མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚད་མ་རིག་པའི་རིག་གཞུང་བགྲོ་གླེང་ཚོགས་འདུ་སྐབས་བརྒྱད་པ་ཟི་ལིང་ཙོང་ཁ་དགོན་དུ་འཚོགས།

        ༢༠༢༤ལོའི་ཟླ༩ཚེས༢༢ཉིན། མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚད་མ་རིག་པའི་རིག་གཞུང་བགྲོ་གླེང་ཚོགས་འདུ་སྐབས་བརྒྱད་པ་ཟི་ལིང་ཙོང་ཁ་དགོན་དུ་གཟབ་རྒྱས་ངང་འཚོགས།  ཐེངས་འདིའི་ཚོགས་འདུ་ལ་མཚོ་སྔོན་མི་རིགས་སློབ་ཆེན་དང་། མཚོ་སྔོན་དགེ་ཐོན་སློབ་ཆེན། མཚོ་སྔོན་ནང་བསྟན་སློབ་གྲྭ་ཆེན་མོ། སྐུ་འབུམ་དགོན་པ། རེབ་གོང་རོང་བོ་དགོན་ཆེན། དྷཱི་ཚ་བཀྲ་ཤིས་ཆོས་སྡིངས། པུས་མདོ་དགོན་ཆེན། མགར་རྩེ་དགོན་པ། པཎ་ཆེན་ཚད་མའི་སློབ་གླིང་སོགས་ཀྱི་དགེ་རྒན་ཆེན་མོ་དང་། དགེ་བཤེས། གཞི་རིམ་གྱི་མི་རིགས་སློབ་འབྲིང་ཁག་གི་དགེ་རྒན་དང་སློབ་གྲྭ་ཆེན་མོའི་སློབ་མ་སོགས་བསྡོམས་པའི་མི་དྲུག་ཅུ་ལྷག་ཐེངས་འདིའི་ཚོགས་འདུར་ཞུགས་ནས་རིག་གཞུང་བགྲོ་གླེང་གནང་། མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚོགས་གཙོ་གཞོན་པ་དགེ་རྒན་ཟླ་བ་མཆོག་གིས་ཚོགས་འདུའི་འགོ་འཛིན་གནང་། མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚོགས་གཙོ་སྒར་བ་ངག་དབང་བཟང་བོ་མཆོག་གིས་ཚོགས་འདུར་ཤིས་ཚིག་ཕུལ་བ་དང་། མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་དྲུང་ཆེ་གཞོན་པ་དཀོན་མཆོག་རྒྱ་མཚོས༢༠༢༤ལོའི་བྱ་བའི་སྙན་ཞུ་ཕུལ།

མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ། མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚོགས་གཙོ་གཞོན་པ་ཟླ་བས་ཚོགས་འདུའི་འགོ་འཛིན་གནང་བ།

མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚོགས་གཙོ་སྒར་བ་ངག་དབང་བཟང་བོ་མཆོག་གིས་ཤིས་ཚིག་ཕུལ་ཏེ་གཏམ་བཤད་གནང་བ།

མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་དྲུང་ཆེ་གཞོན་པ་དཀོན་མཆོག་རྒྱ་མཚོས་༢༠༢༤ལོའི་ཚད་རིག་ལྷན་ཚོགས་ཀྱི་བྱ་བའི་སྙན་ཞུ་འབུལ་བ།

མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་དགེ་འདུན་གྱིས་《སློབ་དཔོན་ཕྱོགས་གླང་གིས་གསར་དུ་གཏོད་པའི་གཞན་སེལ་གྱི་རྣམ་བཞག་ལ་དཔྱད་པ་》ཞེས་པའི་བརྗོད་གཞི་ལས་བགྲོ་གླེང་གནང་བ།

མཚོ་སྔོན་དགེ་འོས་སློབ་གྲྭ་ཆེན་མོ་མི་རིགས་དགེ་འོས་སློབ་གླིང་གི་དགེ་རྒན་ཆེན་མོ་ལྷུན་གྲུབ་རྡོ་རྗེས་《བསྡུས་གཞུང་གི་ཕྱེ་བ་དང་བརྡ་སྤྲོད་པའི་གཞུང་གི་མིང་ཚིག་ཡི་གེ་གསུམ་གྱི་གནད་དོན་》ཞེས་པའི་བརྗོད་གཞི་ལས་བགྲོ་གླེང་གནང་།

