རྒྱལ་ཚབ་དར་མ་རིན་ཆེན།

དེ་ལ་སྲས་ཀྱི་ཐུ་བོ་རྒྱལ་ཚབ་དར་མ་རིན་ཆེན་ནི། སྔོན་དུས་ཡུན་རིང་པོ་ནས་བྱང་ཆུབ་མཆོག་ཏུ་ཐུགས་བསྐྱེད་དེ་རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་སློབ་བཞིན་པ་ལས། ཞིང་འདིར་འཇམ་མགོན་བླ་མའི་བསྟན་པ་སྤེལ་བའི་སླད་དུ་སྨོན་ལམ་གྱི་མཐུས་བྱོན་པ་ཞིག་སྟེ། སེམས་དཔའ་ཆེན་པོ་འདི་གང་དུ་འཁྲུངས་པའི་ཡུལ་ནི། དམ་པ་དུ་མས་བྱིན་གྱིས་བརླབས་ཤིང་བཀྲ་ཤིས་པའི་དགེ་མཚན་དུ་མ་དང་ལྡན་པ་གཙང་མྱང་སྟོད་ཀྱི་སའི་ཆ་རི་ནང་ཞེས་བྱ་བ་སྟེ་རི་ནང་གི་ལུང་ལག་མཛོ་ཆད་ཅེས་བྱ་བར་ཡབ་བློན་པོ་རྦའི་རིགས་རྒྱུད་རྟ་དཔོན་བ་དང༌། ཡུམ་ཇོ་མོ་ཤེས་རབ་ཅེས་བྱ་བའི་སྲས་སུ་རབ་བྱུང་དྲུག་པའི་ཤིང་ཕོ་འབྲུག་གི་ལོ་ལ་བཀྲ་ཤིས་པའི་དགེ་མཚན་དུ་མ་དང་བཅས་ཏེ་འཁྲུངས། དགུང་ལོ་བཅུ་བཞེས་པ་ཆུ་མོ་གླང་གི་ལོ་གདན་ས་ཆེན་པོ་གནས་རྙིང་དུ་མཁན་ཆེན་རིན་ཆེན་རྒྱལ་མཚན་པ་དང༌། བྲག་ཐོག་པ་གཞོན་ནུ་ཚུལ་ཁྲིམས་གཉིས་ལ་མཁན་སློབ་བཞུས་ནས་ཚིགས་སྔ་མ་དགེ་ཚུལ་གྱི་སྡོམ་པ་མནོས། མཚན་དར་མ་རིན་ཆེན་ཞེས་གསོལ། དེ་ནས་མཁན་སློབ་ཀྱི་སྤྱན་སྔར་ཇི་ལྟར་ཞལ་གྱིས་བཞེས་པའི་སོ་ཐར་གྱི་བསླབ་བྱ་རྣམས་མིག་གི་འབྲས་བུ་ལྟར་བསྲུང་ཞིང་སློབ་དཔོན་དཔལ་མགོན་པའི་དྲུང་དུ་ཡི་གེ་འབྲི་ཀློག་ཕུལ་དུ་ཕྱིན་པར་བསླབས། དེ་ནས་མཁས་པའི་དབང་པོ་ཀུན་དགའ་དཔལ་ཡོངས་འཛིན་དུ་བསྟེན་ཏེ་ཚད་མ་རྣམ་འགྲེལ་དང་ཚད་མ་རྣམ་ངེས་ཆ་ལག་དང་བཅས་པ་སྦྱངས། དེ་ནས་མཁས་པའི་དབང་པོ་རི་ནང་པ་རིན་ཆེན་རྡོ་རྗེ་ཡོངས་འཛིན་དུ་བསྟེན་ཏེ་ཕར་ཕྱིན་གྱི་གཞུང་རྣམས་ལ་སྦྱངས། དེ་ནས་མཁས་པའི་དབང་པོ་བྲན་མ་བྲག་ཁ་བ་ཆོས་རྗེ་དོན་གྲུབ་རིན་ཆེན་གྱི་དྲུང་དུ་མངོན་པ་ལ་སྦྱངས། འདི་རྗེ་རིན་པོ་ཆེའི་དགེ་ཚུལ་གྱི་མཁན་པོ་ཆོས་རྗེ་དོན་གྲུབ་རིན་ཆེན་ཞེས་པ་དེ་མིན་གྱི་དེ་དང་མཚན་གཅིག་པ་མྱང་སྟོད་པ་ཞིག་གོ །དེ་ནས་མཁས་པའི་དབང་པོ་བློ་གྲོས་བཟང་པོའམ་དཀའ་བཞི་བ་བློ་གསལ་ཞེས་ཡོངས་སུ་གྲགས་པ་དེའི་དྲུང་དུ་འདུལ་བ་སྦྱངས། གཞན་ཡང་ལོ་ཆེན་སྐྱབས་མཆོག་དཔལ་བཟང་དང༌། ཤངས་པ་ཀུན་མཁྱེན་པ་སོགས་དགེ་བའི་བཤེས་གཉེན་དུ་མ་ལ་མདོ་སྔགས་ཀྱི་ཆོས་མང་དུ་གསན། ཁྱད་པར་གངས་ཅན་གྱི་ཤིང་རྟ་ཆེན་པོ་རྗེ་བཙུན་རེད་མདའ་བའི་ཞབས་རྡུལ་སྤྱི་བོས་བསྟེན་ཏེ་ཕར་ཕྱིན་ཚད་མ་འདུལ་བ་མངོན་པ་དབུ་མ་སོགས་མདོ་ཕྱོགས་ཀྱི་གཞུང་རྣམས་དང་དཔལ་གསང་བ་འདུས་པ་སོགས་སྔགས་ཀྱི་གཞུང་རྣམས་ཕལ་ཆེ་བ་གསན་ཏེ་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་དུ་སོན་པའི་མཁས་པའི་དབང་པོར་གྱུར་ཏེ་རྗེ་བཙུན་རེད་མདའ་བའི་སྲས་ཀྱི་ཐུ་བོ་གཞུང་ལུགས་རབ་འབྱམས་ཤེས་པའི་བཤེས་གཉེན་བདུན་གྱི་ནང་ཚན་གཅིག་ཡིན་ནོ། །དེ་ནས་དཔལ་ལྡན་ས་སྐྱ་སོགས་གཙང་ཕྱོགས་ཀྱི་ཆོས་གྲྭ་ཆེན་པོ་རྣམས་སུ་དཀའ་བཅུའི་གྲྭ་སྐོར་མཛད་དེ་སྙན་པའི་གྲགས་པས་སའི་སྟེང་ཁྱབ་པར་གྱུར་ཏོ།།

དེ་ནས་དགུང་ལོ་ཉེར་ལྔ་བཞེས་པ་ས་ཕོ་འབྲུག་གི་ལོ་ལ་གཙང་ལ་སྟོད་ལྡོག་ལྷོ་པ་ཆོས་རྗེ་ཀུན་དགའ་དཔལ་བས་མཁན་པོ། རྗེ་བཙུན་རེད་མདའ་བས་ལས་སློབ། རྗེ་གངས་ཅན་ཀུན་དགའ་དཔལ་བས་གསང་སྟོན་མཛད། འདུལ་བ་འཛིན་པ་དཔལ་ལྡན་བློ་གྲོས་དང་བློ་གྲོས་མཚུངས་མེད་སོགས་དད་པའི་དགེ་འདུན་ཉེར་གཉིས་ཀྱི་དབུས་སུ་བསྙེན་པར་རྫོགས་པའི་སྡོམ་པ་རྣམ་པར་དག་པ་མནོས་ནས་བསླབ་པ་རིན་པོ་ཆེ་མིག་གི་འབྲས་བུ་ལྟར་གཅེས་སྤྲས་སུ་མཛད་དེ་འཕགས་མཆོག་ཉེ་བར་འཁོར་སླར་ཡང་གངས་རིའི་ཁྲོད་དུ་བྱོན་པ་ཇི་ལྟ་བར་གྱུར་ཏོ། །དེ་ནས་དབུས་ཕྱོགས་ཀྱི་གྲྭ་ས་རྣམས་སུ་གྲྭ་སྐོར་མཛད་དེ་རྩེད་ཐང་གི་གྲྭ་སྐོར་གྲུབ་ནས་རྗེ་རིན་པོ་ཆེ་གཉལ་སྟོད་རྭ་གྲོང་དུ་བཞུགས་པའི་ཚེ་མཇལ་དུ་བྱོན། ཞལ་གྱི་དཀྱིལ་འཁོར་མཐོང་བ་ཙམ་གྱིས་དད་པའི་སྤུ་ལོང་གཡོས་ཤིང༌། སྐུ་མདུན་དུ་བཞུགས་ཏེ་ཆོས་ཀྱི་བཀའ་མཆིད་སྩོལ་བར་ཞུས་པས་རྗེ་རིན་པོ་ཆེས་སེམས་དཔའ་ཆེན་པོ་འདི་རིན་པོ་ཆེ་ལྟ་བུའི་གདུལ་བྱར་གཟིགས་ནས་གསུང་རབ་དགོངས་འགྲེལ་དང་བཅས་པའི་སྙིང་པོའི་དོན་ལམ་གྱི་དཀའ་གནད་རྣམས་དྲི་མ་མེད་པའི་རིགས་པའི་ལམ་ནས་དྲངས་ཏེ་རྒྱ་ཆེར་གསུངས་པས་ཡིད་ཆེས་ཀྱི་དད་པ་བརྟན་པོ་འཁྲུངས་ཏེ་འདི་ལྟ་བུའི་དམ་པའི་མགོན་ལ་བསྟེན་པ་ལས་ལྷག་པ་གང་ཡང་མ་མཆིས་ཤིང༌། རྒྱལ་བའི་གདུང་འཚོབ་བཤེས་གཉེན་དམ་པ་འདི་ལྟ་བུ་བོར་ནས་གཞན་དུ་འགྲོ་བ་ག་ལ་རིགས་སྙམ་དུ་ཞབས་ཀྱི་པདྨོ་ལ་སྤྱི་བོས་གཙུགས་ཏེ་ད་ནས་བཟུང་སྟེ་ཇི་སྲིད་འཚོའི་བར་དུ་ཞབས་ཀྱི་པདྨོ་ལ་བསྟེན་ཆོག་པ་དགོས་ཞེས་གསོལ་བ་ནན་ཆེར་བཏབ་པས་རྗེ་རིན་པོ་ཆེས་ཀྱང་དགྱེས་བཞིན་དུ་ཞལ་གྱིས་བཞེས། དེ་ནས་བཟུང་སྟེ་རྗེ་རིན་པོ་ཆེའི་ཞབས་དྲུང་དུ་བཅར་བཞུགས་མཛད་ནས་བྱང་ཆུབ་ལམ་གྱི་རིམ་པའི་ཁྲིད་དང༌། བསྐྱེད་རྫོགས་ཀྱི་ཁྲིད་སོགས་མདོ་སྔགས་ཀྱི་ལུང་ཁྲིད་མན་ངག་ཐམས་ཅད་ཡོངས་སུ་རྫོགས་པ་གསན། དེ་ཡང་ཐུགས་རབ་ཀྱི་རླབས་ཕུལ་དུ་ཕྱིན་པས་རྗེ་རིན་པོ་ཆེས་ཆོས་གང་གསུངས་ཐམས་ཅད་ལན་རེས་བུམ་པ་གང་བྱོ་ལྟ་བུར་ཐུགས་ལ་ཆུད་དེ། རྗེ་རིན་པོ་ཆེས་གནམ་རྩེ་ལྟེང་དུ་འདུལ་བའི་བསླབ་བྱ་རྒྱས་པར་གསུངས་པའི་ཚེ་གང་གསུངས་ཐམས་ཅད་ཐུགས་སུ་ཆུད་དེ། དེ་མ་ཐག་ཟིན་བྲིས་སུ་བཏབ་པ་བསླབ་བྱ་གནམ་རྩེ་ལྟེང་མར་ཡོངས་སུ་གྲགས་པ་དང༌། རྗེ་རིན་པོ་ཆེས་སེ་ར་ཆོས་སྡིངས་སུ་མ་རྒྱུད་རྫོགས་རིམ་དཔྱིད་ཐིག་གསུངས་པའི་ཚེ་གང་གསུང་ཐམས་ཅད་ཐུགས་སུ་ཆུད་དེ་དེ་མ་ཐག་ཟིན་བྲིས་སུ་བཏབ་པ་རྫོགས་རིམ་དཔྱད་ཀྱི་ཐིག་ལེའི་ཟིན་བྲིས་ལྟ་བུའོ། །དེ་ནས་ས་མོ་གླང་གི་ལོ་ཆོ་འཕྲུལ་མཆོད་པ་གྲུབ་རྗེས་དགའ་ལྡན་རྣམ་པར་རྒྱལ་བའི་གླིང་འདེབས་པར་མཛད་ཚེ་སེམས་དཔའ་ཆེན་པོ་འདི་དང་འདུལ་འཛིན་གྲགས་པ་རྒྱལ་མཚན་གཉིས་ཀྱིས་ཁུར་བཞེས་ཏེ་དགེ་འདུན་ལ་གནང་བ་ཞུ་བ་དང༌། རྡོ་བཏེག་པའི་མཐའ་ལས་བྱུང་བའི་རུང་ཁང་གཅོད་པ་དང༌། ལག་གི་བླ་བསྐོ་བ་སོགས་འདུལ་བ་ནས་ཇི་ལྟར་གསུངས་པ་ཐམས་ཅད་ཇི་བཞིན་ཕྱག་ལེན་ལ་བཏབ་པས་མཁར་ལས་ཀྱིས་ཀྱང་རྒྱལ་བའི་བསྟན་པ་གཞི་ནས་གསོ་བའི་བྱ་བ་མཛད་ཅིང༌། རྟག་ཏུ་ངུས་ཆོས་འཕགས་བསྟེན་པ་ཇི་ལྟ་བ་བཞིན་དུ་ལུས་སྲོག་ལོངས་སྤྱོད་གང་ལའང་མི་ལྟ་བར་རྗེ་རིན་པོ་ཆེའི་བཀའ་བཞིན་བསྒྲུབ་པ་ལ་ནམ་ཡང་གཡེལ་བ་མེད་པར་མཛད་དོ། །དེ་ལྟར་མཛད་པས་རྗེ་རིན་པོ་ཆེའི་སྲས་ཀྱི་ཐུ་བོར་གྱུར་ཏེ་རྗེ་རིན་པོ་ཆེ་ཞལ་བཞུགས་དུས་ཉིད་ནས་རྗེའི་སློབ་མ་ཕལ་ཆེར་བདག་ཉིད་ཆེན་པོ་འདིའི་ཞབས་ལ་གཏུག་ཅིང༌། རྗེ་རིན་པོ་ཆེས་རབ་བྱུང་བསྙེན་རྫོགས་གང་གནང་བ་ཐམས་ཅད་བདག་ཉིད་ཆེན་པོ་འདིས་སྐྱོང་བར་མཛད་དོ། །དེ་ནས་རྗེ་རིན་པོ་ཆེ་ཞིང་གཤེགས་པ་ལ་ཕྱོགས་པའི་ཚེ་ཇི་ལྟར་ལྷའི་བུ་དམ་པ་ཏོག་དཀར་པོས་འཛམ་བུའི་གླིང་དུ་འབྱོན་པ་ལ་ཕྱོགས་པའི་ཚེ་མི་ཕམ་མགོན་པོ་རྒྱལ་ཚབ་ཏུ་དབང་བསྐུར་བ་ཇི་ལྟ་བ་བཞིན་དུ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་ཀྱང་པཎ་ཞྭ་སྣེ་རིང་དང་ན་བཟའ་གོས་བེར་བཅས་བདག་ཉིད་ཆེན་པོ་འདི་ལ་གནང་སྟེ་རྒྱལ་ཚབ་ཏུ་དོན་གྱིས་བསྐོ་བར་མཛད། དེ་ནས་དགུང་ལོ་ང་དྲུག་བཞེས་པ་ས་མོ་ཕག་གི་ལོ་ཧོར་ཟླ་བཅུ་གཅིག་པའི་གཟའ་སྐར་དུས་སྦྱོར་བཟང་པོ་ལ་རི་བོ་དགེ་ལྡན་དུ་རྒྱལ་བ་ཙོང་ཁ་པ་ཆེན་པོའི་རྒྱལ་ཚབ་ཏུ་དབང་བསྐུར་ནས་གདན་ས་ལོ་བཅུ་གསུམ་བར་དུ་མཛད་དེ་བཤད་སྒྲུབ་གཉིས་ཀྱི་སྒོ་ནས་གདུལ་བྱ་རྣམས་སྨིན་གྲོལ་ལ་འགོད་པར་མཛད་དོ།།

