བསེ་བསྡུས་ལས་སེལ་འཇུག་དང་སྒྲུབ་འཇུག་གི་རྣམ་བཞག
སེལ་འཇུག་དང་སྒྲུབ་འཇུག་གི་རྣམ་བཞག་བཤད་པ་ལ།
ཁ་ཅིག་ན་རེ། ཡུལ་ཅན་ཡིན་ན། སེལ་འཇུག་དང་སྒྲུབ་འཇུག་གང་རུང་ཡིན་པས་ཁྱབ་ཟེར་ན། གང་ཟགཆོས་ཅན། སེལ་འཇུག་དང་སྒྲུབ་འཇུག་གང་རུང་ཡིན་པར་ཐལ། ཡུལ་ཅན་ཡིན་པའི་ཕྱིར། ཁྱབ་པ་ཁས། འདོད་ན། གང་ཟག་ཆོས་ཅན། སེལ་འཇུག་དང་སྒྲུབ་འཇུག་གང་རུང་མ་ཡིན་པར་ཐལ། སེལ་འཇུག་མ་ཡིན་པ་གང་ཞིག ། སྒྲུབ་འཇུག་མ་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། གང་ཟག་ཡིན་པའི་ཕྱིར། གཞན་ཡང་། མིག་དབང་ཆོས་ཅན། སེལ་འཇུག་དང་སྒྲུབ་འཇུག་གང་རུང་ཡིན་པར་ཐལ། ཡུལ་ཅན་ཡིན་པའི་ཕྱིར། ཁྱབ་པ་ཁས། འདོད་ན། མིག་དབང་ཆོས་ཅན། སེལ་འཇུགདང་སྒྲུབ་འཇུག་གང་རུང་མ་ཡིན་པར་ཐལ། དབང་པོ་གཟུགས་ཅན་པ་ཡིན་པའི་ཕྱིར།
ཁ་ཅིག་ན་རེ། བུམ་པ་ཞེས་པའི་སྒྲའི་འཇུག་གཞི་ཡིན་ན། བུམ་པ་དང་གཅིག་ཡིན་པས་ཁྱབ་པ་དེ། བུམ་པ་ཞེས་པའི་སྒྲ། བུམ་པ་ལ་སེལ་འཇུག་གི་དོན་ཡིན་ཟེར་ན། འོ་ན། བུམ་པ་ཞེས་པའི་སྒྲའི་འཇུག་གཞི་ཡིན་ན། བུམ་པ་དང་གཅིག་ཡིན་པས་ཁྱབ་པར་ཐལ། དེ་ལྟར་ཁྱབ་པ་བུམ་པ་ཞེས་པའི་སྒྲ་བུམ་པ་ལ་སེལ་འཇུག་གི་དོན་ཡིན་པའི་ཕྱིར། འདོད་ན། གསེར་བུམ་ཆོས་ཅན། བུམ་པ་དང་གཅིག་ཡིན་པར་ཐལ། བུམ་པ་ཞེས་པའི་སྒྲའི་འཇུག་གཞི་ཡིན་པའི་ཕྱིར། ཁྱབ་པ་ཁས། མ་གྲུབ་ན། གསེར་བུམ་ཆོས་ཅན། བུམ་པ་ཞེས་པའི་སྒྲའི་འཇུག་གཞི་ཡིན་པར་ཐལ། བུམ་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཤེས་བྱ་ཡིན་ན། ཤེས་བྱ་ཞེས་པའི་སྒྲའི་འཇུག་གཞི་ཡིན་པས་ཁྱབ་པའི་ཕྱིར། དེར་ཐལ། ཤེས་བྱ་ཞེས་པའི་སྒྲ་མི་འཇུག་པའི་ཤེས་བྱ་མེད་པའི་ཕྱིར།
