག་མེད་ཡིན་ན་དངོས་པོ་དང་རྟག་པ་གཉིས་ཀ་མ་ཡིན་པས་ཁྱབ་པའི་ཕྱིར།
ཁ་ཅིག་ན་རེ། རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་མ་ཡིན་པར་ཐལ། རྟག་པར་རྟོགས་པའི་ཚད་མ་ཡོད་པ་དང་རྟག་པར་རྟོགས་པའི་ཚད་མ་མེད་པ་གཉིས་ཀ་མ་ཡིན་པའི་ཕྱིར། མ་གྲུབ་ན། རྟག་པར་རྟོགས་པའི་ཚད་མ་ཆོས་ཅན། ཁྱོད་ཡོད་པ་དང་ཁྱོད་མེད་པ་གཉིས་ཀ་མ་ཡིན་པར་ཐལ། བདག་མེད་ཡིན་པའི་ཕྱིར་ཟེར་ན་མ་ཁྱབ། བདག་མེད་ཡིན་ན་ཁྱོད་ཡོད་པ་དང་ཁྱོད་མེད་པ་གཉིས་ཀ་མ་ཡིན་པས་མ་ཁྱབ་ཀྱང་། བདག་མེད་ཡིན་ན་ཡོད་པ་དང་མེད་པ་གཉིས་ཀ་མ་ཡིན་པས་ཁྱབ་ཅེས་ཁས་ལེན་དགོས་པ་དེ་ཡིན་པའི་ཕྱིར།
ཁ་ཅིག་ན་རེ། རྟག་པ་མ་ཡིན་པར་ཐལ། ཡིན་པར་གྱུར་པའི་རྟག་པ་དང་མ་ཡིན་པར་གྱུར་པའི་རྟག་པ་གང་རུང་མ་ཡིན་པའི་ཕྱིར། མ་གྲུབ་ན། ཡིན་པར་གྱུར་པའི་རྟག་པ་དང་མ་ཡིན་པར་གྱུར་པའི་རྟག་པ་གང་རུང་མ་ཡིན་པར་ཐལ། ཡིན་པར་གྱུར་པའི་རྟག་པ་མ་ཡིན་པ་གང་ཞིག ། མ་ཡིན་པར་གྱུར་པའི་རྟག་པ་མ་ཡིན་པའི་ཕྱིར་ཟེར་ན། རང་ལུགས་ལ། རྟགས་ཕྱི་མ་མ་གྲུབ་ཀྱི་ལན་འདེབས། བྱས་པ་ལ་ཁོ་ན་རེ། མ་ཡིན་པར་གྱུར་པའི་རྟག་པ་མ་ཡིན་པར་ཐལ། ཡིན་པར་གྱུར་པའི་རྟག་པ་ཡིན་པའི་ཕྱིར། མ་གྲུབ་ན། ཡིན་པར་གྱུར་པའི་རྟག་པ་ཡིན་པར་ཐལ། ཡིན་པ་དང་རྟག་པ་གཉིས་ཀ་ཡིན་པའི་ཕྱིར། མ་གྲུབ་ན། ཡིན་པ་དང་རྟག་པ་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར་ཟེར་ན་མ་ཁྱབ།
ཁ་ཅིག་ན་རེ། མ་ཡིན་པར་གྱུར་པའི་རྟག་པ་ཡིན་ན་རྟག་པ་ཡིན་པས་ཁྱབ་པར་ཐལ། མ་ཡིན་པར་གྱུར་པའི་རྟག་པ་ཡིན་པའི་ཕྱིར་ཟེར་ན་མ་ཁྱབ། འདོད་ན། དངོས་པོ་ཆོས་ཅན། རྟག་པ་ཡིན་པར་ཐལ། མ་ཡིན་པར་གྱུར་པའི་རྟག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དངོས་པོ་མ་ཡིན་པར་གྱུར་པའི་རྟག་པ་ཡིན་པར་ཐལ། དངོས་པོ་མ་ཡིན་པ་དང་རྟག་པ་གཉིས་ཀ་ཡིན་པའི་ཕྱིར། མ་གྲུབ་ན། དངོས་པོ་མ་ཡིན་པ་དང་རྟག་པ་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར།
