བསེ་བསྡུས་ལས་ཐལ་འགྱུར་ཆེ་བའི་རྣམ་བཞག
ཐལ་འགྱུར་ཆེ་བའི་རྣམ་བཞག་བཤད་པ་ལ།
ཁ་ཅིག་ན་རེ། ཕ་རོལ་ལ་མི་འདོད་པའི་ཐལ་བ་འཕེན་པར་བྱེད་པའི་རྗོད་བྱེད་རྣམ་དག་དེ་ཐལ་འགྱུར་གྱི་མཚན་ཉིད་ཡིན་ཟེར་ན། འོ་ན། མངོན་རྟོགས་རྒྱན་ཆོས་ཅན། ཐལ་འགྱུར་ཡིན་པར་ཐལ། ཕ་རོལ་ལ་མི་འདོད་པའི་ཐལ་བ་འཕེན་པར་བྱེད་པའི་རྗོད་བྱེད་རྣམ་དག་ཡིན་པའི་ཕྱིར། ཁྱབ་པ་ཁས། མ་གྲུབ་ན། མངོན་རྟོགས་རྒྱན་ཆོས་ཅན། ཕ་རོལ་ལ་མི་འདོད་པའི་ཐལ་བ་འཕེན་པར་བྱེད་པའི་རྗོད་བྱེད་རྣམ་དག་ཡིན་པར་ཐལ། སྡུག་བསྔལ་རྟག་པར་འདོད་པ་དང་བདེ་བར་འདོད་པ་རྣམས་ལ་མི་འདོད་པའི་ཐལ་བ་འཕེན་པར་བྱེད་པའི་རྗོད་བྱེད་རྣམ་དག་ཡིན་པའི་ཕྱིར། དེར་ཐལ། སྡུག་བསྔལ་མི་རྟག་པ་དང་སྡུག་བསྔལ་བར་འཕེན་པར་བྱེད་པའི་རྗོད་བྱེད་རྣམ་དག་ཡིན་པའི་ཕྱིར། རྩ་བར་འདོད་ན། བཀའ་དང་བསྟན་བཅོས་གང་རུང་ཡིན་ན། ཐལ་འགྱུར་ཡིན་པས་ཁྱབ་པར་ཐལ། མངོན་རྟོགས་རྒྱན་ཐལ་འགྱུར་ཡིན་པའི་ཕྱིར། རྟགས་ཁས། འདོད་མི་ནུས།
ཁ་ཅིག་ན་རེ། བཀའ་དང་བསྟན་བཅོས་གང་རུང་ཡིན་ན་ཐལ་འགྱུར་མ་ཡིན་པས་ཁྱབ་ཟེར་ན། དེ་མི་འཐད་པ་ཡིན་པར་ཐལ། བསྟན་བཅོས་སུ་གྱུར་པའི་ཐལ་འགྱུར་དུ་མ་ཡོད་པ་གང་ཞིག ། བཀར་གྱུར་པའི་ཐལ་འགྱུར་དུ་མ་ཡོད་པའི་ཕྱིར། རྟགས་དང་པོ་གྲུབ་པ་ཡིན་ཏེ། བསྟན་བཅོས་ཀྱི་གཞུང་ཚིག་ཏུ་གྱུར་པའི་ཐལ་འགྱུར་དུ་མ་ཡོད་པའི་ཕྱིར། དེར་ཐལ། བསྟན་བཅོས་ཀྱི་གཞུང་ཚིག་ཏུ་གྱུར་པའི་སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་དུ་མ་ཡོད་པའི་ཕྱིར།
ཁ་ཅིག་ན་རེ། ཐལ་འགྱུར་ཡིན་ན་ཐལ་ངག་ཡིན་པས་ཁྱབ་ཟེར་ན། སྒྲ་དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། རྟགས་གྲུབ་སྟེ། རྟགས་ཙམ་བཀོད་པའི་ཐལ་འགྱུར་ཡིན་པའི་ཕྱིར། རྩ་བར་འདོད་མི་ནུས་ཏེ། ཁྱོད་ཀྱི་ཐལ་བའི་ངག་མེད་པའི་ཕྱིར།
ཁ་ཅིག་ན་རེ། ཐལ་འགྱུར་དང་སུན་འབྱིན་དང་ཀླན་ཀ་གསུམ་དོན་གཅིག་ཡིན་ཟེར་ན། འོ་ན། སུན་འབྱིན་ཡིན་ན་ཐལ་འགྱུར་ཡིན་པས་ཁྱབ་པར་ཐལ། ཐལ་འགྱུར་དང་སུན་འབྱིན་དང་ཀླན་ཀ་གསུམ་དོན་གཅིག་ཡིན་པ་དེའི་ཕྱིར། འདོད་ན། སྔ་རྒོལ་གྱིས་སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་བཀོད་པ་ལ་ཕྱི་རྒོལ་གྱིས་རྟགས་མ་གྲུབ་ཅེས་ལན་བཏབ་པ་དེ་ཆོས་ཅན། ཐལ་འགྱུར་ཡིན་པར་ཐལ། སུན་འབྱིན་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། སྔ་རྒོལ་གྱིས་ཐལ་འགྱུར་བཀོད་པ་ལ་ཕྱི་རྒོལ་གྱིས་རྟགས་མ་གྲུབ་པ་དང་། ཁྱབ་པ་འགལ་བ་དང་ཁྱབ་མེད་ཀྱི་ལན་བཏབ་པ་རེ་རེ་ནས་སུན་འབྱིན་ཡིན་པའི་ཕྱིར། གཞན་ཡང་། སྔ་རྒོལ་གྱིས་སྒྲ་ཆོས་ཅན། མི་རྟག་སྟེ། བྱས་པའི་ཕྱིར་ཞེས་བཀོད་པ་ལ་ཕྱི་རྒོལ་གྱིས་བུམ་པའི་བྱས་པ་རྟགས་སུ་བཀོད་དམ། སྒྲའི་བྱས་པ་རྟགས་སུ་བཀོད་དམ། ཞེས་ཁྱད་པར་དུ་བརྟགས་ནས་ལན་བཏབ་པ་དེ་ཆོས་ཅན། ཐལ་འགྱུར་ཡིན་པར་ཐལ། སུན་འབྱིན་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། ལྟག་ཆོད་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ལྟག་ཆོད་ཡིན་ན་སུན་འབྱིན་ཡིན་པས་ཁྱབ་པའི་ཕྱིར། དེར་ཐལ། ལྟག་ཆོད་ཡིན་ན་སུན་འབྱིན་ལྟར་སྣང་ཡིན་པས་ཁྱབ་པའི་ཕྱིར།
ཁ་ཅིག་ན་རེ། ཐལ་འགྱུར་དང་སུན་འབྱིན་གཉིས་འགལ་བ་ཡིན་པར་ཐལ། སུན་འབྱིན་ཡིན་ན་ཐལ་འགྱུར་ཡིན་པས་མ་ཁྱབ་པའི་ཕྱིར་ཟེར་ན་མ་ཁྱབ། འདོད་མི་ནུས་ཏེ། སྒྲ་ཆོས་ཅན། མ་བྱས་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་འདི་སུན་འབྱིན་ཡིན་པའི་ཕྱིར། དེར་ཐལ། སྒྲ་རྟག་པར་ཁས་ལེན་པ་ལ་སུན་འབྱིན་ཡིན་པའི་ཕྱིར། དེར་ཐལ། སྒྲ་རྟག་པར་ཁས་ལེན་པ་རྣམས་ལ་སུན་འབྱིན་ཏུ་འཕངས་པ་ཡིན་པའི་ཕྱིར།