ཁ་ཅིག་ན་རེ། བུམ་འཛིན་རྟོག་པའི་ཞེན་ཡུལ་ཡིན་ན། བུམ་པ་ཞེས་བརྗོད་པའི་སྒྲའི་འཇུག་གཞི་ཡིན་པས་ཁྱབ་པ་དང་། བུམ་པ་ཞེས་བརྗོད་པའི་སྒྲའི་འཇུག་གཞི་ཡིན་ན། བུམ་འཛིན་རྟོགས་པའི་ཞེན་ཡུལ་ཡིན་པས་ཁྱབ་པ་དེ། བུམ་པ་ཞེས་པའི་སྒྲ། བུམ་པ་ལ་སྒྲ་རྟོག་སེལ་འཇུག་གི་དོན་ཡིན་ཟེར་ན། འོ་ན། གསེར་བུམ་ཆོས་ཅན༑ བུམ་འཛིན་རྟོག་པའི་ཞེན་ཡུལ་ཡིན་པར་ཐལ། བུམ་པ་ཞེས་བརྗོད་པའི་སྒྲའི་འཇུག་གཞི་ཡིན་པའི་ཕྱིར། ཁྱབ་པ་ཁས། འདོད་ན། བུམ་པ་ཡིན་ན་བུམ་འཛིན་རྟོག་པའི་ཞེན་ཡུལ་ཡིན་པས་ཁྱབ་པར་ཐལ། གསེར་བུམ་བུམ་འཛིན་རྟོགཔའི་ཞེན་ཡུལ་ཡིན་པའི་ཕྱིར། འདོད་ན། ཤེས་བྱ་ཡིན་ན་ཤེས་བྱ་འཛིན་པའི་རྟོག་པའི་ཞེན་ཡུལ་ཡིན་པས་ཁྱབ་པར་ཐལ། བུམ་པ་ཡིན་ན། བུམ་འཛིན་རྟོག་པའི་ཞེན་ཡུལ་ཡིན་པས་ཁྱབ་པའི་ཕྱིར། རྟགས་ཁས། འདོད་མི་ནུས་ཏེ། གང་ཟག་གི་བདགམེད་ཡིན་པའི་ཕྱིར།
ཁ་ཅིག་ན་རེ། བུམ་འཛིན་རྟོག་པའི་ཞེན་ཡུལ་ཡིན་ན། བུམ་པ་དང་གཅིག་ཡིན་པས་ཁྱབ་པ་དེ། བུམ་འཛིན་རྟོག་པ་བུམ་པ་ལ་སེལ་འཇུག་གི་དོན་ཡིན་ཟེར་ན། འོ་ན། བུམ་པ་བུམ་པ་ཡིན་པ་ཆོས་ཅན། བུམ་པ་དང་གཅིག་ཡིན་པར་ཐལ། བུམ་འཛིན་རྟོག་པའི་ཞེན་ཡུལ་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པ་བུམ་པ་ཡིན་པ་ཆོས་ཅན། བུམ་འཛིན་རྟོག་པའི་ཞེན་ཡུལ་ཡིན་པར་ཐལ། བུམ་འཛིན་རྟོག་པའི་འཛིན་སྟངས་ཀྱི་ཡུལ་ཡིན་པའི་ཕྱིར། མ་གྲུབ་ན། བུམ་པ་བུམ་པ་ཡིན་པ་ཆོས་ཅན། བུམ་འཛིན་རྟོག་པའི་འཛིན་སྟངས་ཀྱི་ཡུལ་ཡིན་པར་ཐལ། བུམ་འཛིན་རྟོག་པ་ཁྱོད་འཛིན་སྟངས་ཀྱི་ཡུལ་དུ་བྱས་ནས་དངོས་སུ་རྟོགས་པའི་བློ་ཡིན་པའི་ཕྱིར། མ་གྲུབ་ན། བུམ་འཛིན་རྟོག་པ་ཆོས་ཅན། ཁྱོད་བུམ་པ་བུམ་པ་ཡིན་པ་འཛིན་སྟངས་ཀྱི་ཡུལ་དུ་བྱས་ནས་དངོས་སུ་རྟོགས་པའི་བློ་ཡིན་པར་ཐལ། ཁྱོད་བུམ་པ་འཛིན་སྟངས་ཀྱི་ཡུལ་དུ་བྱས་ནས་དངོས་སུ་རྟོགས་པའི་བློ་ཡིན་པའི་ཕྱིར། མ་གྲུབ་ན། བུམ་འཛིན་རྟོག་པ་ཆོས་ཅན། ཁྱོད་བུམ་པ་འཛིན་སྟངས་ཀྱི་ཡུལ་དུ་བྱས་ནས་དངོས་སུ་རྟོགས་པའི་བློ་ཡིན་པར་ཐལ། ཁྱོད་བུམ་པ་རྟོགས་པའི་རྟོག་པ་ཡིན་པའི་ཕྱིར། རྩ་བར་འདོད་ན། བུམ་པ་བུམ་པ་ཡིན་པ་ཆོས་ཅན། བུམ་པ་དང་གཅིག་མ་ཡིན་པར་ཐལ། བུམ་པ་དང་ཐ་དད་ཡིན་པའི་ཕྱིར།
དེ་ལ་ཁ་ཅིག་ན་རེ། སེལ་འཇུག་གི་དོན་ནི། ཆ་ཤེས་སུ་ཕྱེ་ནས་འཇུག་པ་དེ་ཡིན་ལ། ཆ་ཤས་སུ་ཕྱེ་ནས་འཇུག་པའི་དོན་ནི་ཆོས་དེའི་ཆ་འགའ་ཞིག་ཡུལ་དུ་བྱས་ནས། འགའ་ཞིག་ཡུལ་དུ་མ་བྱས་པ་དེ་དེའི་དོན་ཡིན་ཟེར་ན། འོ་ན། རྟོག་པ་ཆོས་ཅན། ཁྱོད་ཀྱིས་ཤེས་བྱའི་ཆ་འགའ་ཞིག་ཡུལ་དུ་བྱས་ནས་འགའ་ཞིག་ཡུལ་དུ་མ་བྱས་པ་ཡིན་པར་ཐལ། ཁྱོད་ཤེས་བྱ་ལ་ཆ་ཤས་སུ་ཕྱེ་ནས་འཇུག་པ་ཡིན་པའི་ཕྱིར། དེར་ཐལ། ཁྱོད་ཤེས་བྱ་ལས་སེལ་འཇུག་ཡིན་པའི་ཕྱིར། མ་གྲུབ་ན། རྟོག་པ་ཆོས་ཅན། ཁྱོད་ཤེས་བྱ་ལ་སེལ་འཇུག་ཡིན་པར་ཐལ། ཁྱོད་ཤེས་བྱ་ལ་འཇུག་པ་གང་ཞིག ། རྟོག་པ་ཡིན་པའི་ཕྱིར། རྩ་བར་འདོད་ན། རྟོག་པ་ཆོས་ཅན། ཁྱོད་ཀྱིས་ཡུལ་དུ་མ་བྱས་པའི་ཤེས་བྱའི་ཆ་འགའ་ཞིག་ཡོད་པར་ཐལ། ཁྱོད་ཀྱིས་ཤེས་བྱའི་ཆ་འགའ་ཞིག་ཡུལ་དུ་བྱས་ནས་འགའ་ཞིག་ཡུལ་དུ་མ་བྱས་པ་དེ་ཡིན་པའི་ཕྱིར། འདོད་ན། གཞི་གྲུབ་ན་རྟོག་པའི་ཡུལ་ཡིན་པས་མ་ཁྱབ་པར་ཐལ། འདོད་པའི་ཕྱིར། འདོད་མི་ནུས་ཏེ། གཞི་གྲུབ་ན། རྟོག་པའི་ཡུལ་ཡིན་པས་ཁྱབ་པའི་ཕྱིར། དེར་ཐལ། གཞི་གྲུབ་ན། རྟོག་པའི་ཞེན་ཡུལ་ཡིན་པས་ཁྱབ་པའི་ཕྱིར། གཞན་ཡང་། རྟོག་པས་གཟུགས་ཀྱི་ཆ་འགའ་ཞིག་ཡུལ་དུ་བྱས་ནས་འགའ་ཞིག་ཡུལ་དུ་མ་བྱས་པར་གཟུགས་ལ་འཇུག་པར་ཐལ། རྟོག་པ་གཟུགས་ལ་སེལ་འཇུག་ཡིན་པ་གང་ཞིག ། སེལ་འཇུག་གི་དོན་དེ་ཡིན་པའི་ཕྱིར། རྟགས་ཁས། འདོད་ན། རྟོག་པས་ཡུལ་དུ་མ་བྱས་པའི་གཟུགས་ཀྱི་ཆ་འགའ་ཞིག་ཡོད་པར་ཐལ། རྟོག་པས་གཟུགས་ཀྱི་ཆ་འགའ་ཞིག་ཡུལ་དུ་བྱས་ནས་འགའ་ཞིག་ཡུལ་དུ་མ་བྱས་པ་དེ་ཡིན་པའི་ཕྱིར།
ཁ་ཅིག་ན་རེ། སྒྲུབ་འཇུག་གི་བློ་ཡིན་ན། མངོན་སུམ་གྱི་ཚད་མ་ཡིན་པས་ཁྱབ་ཟེར་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། མངོན་སུམ་གྱི་ཚད་མ་ཡིན་པར་ཐལ། སྒྲུབ་འཇུག་གི་བློ་ཡིན་པའི་ཕྱིར། ཁྱབ་པ་ཁས། མ་གྲུབ་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། སྒྲུབ་འཇུག་གི་བློ་ཡིན་པར་ཐལ། རང་ཡུལ་ལ་སྒྲུབ་འཇུག་གི་བློ་ཡིན་པའི་ཕྱིར། མ་གྲུབ་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། རང་ཡུལ་ལ་སྒྲུབ་འཇུག་གི་བློ་ཡིན་པར་ཐལ། རྟོག་མིན་གྱི་བློ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རྟོག་མིན་གྱི་བློ་ཡིན་ན་རང་ཡུལ་ལ་འཇུག་པས་ཁྱབ་པ་གང་ཞིག ། རང་ཡུལ་ལ་སེལ་འཇུག་མ་ཡིན་པས་ཁྱབ་པའི་ཕྱིར། ཁྱབ་པ་ཡོད་དེ། རྗོད་བྱེད་ཀྱི་སྒྲ་དང་བློ་གཉིས་ཀ་རང་ཡུལ་ལ་འཇུག་པ་ལ་སེལ་འཇུག་དང་སྒྲུབ་འཇུག་གང་རུང་མ་ཡིན་པར་རང་ཡུལ་ལ་འཇུག་ཚུལ་མེད་པའི་ཕྱིར།
ཁ་ཅིག་ན་རེ། རང་ཡུལ་དུ་གྱུར་པའི་སེལ་བ་ལ་འཇུག་ན་སེལ་འཇུག་ཡིན་པས་ཁྱབ། རང་ཡུལ་དུ་གྱུར་པའི་སྒྲུབ་པ་ལ་འཇུག་ན་སྒྲུབ་འཇུག་ཡིན་པས་ཁྱབ་ཟེར་ན། དང་པོ་ལ། སྒྲ་མི་རྟག་པར་མངོན་སུམ་དུ་རྟོགས་པའི་ཚད་མ་ཆོག་ཅན། སེལ་འཇུག་ཡིན་པར་ཐལ། རང་ཡུལ་དུ་གྱུར་བའི་སེལ་བལ་འཇུག་པའི་ཕྱིར། ཁྱབ་པ་ཁས། མ་གྲུབ་ན། སྒྲ་མི་རྟག་པར་མངོན་སུམ་དུ་རྟོགས་པའི་ཚད་མ་ཆོས་ཅན། རང་ཡུལ་དུ་གྱུར་པའི་སེལ་བ་ལ་འཇུག་པར་ཐལ། ཁྱོད་སྒྲ་མི་རྟག་པ་ལ་འཇུག་པ་གང་ཞིག ། སྒྲ་མི་རྟག་པ་ཁྱོད་ཀྱི་ཡུལ་དུ་གྱུར་པའི་སེལ་བ་ཡིན་པའི་ཕྱིར། རྟགས་དང་པོ་མ་གྲུབ་ན། སྒྲ་མི་རྟག་པར་མངོན་སུམ་དུ་རྟོགས་པའི་ཚད་མ་ཆོས་ཅན། ཁྱོད་སྒྲ་མི་རྟག་པ་ལ་འཇུག་པར་ཐལ། ཁྱོད་སྒྲ་མི་རྟག་པ་མངོན་སུམ་དུ་རྟོགས་པའི་བློ་ཡིན་པའི་ཕྱིར། རྟགས་གཉིས་པ་མ་གྲུབ་ན། སྒྲ་མི་རྟག་པ་ཆོས་ཅན། ཁྱོད་སྒྲ་མི་རྟག་པར་མངོན་སུམ་དུ་རྟོགས་པའི་ཚད་མའི་ཡུལ་དུ་གྱུར་བའི་སེལ་བ་ཡིན་པར་ཐལ། ཁྱོད་སྒྲ་མི་རྟག་པར་མངོན་སུམ་དུ་རྟོགས་པའི་ཚད་མའི་ཡུལ་དང་སེལ་བ་གཉིས་ཀའི་གཞི་མཐུན་ཡིན་པའི་ཕྱིར། རྟགས་དང་པོ་མ་གྲུབ་ན། སྒྲ་མི་རྟག་པ་ཆོས་ཅན། ཁྱོད་ཁྱོད་མངོན་སུམ་དུ་རྟོགས་པའི་ཚད་མའི་ཡུལ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། རྟགས་གཉིས་པ་མ་གྲུབ་ན། སྒྲ་མི་རྟག་པ་ཆོས་ཅན། སེལ་བ་ཡིན་པར་ཐལ། དགག་པ་ཡིན་པའི་ཕྱིར། དེར་ཐལ། མ་ཡིན་དགག་ཡིན་པའི་ཕྱིར། གོང་གི་རྟགས་གཉིས་པ་ལ། འོ་ན། གཟུགས་འཛིན་རྟོགས་པ་ཆོས་ཅན། སྒྲུབ་འཇུག་ཡིན་པར་ཐལ། རང་ཡུལ་དུ་གྱུར་པའི་སྒྲུབ་པ་ལ་འཇུག་པའི་ཕྱིར། ཁྱབ་པ་ཁས། མ་གྲུབ་ན། གཟུགས་འཛིན་རྟོག་པ་ཆོས་ཅན། རང་ཡུལ་དུ་གྱུར་བའི་སྒྲུབ་པ་ལ་འཇུག་པར་ཐལ། གཟུགས་ལ་འཇུག་པ་གང་ཞིག ། གཟུགས་ཁྱོད་ཀྱི་ཡུལ་དུ་གྱུར་པའི་སྒྲུབ་པ་ཡིན་པའི་ཕྱིར། རྟགས་དང་པོ་མ་གྲུབ་ན། གཟུགས་ཆོས་ཅན། ཁྱོད་འཛིན་རྟོག་པ་ཁྱོད་ལ་འཇུག་པར་ཐལ། ཁྱོད་བདག་མེད་ཡིན་པའི་ཕྱིར། རྟགས་གཉིས་པ་མ་གྲུབ་ན། གཟུགས་ཆོས་ཅན། གཟུགས་ཆོས་ཅན། གཟུགས་འཛིན་རྟོག་པའི་ཡུལ་དུ་གྱུར་པའི་སྒྲུབ་པ་ཡིན་པར་ཐལ། གཟུགས་འཛིན་རྟོག་པའི་ཡུལ་ཡིན་པ་གང་ཞིག ། སྒྲུབ་པ་ཡིན་པའི་ཕྱིར། རྟགས་དང་པོ་མ་གྲུབ་ན། གཟུགས་ཆོས་ཅན། ཁྱོད་ཁྱོད་འཛིན་རྟོག་པའི་ཡུལ་ཡིན་པར་ཐལ། ཁྱོད་བདག་མེད་ཡིན་པའི་ཕྱིར། རྟགས་གཉིས་པ་མ་གྲུབ་ན། གཟུགས་ཆོས་ཅན། སྒྲུབ་པ་ཡིན་པར་ཐལ། གཟུགས་དང་གཅིག་ཡིན་པའི་ཕྱིར། གོང་དུ་འདོད་ན། གཟུགས་འཛིན་རྟོག་པ་ཆོས་ཅན། སྒྲུབ་འཇུག་མ་ཡིན་པར་ཐལ། སེལ་འཇུག་ཡིན་པའི་ཕྱིར། མ་གྲུབ་ན། གཟུགས་འཛིན་རྟོག་པ་ཆོས་ཅན། སེལ་འཇུག་ཡིན་པར་ཐལ། རྗོད་བྱེད་ཀྱི་སྒྲ་དང་རྟོག་པ་གང་རུང་ཡིན་པའི་ཕྱིར།
ཁ་ཅིག་ན་རེ། གཟུགས་ལ་སྒྲུབ་འཇུག་གི་དོན་ཡོད་དེ། གཟུགས་ཀྱི་ཆ་ཐམས་ཅད་ཡུལ་དུ་བྱས་ནས་གཟུགས་ལ་འཇུག་པ་དེ་ཡིན་པའི་ཕྱིར་ཟེར་ན། འོ་ན། རྟོག་པ་ཆོས་ཅན། གཟུགས་ལ་སྒྲུབ་འཇུག་ཡིན་པར་ཐལ། གཟུགས་ཀྱི་ཆ་ཐམས་ཅད་ཡུལ་དུ་བྱས་ནས་གཟུགས་ལ་འཇུག་པ་ཡིན་པའི་ཕྱིར། མ་གྲུབ་ན། རྟོགཔ་ཆོས་ཅན། ཁྱོད་ཀྱིས་གཟུགས་ཀྱི་ཆ་ཐམས་ཅད་ཡུལ་དུ་བྱས་ནས་གཟུགས་ལ་འཇུག་པར་ཐལ། གཟུགས་ཀྱི་ཆ་ཐམས་ཅད་ཁྱོད་ཀྱི་ཡུལ་ཡིན་པ་གང་ཞིག ། ཁྱོད་གཟུགས་ལ་འཇུག་པའི་ཕྱིར། རྟགས་དང་པོ་མ་གྲུབ་ན། གཟུགས་ཀྱི་ཆ་ཐམས་ཅད་ཆོས་ཅན། རྟོག་པའི་ཡུལ་ཡིན་པར་ཐལ། གཞི་གྲུབ་པའི་ཕྱིར། རྟགས་གཉིས་པ་མ་གྲུབ་ན། རྟོག་པ་ཆོས་ཅན། གཟུགས་ལ་འཇུག་པར་ཐལ། གཟུགས་ཁྱོད་ཀྱི་འཇུག་ཡུལ་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། རྟོག་པའི་འཇུག་ཡུལ་ཡིན་པར་ཐལ། རྟོགཔའི་ཞེན་ཡུལ་ཡིན་པའི་ཕྱིར། དེར་ཐལ། གཞི་གྲུབ་པའི་ཕྱིར། གཞན་ཡང་། བསྟན་བཅོས་མངོན་རྟོགས་ཅན་ཆོས་ཅན། དངོས་པོ་བརྒྱད་ལ་སྒྲུབ་འཇུག་ཡིན་པར་ཐལ། དངོས་པོ་བརྒྱད་ཀྱི་ཆ་ཐམས་ཅད་ཡུལ་དུ་བྱས་ནས་དེ་ལ་འཇུག་པ་ཡིན་པའི་ཕྱིར། དེར་ཐལ། དངོས་པོ་བརྒྱད་ཀྱི་ཆ་ཐམས་ཅད་ཁྱོད་ཀྱི་ཡུལ་ཡིན་པའི་ཕྱིར། དེར་ཐལ། ཆོས་ཐམས་ཅད་ཁྱོད་ཀྱི་ཡུལ་ཡིན་པའི་ཕྱིར། དེར་ཐལ། ཆོས་ཐམས་ཅད་ཁྱོད་ཀྱི་བརྗོད་བྱ་ཡིན་པའི་ཕྱིར། རྩ་བར་འདོད་ན། བསྟན་བཅོས་མངོན་རྟོགས་རྒྱན་ཆོས་ཅན། དངོས་པོ་བརྒྱད་ལ་སྒྲུབ་འཇུག་མ་ཡིན་པར་ཐལ། སྒྲུབ་འཇུག་མ་ཡིན་པའི་ཕྱིར། མ་གྲུབ་ན། བསྟན་བཅོས་མངོན་རྟོགས་རྒྱན་ཆོས་ཅན། སྒྲུབ་འཇུག་མ་ཡིན་པར་ཐལ། སེལ་འཇུག་ཡིན་པའི་ཕྱིར། དེར་ཐལ། རྗོད་བྱེད་ཀྱི་སྒྲ་ཡིན་པའི་ཕྱིར།
ཁ་ཅིག་ན་རེ། སྔོན་པོ་ལ་སྒྲུབ་འཇུག་གི་བློ་ཡིན་ན་སྔོན་པོ་དང་རྫས་གཅིག་པ་ཐམས་ཅད་ཡུལ་དུ་བྱས་ནས་སྔོན་པོ་ལ་འཇུག་པའི་བློ་ཡིན་པས་ཁྱབ་ཟེར་ན། སྔོ་འཛིན་མིག་ཤེས་ཆོས་ཅན། སྔོན་པོ་དང་རྫས་གཅིག་པ་ཐམས་ཅད་ཡུལ་དུ་བྱས་ནས་སྔོན་པོ་ལ་འཇུག་པའི་བློ་ཡིན་པར་ཐལ། སྔོ་པོ་ལ་སྒྲུབ་འཇུག་གི་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྔོ་འཛིན་མིག་ཤེས་ཆོས་ཅན། སྔོན་པོ་ལ་སྒྲུབ་འཇུག་གི་བློ་ཡིན་པར་ཐལ། སྔོ་འཛིན་དབང་སྔོན་ཡིན་པའི་ཕྱིར། རྩ་བར་འདོད་ན། སྔོན་འཛིན་མིག་ཤེས་ཆོས་ཅན། ཁྱོད་ཀྱི་སྔོན་པོའི་དྲི་དང་རོ་དང་རེག་བྱ་གསུམ་ག་ཡུལ་དུ་བྱས་ནས་སྔོན་པོ་ལ་འཇུག་པར་ཐལ། སྔོན་པོ་དང་རྫས་གཅིག་པ་ཐམས་ཅད་ཡུལ་དུ་བྱས་ནས་དེ་ལ་འཇུག་པ་གང་ཞིག ། དེ་གསུམ་ག་སྔོན་པོ་དང་རྫས་གཅིག་ཡིན་པའི་ཕྱིར། རྟགས་དང་པོ་ཁས། ཕྱི་མ་མ་གྲུབ་ན། སྔོན་པོ་ཆོས་ཅན། ཁྱོད་ཀྱི་དྲི་དང་རོ་དང་རེག་བྱ་གསུམ་ག་ཁྱོད་དང་རྫས་གཅིག་ཡིན་པར་ཐལ། ཁྱོད་རྡུལ་རྫས་བརྒྱད་འདུས་ཀྱི་གོང་བུ་ཡིན་པའི་ཕྱིར།