མཚོ་སྔོན་མི་རིགས་སློབ་གྲྭ་ཆེན་མོ། ཚད་མ་རིག་པ་དང་བོད་ཀྱི་རིག་གནས་ཞིབ་འཇུག་ལྟེ་གནས་ཀྱི་དགེ་རྒན་ཤ་བོ་ཐར་གྱིས་《རྒྱུ་མི་སྣང་བ་མ་དམིགས་པའི་གཏན་ཚིགས་རྟགས་ཡང་དག་ཡིན་མིན་ལ་དཔྱད་པ་》ཞེས་པའི་བརྗོད་གཞི་ལས་བགྲོ་གླེང་གནང་།

མཚོ་སྔོན་མི་རིགས་སློབ་གྲྭ་ཆེན་མོའི་བོད་རིག་པའི་སློབ་གླིང་གི་དགེ་རྒན་སངས་རྒྱས་མཁར་གྱིས་《དགོངས་འགྲེལ་རིག་པའི་ལམ་ནས་ས་སྐྱ་པཎྡིཏའི་ཚད་མའི་བཤད་སྲོལ་གྱི་ཁུངས་དང་འགྲེལ་ལུགས་ལ་གསར་དུ་དཔྱད་པ་》ཞེས་པའི་བརྗོད་གཞི་ལས་བགྲོ་གླེང་གནང་།

པཎ་ཆེན་ཚད་མའི་སློབ་གླིང་གི་དགེ་བཤེས་དཀོན་མཆོག་རྒྱ་མཚོས་《མ་དམིགས་པའི་རྟགས་ཡང་དག་ལས་མི་སྣང་བ་མ་དམིགས་པའི་སྐོར་ལ་ཅུང་ཙམ་དཔྱད་པ་》ཞེས་པའི་བརྗོད་གཞི་ལས་བགྲོ་གླེང་གནང་།

 ཚོགས་འདུར་ཕེབས་པའི་དགོན་སྡེ་ཁག་གི་དགེ་བའི་བཤེས་གཉེན་དང་སློབ་གྲྭ་ཆེན་མོའི་དགེ་རྒན་ཆེན་མོ་རྣམས་ཀྱིས་བགྲོ་གླེང་གནང་བ།

           ཚོ་ཆུང་དང་པོའི་ཚོགས་ཞུགས་པ་རྣམས་ཀྱིས་སོ་སོའི་དཔྱད་རྩོམ་གྱི་བརྗོད་དོན་སྐོར་ནས་གཏམ་བཤད་བགྲོ་གླེང་གནང་བ།

      ཚོ་ཆུང་གཉིས་པའི་ཚོགས་ཞུགས་པ་རྣམས་ཀྱིས་སོ་སོའི་དཔྱད་རྩོམ་གྱི་བརྗོད་དོན་སྐོར་ནས་གཏམ་བཤད་བགྲོ་གླེང་གནང་བ།

མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་རྒྱུན་ལས་ལས་འཛིན་དགེ་བཤེས་མུན་འཇོམས་སྒྲོན་མེ་ལགས་ནས་མཇུག་བསྡུ་མཛད་སྒོ་འགོ་འཛིན་གནང་བ་དང་། མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་ཚོགས་གཙོ་གཞོན་པ་ཁྱུང་ཕྲུག་བློ་བཟང་དར་རྒྱས་དང་དྲུང་ཆེ་གཞོན་པ་སྟག་འབུམ་རྒྱལ་གཉིས་ཀྱིས་ཚོ་ཆུང་སོ་སོའི་བགྲོ་གླེང་གི་གནས་ཚུལ་སྤྱི་སྡོམ་གནང་བ། མཚོ་སྔོན་ཞིང་ཆེན་ཚད་རིག་ལྷན་ཚོགས་ཀྱི་དྲུང་ཡིག་ཆེན་མོ་མགོན་པོ་ཚེ་རིང་ལགས་ནས་མཇུག་བསྡུ་བའི་གཏམ་བཤད་གནང་ནས་རྟེན་འབྲེལ་ཕུན་སུམ་ཚོགས་པའི་ངང་རིག་གཞུང་བགྲོ་གླེང་མཇུག་སྒྲིལ་བ་ཡིན།