ཁ་ཅིག་ན་རེ། ཡིན་པར་གྱུར་པའི་རྟག་པ་ཡིན་པར་ཐལ། ཡིན་པ་ཡིན་པའི་ཕྱིར་ཟེར་ན་འོ་ན། མ་ཡིན་པ་མ་ཡིན་པར་ཐལ། ཡིན་པ་ཡིན་པའི་ཕྱིར། རྟགས་ཁས། འདོད་ན། མ་ཡིན་པ་མ་ཡིན་པ་དང་། ཡིན་པ་གཉིས་ཀ་ཡིན་པར་ཐལ། མ་ཡིན་པ་མ་ཡིན་པ་གང་ཞིག ། ཡིན་པ་ཡིན་པའི་ཕྱིར། རྟགས་རེ་རེ་ནས་ཁས། འདོད་ན། མ་ཡིན་པ་ཆོས་ཅན། མ་ཡིན་པ་དང་ཡིན་པ་གཉིས་ཀ་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར།
ཁ་ཅིགན་རེ། ཡིན་པ་ཡིན་པར་ཐལ། ཡིན་མིན་གང་རུང་གང་ཞིག ། མ་ཡིན་པ་མ་ཡིན་པའི་ཕྱིར་ཟེར་ན། རང་ལུགས་ལ་རྟགས་ཕྱི་མ་མ་གྲུབ། བྱས་པ་ལ་ཁོ་ན་རེ། མ་ཡིན་པ་མ་ཡིན་པ་དང་། མ་ཡིན་པ་ཡིན་པ་གཉིས་ཀ་ཡིན་པར་ཐལ། མ་ཡིན་པ་ཡིན་པའི་ཕྱིར་ཟེར་ན་མ་ཁྱབ། འདོད་ན། མ་ཡིན་པ་ཡིན་པ་དང་མ་ཡིན་པ་ཡིན་པ་གཉིས་ཀ་མ་ཡིན་པར་ཐལ། མ་ཡིན་པ་ཡིན་པ་དང་། མ་ཡིན་པ་མ་ཡིན་པ་གཉིས་ཀ་ཡིན་པའི་ཕྱིར། མ་གྲུབ་ན། མ་ཡིན་པ་ཆོས་ཅན། ཁྱོད་ཡིན་པ་དང་མ་ཡིན་པ་མ་ཡིན་པ་གཉིས་ཀ་ཡིན་པར་ཐལ། ཁྱོད་ཡིན་པ་ཡིན་པའི་ཕྱིར།
རང་གི་ལུགས་ལ། ཁས་ལེན་སོང་ཚུལ་ཡོད་དེ། ཡོད་མེད་གཉིས་ཀྱི་ནང་གི་ཡོད་པ་དང་སྤྱི་དང་བྱེ་བྲག་གཉིས་ཀྱི་ནང་གི་བྱེ་བྲག་དང་། རྟག་མི་རྟག་གཉིས་ཀྱི་ནང་གི་རྟག་པ་དང་། ཡིན་མིན་གཉིས་ཀྱི་ནང་གི་མ་ཡིན་པ་ཡིན་པར་ཁས་ལེན་དགོས་པ་དེ་ཡིན་པའི་ཕྱིར། ཀྭ་བུམ་གཉིས་མ་ཡིན་པ་དང་དངོས་པོ་གཉིས་ཀ་ཡིན་པར་ཁས་བླང་བས་ཀྭ་བུམ་གཉིས་དེ་མ་སོང་བ་ཡིན་ཏེ། དེ་ལྟར་ཁས་བླང་བས་སྤྱིར་སོང་བ་ཡིན་པའི་ཕྱིར། ཀྭ་བུམ་གཉིས་ཡོད་པ་དང་དངོས་པོ་གཉིས་ཀ་ཡིན་པར་ཁས་བླང་བས་སྤྱིར་མ་སོང་བ་ཡིན་ཏེ། དེ་ལྟར་དུ་ཁས་བླང་བས་ཀྭ་བུམ་གཉིས་དེ་སོང་བ་ཡིན་པའི་ཕྱིར། མ་གྲུབ་ན། ཀྭ་བུམ་གཉིས་ཡོད་པ་དང་དངོས། པོ་གཉིས་ཀ་ཡིན་པར་ཁས་བླང་བས་སྤྱིར་མ་སོང་བར་ཀྭ་བུམ་གཉིས་དེ་སོང་བ་ཡིན་པར་ཐལ། ཀྭ་བུམ་གཉིས་ཡོད་པ་དང་། དངོས་པོ་གཉིས་ཀའི་གཞི་མཐུན་དུ་འཇོག་པར་ཁས་བླང་བས་སྤྱིར་མ་སོང་བར་ཀྭ་བུམ་གཉིས་དེ་སོང་བ་ཡིན་པའི་ཕྱིར། དེར་ཐལ། གཞི་གྲུབ་ན་ཡོད་པ་དང་དངོས་པོ་གཉིས་ཀའི་གཞི་མཐུན་མ་ཡིན་པས་མ་ཁྱབ་པའི་ཕྱིར། རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་ཡིན་པར་ཁས་བླང་བས་སྤྱིར་མ་སོང་བར་རྟག་པར་རྟོགས་པའི་ཚད་མ་དེ་སོང་བ་ཡིན་ཏེ། རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀའི་གཞི་མཐུན་དུ་འཇོག་པར་ཁས་བླང་པས་སྤྱིར་མ་སོང་པར་རྟག་པར་རྟོགས་པའི་ཚད་མ་དེ་སོང་བ་ཡིན་པའི་ཕྱིར། དེར་ཐལ། གཞི་གྲུབ་ན་ཡོད་པ་དང་དངོས་པོ་གཉིས་ཀའི་གཞི་མཐུན་མ་ཡིན་པས་མ་ཁྱབ་ཀྱི་སྐྱོན་ལ་རྟག་པར་རྟོགས་པའི་ཚད་མ་དེ་བཞག་ཆོག་པ་ཡིན་པའི་ཕྱིར། ཤེས་བྱ་རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་ཡིན་པར་ཁས་བླང་པས་ཤེས་བྱ་རྟགཔར་རྟོགས་པའི་ཚད་མ་དེ་སོང་བ་ཡིན་ཏེ། གཞི་གྲུབ་ན། ཡོད་པ་དང་དངོས་པོ་གཉིས་ཀ་མ་ཡིན་པས་མ་ཁྱབ་ཀྱི་སྐྱོན་ལ་ཤེས་བྱ་རྟག་པར་རྟོགས་པའི་ཚད་མ་དེ་བཞག་ཆོག་པ་ཡིན་པའི་ཕྱིར། ཤེས་བྱ་རྟག་པར་རྟོགས་པའི་ཚད་མའི་དགགགཞི་དང་དངོས་པོ་གཉིས་ཀ་ཡིན་པར་ཁས་བླང་བས་ཤེས་བྱ་དེ་སོང་བ་ཡིན་ཏེ། དེ་ལྟར་སོང་ལུགས་སྔར་བཤད་ཟིན་བལྟར་ཡིན་པའི་ཕྱིར། ཀྭ་བུམ་གཉིས་མ་ཡིན་པ་དང་ཡིན་པ་གཉིས་ཀ་ཡིན་པར་ཁས་བླང་བས་སྤྱིར་སོང་ཀྱང་མ་ཡིན་པ་མ་ཡིན་པ་དང་ཡིན་པ་གཉིས་ཀ་ཡིན་པར་ཁས་བླང་བས་སྤྱིར་མ་སོང་བར་དེ་ལྟར་དུ་ཁས་བླང་བས་མ་ཡིན་པ་དེ་སོང་བ་ཡིན་པའི་ཕྱིར། དེར་ཐལ། དེའི་རྒྱུ་མཚན་གྱིས་མ་ཡིན་པ་མ་ཡིན་པ་དང་ཡིན་པ་གཉིས་ཀ་ཡིན་ཞེས་ཁས་ལེན་མི་རིགས་པ་དེ་ཡིན་པའི་ཕྱིར།
དེ་ལ་རྩོད་པ་སྤོང་བ་ལ་ཁོ་ན་རེ། རྟག་པ་མ་ཡིན་པར་ཐལ། རྟག་པ་མ་ཡིན་པ་དང་གང་ཟག་གི་བདག་མེད་ཡིན་པའི་ཕྱིར། མ་གྲུབ་ན། རྟག་པ་མ་ཡིན་པ་དང་གང་ཟག་གི་བདག་མེད་ཡིན་པར་ཐལ། རྟག་པ་མ་ཡིན་པ་དང་མེད་པ་ཡིན་པའི་ཕྱིར། མ་གྲུབ་ན། རྟག་པ་མ་ཡིན་པ་དང་མེད་པ་ཡིན་པར་ཐལ། རྟག་པ་མ་ཡིན་པ་དང་མེད་པའི་ཕྱིར་ཟེར་ན་མ་ཁྱབ།
ཁ་ཅིག་ན་རེ། དངོས་པོ་དང་ཆོས་ཅན། མེད་པ་ཡིན་པར་ཐལ། ཡོད་པ་མ་ཡིན་པའི་ཕྱིར་ཟེར་ན་སྦྱོར་ལུགས་སྐྱོན་ཅན་གྱི་ལན་འདེབས། འོ་ན། ཁྱོད་རང་ལ་ཡོད་མེད་གང་རུང་ཡིན་ན་ཆོས་ཅན། མེད་པ་ཡིན་པར་ཐལ། ཡོད་པ་མ་ཡིན་པའི་ཕྱིར། ཁྱབ་པ་འགྲིག །
ཁ་ཅིག་ན་རེ། དངོས་པོ་དང་མེད་པ་ཡིན་པར་ཐལ། དངོས་པོར་གྱུར་པའི་མེད་པ་ཡིན་པའི་ཕྱིར། མ་གྲུབ་ན། དངོས་པོར་གྱུར་བའི་མེད་པ་ཡིན་པར་ཐལ། དངོས་པོར་གྱུར་བའི་མེད་པའི་ཕྱིར་ཟེར་ན་མ་ཁྱབ། །
རྩོམ་སྒྲིག་པ། བློ་བཟང་བཀྲ་ཤིས།