བར་སྐབས་ཤིག་གནས་རྙིང་དུ་བྱོན། དགེ་འདུན་རྣམས་ལ་ཆོས་དང་ཟང་ཟིང་གི་སྐྱེས་རྒྱ་ཆེན་པོ་མཛད། མཁན་ཆེན་རིན་ཆེན་རྒྱལ་མཚན་པ་དང༌། མཁན་ཆེན་རིན་ཆེན་གྲུབ་པ་གཉིས་ལ་གན་གོས་རེ་ཕུལ། ཇ་དཀར་གྱི་མང་ཇ། དགེ་འདུན་རྣམས་ལ་དར་འགྱེད། མཚན་ཉིད་པ་དང་ཆོས་འཆད་སྤྱི་ལ་དགེ་རྒྱུན་ནར་མའི་གཞི་རྟེན་དང་གན་གོས་རེ་འབུལ་བར་མཛད། ཁྱད་པར་ཞི་བར་གཤེགས་པའི་སྔ་ལོའི་གོང་ཙམ་དུ་གནས་རྙིང་དུ་ཕེབས། མཁན་ཆེན་རིན་ཆེན་རྒྱལ་མཚན་པའི་ནང་རྟེན་གྱི་དྲུང་དུ་གུ་གུ་ཤའི་མཎྜལ་རིན་པོ་ཆེ་སྣ་ཚོགས་ལས་གྲུབ་པའི་རྒྱན་དང་བཅས་པ་དང༌། དགེ་འདུན་རྣམས་ལ་མང་ཇ་མང་པོ་དང༌། ཇ་དཀར་གྱི་གྲལ་འགྱེད། འབུལ་རྐྱེན་བཟང་པོ་དང་བཅས་པ་མཛད། མཁན་ཆེན་རིན་ཆེན་གྲུབ་པ་ལ་དངུལ་ལས་གྲུབ་པའི་རྒྱལ་བ་རིགས་ལྔ། དངུལ་གྱི་སྤྱི་བླུགས། ན་བཟའ་སོགས་འབུལ་བ་མཛད། དེ་དུས་མཁས་གྲུབ་རྗེ་དང་ཞལ་འཛོམ་སྟེ་དགའ་ལྡན་གྱི་གདན་སར་ཕེབས་དགོས་པའི་བཀའ་གྲོས་མཛད། ཉིང་རོ་སྨན་ཆུ་ཁར་མཁས་གྲུབ་གང་བཟང་པའི་དྲུང་དུ་གོས་ཡུག་ངུར་ཁ་གཅིག་གིས་གཙོས་འབུལ་བ་མཛད། མདོར་ན་གནས་རྙིང་དུ་དགེ་ལྡན་གདན་སར་མ་ཕེབས་པའི་གོང་དང་ཕེབས་ནས་ཀྱང་བྱོན་པ་བཅས་ཆོས་འཁོར་ལན་བཞིར་བསྐོར། དེ་ནས་དགུང་ལོ་དྲུག་ཅུ་རེ་བརྒྱད་བཞེས་པ་ལྕགས་མོ་ཕག་ལོ་ཧོར་ཟླ་བཅུ་པའི་གཟའ་ཚེས་དགེ་བ་ལ། མཁས་གྲུབ་དགེ་ལེགས་དཔལ་བཟང་པོ་ཞེས་མཚན་ཡོངས་སུ་གྲགས་པ་ཉིད་དགེ་ལྡན་གྱི་གདན་སར་རང་གི་རྒྱལ་ཚབ་ཏུ་དབང་བསྐུར་བར་མཛད་དོ།།

བདག་ཉིད་ཆེན་པོ་འདིས་ཕྱི་རབས་ཀྱི་གདུལ་བྱ་རྣམས་ཀྱི་དོན་མཛད་པའི་བསྟན་བཅོས་ཀྱང་མང་དུ་བཞུགས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྫོགས་པའི་རྒྱན་གྱི་འགྲེལ་པ་དོན་གསལ་བའི་རྣམ་བཤད་སྙིང་པོ་རྒྱན། དབུ་མ་རིན་ཆེན་ཕྲེང་བའི་རྣམ་བཤད་སྙིང་པོའི་དོན་གསལ་བར་བྱེད་པ། དབུ་མ་བཞི་བརྒྱ་པའི་རྣམ་བཤད་ལེགས་བཤད་སྙིང་པོ། བདེན་གཉིས་ཀྱི་རྣམ་གཞག་དང་ལྟ་བའི་ཁྲིད་ཡིག་རིན་པོ་ཆེའི་ཕྲེང་བ། དབུ་མ་རྩ་བ་ཤེས་རབ་ཀྱི་དཀའ་གནད་ཆེན་པོ་བརྒྱད་ཀྱི་བཤད་པ། བསྟན་བཅོས་ཚད་མ་རྣམ་ངེས་ཀྱི་ཊཱིཀ་ཆེན་དགོངས་པ་རབ་གསལ། ཚད་མ་རིགས་ཐིག་གི་འགྲེལ་བ་ལེགས་བཤད་སྙིང་པོའི་གཏེར། ཚད་མ་རྣམ་འགྲེལ་གྱི་ཚིག་ལེའུར་བྱས་པའི་རྣམ་བཤད་ཐར་ལམ་ཕྱིན་ཅི་མ་ལོག་པར་གསལ་བར་བྱེད་པ། ཐེག་པ་ཆེན་པོ་རྒྱད་བླ་མའི་ཊཱིཀྐ། མངོན་པ་ཀུན་ལས་བཏུས་ཀྱི་ཊཱིཀྐ་ལེགས་པར་བཤད་པ་ཆོས་མངོན་རྒྱ་མཚོའི་སྙིང་པོ། བྱང་ཆུབ་སེམས་དཔའི་སྦྱོད་པ་ལ་འཇུག་པའི་རྣམ་བཤད་རྒྱལ་སྲས་འཇུག་ངོགས། ཚད་མ་མདོའི་རྣམ་བཤད། རྗེའི་གསུང་ཟིན་བྲིས་ཚད་མའི་བརྗེད་བྱང་ཆེན་མོ། མངོན་པར་རྟོགས་པའི་རིམ་པ་ཉམས་སུ་ལེན་ཚུལ་ཐེག་མཆོག་སྒོ་འབྱེད། མངོན་པར་རྟོགས་པ་བརྒྱད་དོན་བདུན་ཅུ་དང་བཅས་པ་ཉམས་སུ་ལེན་ཚུལ། མངོན་པར་རྟོགས་པའི་རྒྱན་གྱི་བསྡུས་དོན་རིན་པོ་ཆེའི་ཕྲེང་བ། རྣམ་འགྲེལ་གྱི་བསྡུས་དོན་ཐར་ལམ་གྱི་དེ་ཉིད་གསལ་བྱེད། རིགས་པ་དྲུག་ཅུ་པའི་ཊཱིཀྐ། རིགས་པ་དྲུག་ཅུ་པའི་ཟིན་བྲིས། འབྲེལ་བ་བརྟག་པའི་རྣམ་བཤད་ཉི་མའི་སྙིང་པོ། ཚད་མའི་ལམ་སྒྲིགས། འགལ་འབྲེལ་གྱི་རྣམ་གཞག །མངོན་སུམ་ལེའུའི་བརྗེད་བྱང༌། དབུ་མ་རྒྱན་གྱི་བརྗེད་བྱང༌། ཤེས་རབ་ལེའུའི་ཟིན་བྲིས། དགེ་སློང་གི་བསླབ་བྱ་གནམ་རྩེང་ལྟེང་མ། དགེ་ཚུལ་གྱི་བསླབ་བྱ་གནམ་རྩེང་ལྟེང་མ། སངས་རྒྱས་སུམ་ཅུ་སོ་ལྔའི་མཚན་གྱི་ཕན་ཡོན། དཔལ་གསང་བ་འདུས་པའི་བླ་བརྒྱུད་གསོལ་འདེབས་མདོ་རྒྱུད་མར་གྲགས་པ། དཔལ་གསང་བ་འདུས་པ་འཇམ་དཔལ་རྡོ་རྗེའི་དཀྱིལ་འཁོར་གྱི་ཆོ་ག་དངོས་གྲུབ་ཀྱི་སྙེ་མ། སྒྲུབ་ཐབས་ཀུན་བཟང་གི་དོན་བཤད་པ། དཔལ་གསང་བ་འདུས་པའི་དཀའ་གནད་ཟིན་བྲིས། དཔལ་དུས་ཀྱི་འཁོར་ལོའི་ལམ་རིམ་པ་གཉིས་ཇི་ལྟར་ཉམས་སུ་ལེན་པའི་ཚུལ་བདེ་བ་ཆེན་པོའི་ལམ་དུ་མྱུར་དུ་འཇུག་པ། བསྒྲུབ་ལེའི་ཕྱག་རྒྱ་བཞིའི་ཟིན་བྲིས་ལ་སོགས་པ་རྣམས་མཛད་དོ།།

དེ་ནས་དགུང་ལོ་རེ་དགུ་བཞེས་པའི་ཚེ་ཞིང་ཁམས་གཞན་གྱི་འགྲོ་དོན་ལ་དགོངས་ནས་ཆུ་ཕོ་བྱི་ལོ་ཧོར་ཟླ་ལྔ་པའི་སྣྲོན་གྱི་ཟླ་བའི་ཡར་ངོའི་ཚེས་བརྒྱད་ལ་ལྷ་སའི་པོ་ཏ་ལར་མྱ་ངན་ལས་འདའ་བའི་ཚུལ་བསྟན། དེ་ནས་བཟུང་སྟེ་བདུན་ཕྲག་གསུམ་གྱི་བར་དུ་དབུས་གཙང་ཐམས་ཅད་དང༌། ཁྱད་པར་དགེ་ལྡན་དང་ལྷ་ས་གནས་རྙིང་རྣམས་སུ་གསེར་བཙོ་མའི་མེ་ཏོག་དང༌། གཞན་ཡང་ཙམ་པ་ཀ་དང༌། པདྨ་ར་ག་དང༌། ཨིནྡྲ་ནི་ལ་ལྟ་བུའི་ཁ་དོག་དང་ལྡན་པའི་ཆར་ཆེན་པོ་བབས། ཁྱད་པར་སྐུ་གདུང་དགའ་ལྡན་དུ་གདན་འདྲེན་པའི་དུས་དང༌། ཞུགས་འབུལ་བའི་དུས་རྣམས་སུ་རོལ་མོའི་སྒྲ་དང༌། འཇའ་འོད་དང༌། མེ་ཏོག་གི་ཆར་ལ་སོགས་པ་ངོ་མཚར་བའི་ལྟས་བརྗོད་ཀྱིས་མི་ལང་བ་བྱུང་བ་ནི་ཀུན་གྱི་མཐུན་སྣང་དུ་གྲུབ་པ་ཡིན་ནོ། །དེའི་ཚེ་མཁས་གྲུབ་རྗེས་ཞལ་བཀོད་གནང་ནས་དགེ་ལྡན་དང་གནས་རྙིང་སོགས་སུ་ཐུགས་དམ་གསོལ་འདེབས་ཀྱི་མང་ཇ་ཚར་འབུལ་རྒྱུན་གྲལ་འགྱེད་སོགས་བསམ་གྱིས་མི་ཁྱབ་པ་བསྒྲུབས་སོ། །སྐུ་གདུང་རྒྱལ་ཁང་རྩེར་ཞུགས་ལ་ཕུལ་བ་ལས་ཕྱིས་ཀྱི་གདུལ་བྱ་རྣམས་ལ་གསོལ་བ་འདེབས་པའི་རྟེན་དུ་རིང་བསྲེལ་མང་དུ་བྱོན་པ་དད་ལྡན་གྱི་གདུལ་བྱ་རྣམས་ལ་གསོལ་བ་འདེབས་པའི་རྟེན་དུ་རྒྱ་ཆེར་གནང་ཞིང༌། སྐུ་གདུང་བྱིངས་རྣམས་དངུལ་གྱི་མཆོད་རྟེན་ནང་དུ་བཞུགས་ཏེ་དགའ་ལྡན་རྣམ་པར་རྒྱལ་བའི་གླིང་ན་གདུལ་བྱ་རྣམས་ཀྱི་བསོད་ནམས་ཀྱི་ཞིང་དུ་བཞུགས་སོ།། །།