རང་གི་ལུགས་ལ། རང་ཡུལ་ལ་དངོས་དབང་གིས་འཇུག་པའི་བློ་དེ་རང་ཡུལ་ལ་སྒྲུབ་འཇུག་གི་བློའི་མཚན་ཉིད། རང་ཡུལ་ལ་དངོས་དབང་གིས་འཇུག་པ་དང་། རང་ཡུལ་ལ་སྒྲུབ་པའི་རྣམ་པས་འཇུག་པ་དང་། རང་ཡུལ་ལ་སྒྲུབ་འཇུག་གི་བློ་གསུམ་དོན་གཅིག ། སྒྲུབ་འཇུག་གི་བློ་ལ་དབྱེ་ན་གཉིས་ཡོད་དེ། སྒྲུབ་འཇུག་ཕྱིན་ཅི་ལོག་མ་ལོག་གཉིས་ཡོད་པའི་ཕྱིར། གངས་རི་སྔོན་པོར་སྣང་བའི་དབང་ཤེས་དེ་སྒྲུབ་འཇུག་ཕྱིན་ཅི་ལོག་དང་། སྔོ་འཛིན་དབང་མངོན་དེ་སྒྲུབ་འཇུག་ཕྱིན་ཅི་མ་ལོག་པ་ཡིན་པའི་ཕྱིར། སེལ་འཇུག་གི་མཚན་ཉིད་ཡོད་དེ། རང་ཡུལ་ལ་འདོད་པའི་དབང་གིས་འཇུག་པ་དེ་ཡིན་པའི་ཕྱིར། སེལ་འཇུག་ལ་དབྱེ་ན་གཉིས་ཡོད་དེ། རྗོད་བྱེད་ཀྱི་སྒྲ་དང་། རྟོག་པ་གཉིས་ཡོད་པའི་ཕྱིར། བུམ་འཛིན་རྟོག་པ་བུམ་པ་ལ་སེལ་འཇུག་བྱེད་ཚུལ་ཡོད་དེ། དེས་བུམ་པ་མ་ཡིན་པ་རྣམ་པར་བཅད་ནས་བུམ་པ་ལ་འཇུག་དགོས་པ་ཡིན་པའི་ཕྱིར། ཀྭ་བུམ་གཉིས་ཞེས་བརྗོད་པའི་སྒྲ་ཀྭ་བུམ་གཉིས་ལ་སེལ་འཇུག་བྱེད་ཚུལ་ཡོད་དེ། དེས་ཀྭ་བུམ་གཉིས་མ་ཡིན་པ་རྣམ་པར་བཅད་ནང་། ཀྭ་བུམ་གཉིས་བརྗོད་དགོས་པ་དེ་ཡིན་པའི་ཕྱིར། རང་ཡུལ་ལ་སེལ་བའི་རྣམ་པས་འཇུག་པ་དང་། རང་ཡུལ་ལ་དགག་པའི་རྣམ་བས་འཇུག་པ་དང་། རང་ཡུལ་ལ་སེལ་འཇུག་གི་བློ་གསུམ་དོན་གཅིག །
དེ་ལ་རྩོད་པ་སྤོང་བ་ལ། ཁ་ཅིག་ན་རེ། སྒྲ་འཛིན་རྣ་ཤེས་ཆོས་ཅན། ཁྱོད་ཡིན་ན། སྒྲ་དང་གྲུབ་བདེ་རྫས་གཅིག་པ་ཐམས་ཅད་ཡུལ་དུ་བྱས་ནས། སྒྲ་ལ་འཇུག་པའི་བློ་ཡིན་པས་ཁྱབ་པར་ཐལ། ཁྱོད་ཡིན་ན་སྒྲ་ལ་སྒྲུབ་འཇུག་གི་བློ་ཡིན་པས་ཁྱབ་པའི་ཕྱིར། མ་གྲུབ་ན། སྒྲ་འཛིན་རྣ་ཤེས་ཆོས་ཅན། ཁྱོད་ཡིན་ན་སྒྲ་ལ་སྒྲུབ་འཇུག་གི་བློ་ཡིན་པས་ཁྱབ་པར་ཐལ། ཁྱོད་ཡིན་ན་སྒྲ་མངོན་སུམ་དུ་སྣང་ཡུལ་དུ་བྱས་ནས་སྒྲ་ལ་འཇུག་པའི་བློ་ཡིན་པས་ཁྱབ་པའི་ཕྱིར། རྩ་བར་འདོད་ན། གྲངས་ཅན་རྒྱུད་ཀྱི་སྒྲ་འཛིན་རྣ་ཤེས་ཆོས་ཅན། ཁྱོད་ཀྱི་སྒྲ་དང་གྲུབ་བདེ་རྫས་གཅིག་པ་ཐམས་ཅད་སྣང་ཡུལ་དུ་བྱས་ནས་སྒྲ་ལ་འཇུག་པར་ཐལ། ཁྱོད་སྒྲ་འཛིན་རྣ་ཤེས་ཡིན་པའི་ཕྱིར། ཁྱབ་པ་ཁས། ཐེག་ཆེན་གྱི་མཐོང་ལམ་རང་ཡུལ་ལ་འཇུག་པ་ཡིན་ཏེ། ལམ་ཤེས་ཡིན་པའི་ཕྱིར། མ་གྲུབ་ན། ཐེག་ཆེན་གྱི་མཐོང་ལམ་ཆོས་ཅན། ལམ་ཤེས་ཡིན་པར་ཐལ། རང་གི་གདུལ་བྱ་རིགས་ཅན་གསུམ་གྱི་བཞེད་དོན་མཐའ་དག་བསྒྲུབ་པར་བྱེད་པའི་ཐེག་ཆེན་འཕགས་པའི་མངོན་རྟོགས་ཡིན་པའི་ཕྱིར། འཆད་པར་བྱེད་པ་ལ། མངོན་རྟོགས་རྒྱན་ལས། འགྲོ་ལ་ཕན་པར་བྱེད་རྣམས་ལམ་ཤེས་ཉིད་ཀྱིས་འཇིག་རྟེན་དོན་སྒྲུབ་མཛད་པ་གང་། ། ཞེས་གསུངས་པ་ཡིན་པའི་ཕྱིར། གོང་དུ་འདོད་ན། གྲངས་ཅན་གྱི་རྒྱུད་ཀྱི་སྒྲ་འཛིན་རྣ་ཤེས་ཆོས་ཅན། ཁྱོད་སྒྲ་མི་རྟག་པ་སྣང་བའི་བློ་ཡིན་པར་ཐལ། ཁྱོད་སྒྲ་དང་གྲུབ་བདེ་རྫས་གཅིག་པ་ཐམས་ཅད་སྣང་བའི་བློ་ཡིན་པ་གང་ཞིག ། སྒྲ་མི་རྟག་པ་སྒྲ་དང་གྲུབ་བདེ་རྫས་གཅིག་ཡིན་པའི་ཕྱིར། རྟགས་དང་པོ་ཁས། ཕྱི་མ་གྲུབ་ན། སྒྲ་ཆོས་ཅན་ཁྱོད་མི་རྟག་པ་ཁྱོད་དང་གྲུབ་བདེ་རྫས་གཅིག་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། གོང་དུ་འདོད་ན། གྲངས་ཅན་གྱི་རྒྱུད་ཀྱི་སྒྲ་འཛིན་རྣ་ཤེས་ཆོས་ཅན། ཁྱོད་སྒྲ་མི་རྟག་པ་རྟོགས་པའི་བློ་ཡིན་པར་ཐལ། ཁྱོད་སྒྲ་མི་རྟག་པ་སྣང་བའི་བློ་ཡིན་པའི་ཕྱིར་ཟེར་ན་མ་ཁྱབ། འོ་ན། ཁྱོད་རང་ལ་ཟླ་གཅིག་ཟླ་གཉིས་སུ་སྣང་བའི་དབང་ཤེས་ཆོས་ཅན། ཁྱོད་ཟླ་བ་གཅིག་ཟླ་བ་གཉིས་ཡིན་པར་རྟོགས་པའི་བློ་ཡིན་པར་ཐལ། ཁྱོད་ཟླ་བ་གཅིག་ཟླ་བ་གཉིས་ཡིན་པར་སྣང་བའི་བློ་ཡིན་པའི་ཕྱིར། ཁྱབ་པ་འགྲིག ། མ་གྲུབ་ན། ཟླ་གཅིག་ཟླ་གཉིས་སུ་སྣང་བའི་དབང་ཤེས་ཆོས་ཅན། ཁྱོད་ཟླ་བ་གཅིག་ཟླ་བ་གཉིས་ཡིན་པར་སྣང་བའི་བློ་ཡིན་པར་ཐལ། ཁྱོད་ཟླ་བ་གཅིག་ཟླ་བ་གཉིས་ཡིན་པར་མཐོང་བའི་བློ་ཡིན་པའི་ཕྱིར།
རྩོམ་སྒྲིག་པ། བློ་བཟང་བཀྲ་ཤིས།