ཁ་ཅིག་ན་རེ། སྒྲ་ཆོས་ཅན། མི་རྟག་སྟེ། བྱས་པའི་ཕྱིར་ཞེས་པའི་སྦྱོར་བ་འདི་ཐལ་འགྱུར་ཡིན་པར་ཐལ། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་འདི་ཐལ་འགྱུར་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཐལ་འགྱུར་ཡིན་པར་ཐལ། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། དེར་ཐལ། ཁྱོད་རྟགས་གསལ་ཁྱབ་གསུམ་ག་ཕན་ཚུན་ཐ་དད་ཅིང་རྟགས་གསལ་ཁྱབ་གསུམ་ག་ཚད་མས་གྲུབ་པའི་ཐལ་འགྱུར་ཡང་དག་ཡིན་པའི་ཕྱིར། རྩ་བར་འདོད་ན། སྒྲ་ཆོས་ཅན། མི་རྟག་སྟེ་བྱས་པའི་ཕྱིར་ཞེས་པའི་སྦྱོར་བ་ཆོས་ཅན། ཐལ་འགྱུར་མ་ཡིན་པར་ཐལ། ཕ་རོལ་ལ་མི་འདོད་པའི་ཐལ་བ་འཕེན་པའི་རིགས་གནས་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རང་གི་ལྡོག་ཕྱོགས་གང་ལ་ཡང་ཐལ་བ་འཕངས་པ་མིན་པར་རང་ལུགས་ལ་སྒྲུབ་བྱེད་ཙམ་བཀོད་པ་ཡིན་པའི་ཕྱིར།
ཁ་ཅིག་ན་རེ། ཐལ་འགྱུར་ཡང་དག་ཡིན་ན། སྒྲུབ་བྱེད་འཕེན་པའི་ཐལ་འགྱུར་ཡང་དག་ཡིན་པས་ཁྱབ་ཟེར་ན། དུ་ལྡན་གྱི་ལ་ལ་ཆོས་ཅན། མེ་ཡོད་པར་ཐལ། དུ་བ་ཡོད་པའི་ཕྱིར་ཞེས་པའི་ཐལ་འགྱུར་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། དུ་ལྡན་གྱི་ལ་ལ་ཆོས་ཅན། མེ་ཡོད་པར་ཐལ། དུ་བ་ཡོད་པའི་ཕྱིར་ཞེས་པའི་ཐལ་འགྱུར་འདི་ཐལ་འགྱུར་ཡང་དག་ཡིན་པར་ཐལ། དུ་ལྡན་གྱི་ལ་ལ་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར་ཞེས་པའི་རྟགས་སྦྱོར་འདི་རྟགས་སྦྱོར་ཡང་དག་ཡིན་པའི་ཕྱིར། རྩ་བར་འདོད་ན། དུ་ལྡན་གྱི་ལ་ལ་ཆོས་ཅན། མེ་ཡོད་པར་ཐལ། དུ་བ་ཡོད་པའི་ཕྱིར་ཞེས་པའི་ཐལ་འགྱུར་ཆོས་ཅན། སྒྲུབ་བྱེད་འཕེན་པའི་ཐལ་འགྱུར་ཡང་དག་མ་ཡིན་པར་ཐལ། རང་གི་ཆོས་ལོག་རང་གི་ཤེས་འདོད་ཆོས་ཅན་གྱི་སྟེང་དུ་རང་གི་རྟགས་ལོག་སྒྲུབ་པ་ལ་ཚུལ་གསུམ་འཕེན་པའི་ཐལ་དག་རྣམ་དག་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་གི་ཆོས་ལོག་རང་གི་ཤེས་འདོད་ཆོས་ཅན་གྱི་སྟེང་དུ་རང་གི་རྟགས་ལོག་སྒྲུབ་པ་ལ་ཚུལ་གསུམ་འཕེན་པའི་ཐལ་དག་རྣམ་དག་མ་ཡིན་པར་ཐལ། ཁྱོད་ཀྱི་ཤེས་འདོད་ཆོས་ཅན་ངོས་འཛིན་པའི་ཚེ་དུ་ལྡན་གྱི་ལ་དེ་ངོས་འཛིན་དགོས། ཁྱོད་ཀྱི་ཆོས་ལོག་ངོས་འཛིན་པའི་ཚེ་ན་མེ་མེད་པ་དེ་ངོས་འཛིན་དགོས། ཁྱོད་ཀྱི་རྟགས་ལོག་ངོས་འཛིན་པའི་ཚེ་ན་དུ་བ་མེད་པ་དེ་ངོས་འཛིན་དགོས་ལ་དེ་ལྟར་ན་དུ་ལྡན་གྱི་ལ་ལ་ཆོས་ཅན། དུ་བ་མེད་དེ། མེ་མེད་པའི་ཕྱིར་ཞེས་པའི་རྟགས་སྦྱོར་འདི་རྟགས་སྦྱོར་ཡང་དག་ཏུ་འགྱུར་དགོས་པ་ལ་དེ་མི་འགྱུར་བ་ཡིན་པའི་ཕྱིར།
ཁ་ཅིག་ན་རེ། སྒྲ་ཆོས་ཅན། བྱས་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་འདི་ཐལ་འགྱུར་ཡང་དག་ཡིན་ཟེར་ན། སྒྲ་ཆོས་ཅན། བྱས་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་དངོས་ཁྱབ་གྲུབ་པར་ཐལ། ཁྱོད་ཐལ་འགྱུར་ཡང་དག་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཐལ་འགྱུར་ཡང་དག་ཡིན་ན་ཁྱོད་ཀྱི་དངོས་ཁྱབ་གྲུབ་པས་ཁྱབ་པའི་ཕྱིར། མ་གྲུབ་ན། ཐལ་འགྱུར་ཡང་དག་ཡིན་ན་ཁྱོད་ཀྱི་དངོས་ཁྱབ་གྲུབ་པས་ཁྱབ་པར་ཐལ། སྒྲུབ་བྱེད་འཕེན་པའི་ཐལ་འགྱུར་ཡང་དག་ཡིན་ན་ཁྱོད་ཀྱི་དངོས་ཁྱབ་གྲུབ་པས་ཁྱབ་པ་གང་ཞིག ། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་ཡིན་ན་ཁྱོད་ཀྱི་དངོས་ཁྱབ་གྲུབ་པས་ཁྱབ་པའི་ཕྱིར། རྟགས་དང་པོ་མ་གྲུབ་ན། སྒྲུབ་བྱེད་འཕེན་པའི་ཐལ་འགྱུར་ཡང་དག་ཡིན་ན་ཁྱོད་ཀྱི་རྟགས་གསལ་གཉིས་ཀ་མ་གྲུབ་པས་ཁྱབ་ཀྱང་། ཁྱོད་ཀྱི་དངོས་ཁྱབ་གྲུབ་པས་ཁྱབ་པའི་ཕྱིར། རྟགས་གཉིས་པ་གྲུབ་པ་ཡིན་ཏེ། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་ཡིན་ན་ཁྱོད་ཀྱི་རྟགས་གསལ་ཁྱབ་གསུམ་ག་གྲུབ་པས་ཁྱབ་པའི་ཕྱིར།
ཁ་ཅིག་ན་རེ། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་ཆོས་ཅན། ཁྱོད་ཀྱི་རྟགས་གསལ་ཁྱབ་གསུམ་ག་གྲུབ་པར་ཐལ། ཁྱོད་སྒྲུབ་བྱེད་མི་འཕེན་པའི་ཐལ་འགྱུར་ཡང་དག་ཡིན་པའི་ཕྱིར། མ་གྲུབ་ན། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་སྒྲུབ་བྱེད་མི་འཕེན་པའི་ཐལ་འགྱུར་ཡང་དག་ཡིན་པར་ཐལ། ཐལ་འགྱུར་ཡང་དག་ཐལ་འགྱུར་ཡང་དག་ཡིན་པའི་ཕྱིར། མ་གྲུབ་ན། ཐལ་འགྱུར་ཡང་དག་ཐལ་འགྱུར་ཡང་དག་ཡིན་པར་ཐལ། ཐལ་འགྱུར་ཐལ་འགྱུར་ཡིན་པའི་ཕྱིར། མ་གྲུབ་ན། ཐལ་འགྱུར་ཐལ་འགྱུར་ཡིན་པར་ཐལ། ཐལ་འགྱུར་ཡོད་པའི་ཕྱིར་ཟེར་ན་མ་ཁྱབ། གོང་དུ་འདོད་ན། རྟགས་སྦྱོར་ཡང་དག་རྟགས་སྦྱོར་ཡང་དག་ཡིན་པར་ཐལ། ཐལ་འགྱུར་ཡང་དག་ཐལ་འགྱུར་ཡང་དག་ཡིན་པའི་ཕྱིར། རྟགས་ཁས། འདོད་མི་ནུས་ཏེ། རྟགས་སྦྱོར་ཡང་དག་གི་ཤེས་འདོད་ཆོས་ཅན་དང་ཚུལ་གསུམ་ག་རེ་རེ་ནས་མ་གྲུབ་པ་ཡིན་པའི་ཕྱིར།
རང་གི་ལུགས་ལ། རྒོལ་བ་སྐབས་བབས་ལ་མི་འདོད་པའི་ཐལ་བ་འཕེན་པའི་རིགས་གནས་དེ་ཐལ་འགྱུར་གྱི་མཚན་ཉིད། ཐལ་འགྱུར་ལ་དབྱེ་ན། ཐལ་འགྱུར་ལྟར་སྣང་དང་ཐལ་འགྱུར་ཡང་དག་གཉིས་ཡོད། ཐལ་འགྱུར་ལྟར་སྣང་ལ་དབྱེ་ན། སྔ་རྒོལ་ཐལ་འགྱུར་འགོད་པ་ལ་མི་མཁས་པའི་དབང་གིས་གསལ་བ་ཙམ་བཀོད་པའི་ཐལ་འགྱུར་དང་། རྟགས་ཙམ་བཀོད་པའི་ཐལ་འགྱུར་དང་། རྟགས་གསལ་ཐ་མི་དད་ཀྱི་ཐལ་འགྱུར་དུ་མ་ཞིག་ཡོད་པས། དང་པོ་ནི། དངོས་པོ་ཡིན་པར་ཐལ་ཞེས་པ་ལྟ་བུ་དང། གཉིས་པ་ནི། གཞི་གྲུབ་པའི་ཕྱིར་ཞེས་པ་ལྟ་བུ་དང་། གསུམ་པ་ནི། སྒྲ་ཆོས་ཅན། དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་སོགས་རྟགས་གསལ་ཐ་མི་དད་དུ་བཀོད་པ་དུ་མ་ཞིག་ཡོད་པའི་ཕྱིར། ཐལ་འགྱུར་ཡང་དག་གི་མཚན་ཉིད་ཡོད་དེ། ཕ་རོལ་ལ་མི་འདོད་པའི་ཐལ་བ་འཕེན་པར་བྱེད་པའི་ཐལ་ངག་རྣམ་དག་དེ་ཡིན་པའི་ཕྱིར། ཐལ་འགྱུར་ཡང་དག་ལ་དབྱེ་ན་གཉིས་ཡོད་དེ། སྒྲུབ་བྱེད་འཕེན་པའི་ཐལ་འགྱུར་ཡང་དག་དང་སྒྲུབ་བྱེད་མི་འཕེན་པའི་ཐལ་འགྱུར་ཡང་དག་གཉིས་ཡོད། སྒྲུབ་བྱེད་འཕེན་པའི་ཐལ་འགྱུར་ཡང་དག་གི་མཚན་ཉིད་ཡོད་དེ། རང་གི་ཆོས་ལོག་རང་གི་ཤེས་འདོད་ཆོས་ཅན་གྱི་སྟེང་དུ་རང་གི་རྟགས་ལོག་སྒྲུབ་པ་ལ་ཚུལ་གསུམ་འཕེན་པའི་ཐལ་ངག་རྣམ་དག་དེ་ཡིན་པའི་ཕྱིར། མཚན་གཞི་ནི་ཡོད་དེ། སྒྲ་ཆོས་ཅན། མ་བྱས་པ་ཡིན་པར་ཐལ། རྟག་པ་ཡིན་པའི་ཕྱིར་ཞེ་པའི་ཐལ་འགྱུར་དེ་དེ་ཡིན་པའི་ཕྱིར། སྒྲ་ཆོས་ཅན། མ་བྱས་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་འདིའི་ཤུགས་ལ་འཕངས་པའི་རྟགས་སྦྱོར་ཡོད་དེ། སྒྲ་ཆོས་ཅན། མི་རྟག་སྟེ། བྱས་པའི་ཕྱིར་ཞེས་པའི་སྦྱོར་བདེ་དེ་ཡིན་པའི་ཕྱིར། དེར་ཐལ། སྒྲ་དེ་དེའི་ཤེས་འདོད་ཆོས་ཅན་དང་། བྱས་པ་དེ་དེའི་ཆོས་ལོག་དང་། མི་རྟག་པ་དེ་དེའི་རྟགས་ལོག་ལ་ངོས་འཛིན་དགོས་པ་ཡིན་པའི་ཕྱིར། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་གི་མཚན་ཉིད་ཡོད་དེ། ཐལ་འགྱུར་ཡང་དག་གང་ཞིག ། ཁྱོད་ཀྱི་ཆོས་ལོག་ཁྱོད་ཀྱི་ཤེས་འདོད་ཆོས་ཅན་གྱི་སྟེང་དུ་ཁྱོད་ཀྱི་རྟགས་ལོགསྒྲུབ་པ་ལ་ཚུལ་གསུམ་སྒྲུབ་བྱེད་བཀོད་པ་མ་ཚང་བ་དེ་ཡིན་པའི་ཕྱིར། མཚན་གཞི་ནི་ཡོད་དེ། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་དེ་ཡིན་པའི་ཕྱིར། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཆོས་ལོག་ཁྱོད་ཀྱི་ཤེས་འདོད་ཆོས་ཅན་གྱི་སྟེང་དུ་ཁྱོད་ཀྱི་རྟགས་ལོག་སྒྲུབ་པ་ལ་ཚུལ་གསུམ་སྒྲུབ་བྱེད་བཀོད་པ་མཚང་བ་ཡིན་ཏེ༑ ཁྱོད་ཀྱི་ཆོས་ལོག་ངོས་འཛིན་པའི་ཚེ་ན་རྟག་པ་དེ་ངོས་འཛིན་དགོས། ཁྱོད་ཀྱི་རྟགས་ལོག་ངོས་འཛིན་པའི་ཚེ་ན་མ་བྱས་པ་དེ་ངོས་འཛིན་དགོས། ཤེས་འདོད་ཆོས་ཅན་ངོས་འཛིན་པའི་ཚེ་ན་སྒྲ་དེ་ངོས་འཛིན་དགོས་ལ། དེ་ལྟར་ན་སྒྲ་ཆོས་ཅན༑ མ་བྱས་པ་ཡིན་ཏེ། རྟག་པ་ཡིན་པའི་ཕྱིར་ཞེས་པའི་སྦྱོར་བ་འདིའི་རྟགས་ཀྱི་ཚུལ་གསུམ་ཚང་ཟེར་དགོས་ཀྱང་། དེ་མི་ཚང་བ་ཡིན་པའི་ཕྱིར།
དེ་ལ་རྩོད་པ་སྤོང་བ་ལ། ཁ་ཅིག་ན་རེ། སྒྲུབ་བྱེད་འཕེན་པའི་ཐལ་འགྱུར་ཡང་དག་ཆོས་ཅན། ཁྱོད་རང་གི་ཆོས་ལོག་རང་གི་ཤེས་འདོད་ཆོས་ཅན་གྱི་སྟེང་དུ་རང་གི་རྟགས་ལོག་སྒྲུབ་པ་ལ་ཚུལ་གསུམ་འཕེན་པའི་ཐལ་ངག་རྣམ་དག་ཡིན་པར་ཐལ། དེ་ཁྱོད་ཀྱི་མཚན་ཉིད་ཡིན་པའི་ཕྱིར་ཟེར་ན་མ་ཁྱབ། འོ་ན། ཁྱོད་རང་ལ་མཚོན་བྱ་མ་ཡིན་པ་ཆོས་ཅན། བཏགས་ཡོད་ཆོས་གསུམ་མ་ཚང་པ་ཡིན་པར་ཐལ། དེ་ཁྱོད་ཀྱི་མཚན་ཉིད་ཡིན་པའི་ཕྱིར། འདོད་མི་ནུས་ཏེ། བཏགས་ཡོད་ཆོས་གསུམ་ཚང་བ་ཡིན་པའི་ཕྱིར། དེར་ཐལ། མཚོན་བྱ་ཡིན་པའི་ཕྱིར།
ཁ་ཅིག་ན་རེ། ཐལ་འགྱུར་ཡང་དག་ཆོས་ཅན། ཐལ་འགྱུར་ཡང་དག་ཡིན་པར་ཐལ། ཁྱོད་ཀྱི་རྟགས་གསལ་རྩོད་གཞི་གསུམ་ག་ངོས་འཛིན་ཚུལ་ཡོད་པའི་ཕྱིར། དེར་ཐལ། སྒྲ་དེ་ངེའི་རྩོད་གཞི་དང་མི་རྟག་པ་དེ་དེའི་གསལ་བ་དང་། བྱས་པ་དེ་དེའི་རྟགས་སུ་བཀོད་པ་ཡིན་པའི་ཕྱིར། འདོད་ན། ཐལ་འགྱུར་ཡང་དག་ཆོས་ཅན། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་ཡིན་པར་ཐལ། ཐལ་འགྱུར་ཡང་དག་གང་ཞིག ། སྒྲ་དེ་ཁྱོད་ཀྱི་རྩོད་གཞི་དང་མི་རྟག་པ་དེ་ཁྱོད་ཀྱི་གསལ་བ་དང་། བྱས་པ་དེ་ཁྱོད་ཀྱི་རྟགས་སུ་བཀོད་པ་ཡིན་པའི་ཕྱིར།
གཞན་ཡང་། ཐལ་འགྱུར་གྱི་རྟགས་གསལ་རྩོད་གཞི་གསུམ་ག་ངོས་འཛིན་པའི་ཚེ་ན་སྒྲ་དེ་ངོས་འཛིན་པ་ཡིན་པར་ཐལ། ཐལ་འགྱུར་ཡང་དག་གི་རྟགས་གསལ་རྩོད་གཞི་གསུམ་ག་ངོས་འཛིན་ཚུལ་ཡོད་པ་གང་ཞིག ། དེ་གཉིས་འདྲ་བའི་ཕྱིར། འདོད་ན། ཐལ་འགྱུར་ཆོས་ཅན། སྒྲ་རྟགས་གསལ་གཉིས་ཀར་བཀོད་པའི་ཐལ་འགྱུར་ཡིན་པར་ཐལ། སྒྲས་རྩོད་གཞི་དང་སྒྲས་གསལ་བ་དང་སྒྲས་རྟགས་བྱས་པའི་ཐལ་འགྱུར་ཡིན་པའི་ཕྱིར། འདོད་ན། ཐལ་འགྱུར་ཆོས་ཅན། རྟགས་གསལ་ཐ་མི་དད་ཀྱི་ཐལ་འགྱུར་ཡིན་པར་ཐལ། སྒྲ་རྟགས་གསལ་གཉིས་ཀར་བཀོད་པའི་ཐལ་འགྱུར་ཡིན་པའི་ཕྱིར། འདོད་ན། ཐལ་འགྱུར་ཆོས་ཅན། ཁྱོད་ཡིན་ན་རྟགས་གསལ་ཐ་མི་དད་ཀྱི་ཐལ་འགྱུར་ཡིན་པས་ཁྱབ་པར་ཐལ། ཁྱོད་རྟགས་གསལ་ཐ་མི་དད་ཀྱི་ཐལ་འགྱུར་ཡིན་པའི་ཕྱིར། རྟགས་ཁས། འདོད་མི་ནུས། །
རྩོམ་སྒྲིག་པ། བློ་བཟང་བཀྲ་ཤིས།